Bancje Mondiâl

La Bancje Mondiâl e je stade creade tal 1944, ae fin de Seconde Vuere Mondiâl, cul fin di ricostruî i paîs distruts par vie de vuere. Che volte si clamave IBRD (ven a stâi International Bank for Reconstruction and Development, Bancje Internazionâl pe Ricostruzion e il Svilup). La sêt de bancje e dal so grup asociât (IFC - International Finance Corporation,IBRD,IDA - International Development Association, MIGA - Multilateral Investment Guarantee Agency, ICSID - International Centre for Settlement of Investment Disputes) e je a Washington, in Americhe. Lis organizazions dal grup de Bancje Mondiâl a son ognidune specializade intun cjamp, ma a an dutis l'obietîf comun di judâ il disvilup dai paîs plui puars.

La Bancje Mondiâl e colabore ancje cul Font monetari internazionâl (FMI), che jude l'organizazion cun finanziament pal paiament dai debits dai paîs mancul svilupâts. Chescj doi organisims a son cognossûts insieme come "Instituzions di Bretton Woods", pal fat che a son stadis creadis inte conference che si davuelzè inte citadine dal Gnûf Hampshire dal 1 ai 22 di Lui 1944.