Romanticismu
El Romanticismu es un movimientu cultural que s'originó en Alemaña i en Reinu Uniu a finalis del sigru XVIII como una reación encontra la Ilustración i el Neoclasicismu, dandu prioriá alos sentimientus.[1] Es considerau como la primera movición de coltura que cubrió el mapa compleuo d'América. Ena mayol parti delas áreas estuvu ena su regolfa nel períou aproximau de 1800 a 1850.[2] Luegu endispues, cediu el su lugal al positivismu, que fomenta la cávila crítica i el empirismu comu basis dela conocencia i la socieá.
Emportância
[Edital | Editá'l códigu]El Romanticismu es un movimientu crucial pa puel capiscal la coltura ocidental moerna. La filosofia, l`arte, la literatura, la música i la pulítica huerun influenciaus por él, duranti el turbulento periou que se tendió entri las que se conocin comu «revolucionis burguesas», que ena su definición pulítica se denominan tamién «revolucionis liberalis». El mundu ocidental s'abía sacudiu pola Revolución delas Treci Colónias de Inglaterra en 1776, la Revolución Francesa en 1789 i pola Primera Revolución endustrial que prencipiava a cambial la via tradicionalmenti agrária. Polo tantu, los nuevus mós de via se debian reflexal en nuevus mós de cavilal. El Romanticismu pasó a segnifical esta nueva experiência de mundu.[3]
Caraterísticas
[Edital | Editá'l códigu]La su característica fundamental es la rotura cola tradición clasicista basá nun conjuntu de regras estereotipás. La libertá auténtica es el su preocupaeru têntigu, por eso el su rasgu revolucionariu es incostionabili. Debiu a que el Romanticismu es una manera de sentil i concebil la naturaleza, asín comu ala via i al sel umanu mesmu, es que se apresenta de manera destinta i particulal en cá país ondi se engaripola, i mesmamenti dentru duna mesma nación, se manifiestan destintas tendencias, proyetánd-si ellu tamién en tolas artis.
Evolución
[Edital | Editá'l códigu]Se desenreoó ena primera metá del sigru XIX, tendiéndu-si dendi Ingalaterra i Alemaña asta ahorral a otrus paísis uropeus. Su vertienti literária se fragmenta endispués en deferentis corrientis, comu el parnasianismu, el simbolismu, el decadentismu o el prerrafaelismu, encaravizás ena denominación general de posromanticismu, del qual derivó el llamau modernismu hispanoamericano. Tuvu fundamentalis aportacionis enus campus dela literatura, la pintura i la música. Rabaeramenti, muchas delas corrientis vanguardistas del sigru XX, como el surrealismu, llevun al acirati los postulaus románticus dela exaltación del yo.
Referências
[Edital | Editá'l códigu]- ↑ Artes y educación: fundamentos de pedagogía mesoaxiológica. Netbiblo. 20 de hebreru de 2010. ISBN 9788497454513. Consultado el 19 de diciembre de 2017.
- ↑ Pavón, Emérita Moreno (2007). Introducción al teatro español durante el Románticismo. Teoría y actividades para el aula. Editorial Visión Libros. ISBN 9788498866421. Consultado el 19 de diciembre de 2017.
- ↑ Romaticismo para principiantes. Duncan Heath, ilustrado por Judy Boreham. Buenos aires. Era naciente. 2006. 176 páginas.