Margaret Mead
E je nassude a Philadelphia, prime di cuatri fîs intune famee di religjon cuacare origjinarie dal Midwest. Il pari, Edward Sherwood Mead, al jere professôr di economie te Universitât di Pennsylvania, sô mari, Emily Fogg, e jere une sociolighe. Lis dôs personis di riferiment pe sô cressite a son stâts la mari e la none di bande di pari. Dopo la scuele superiôr e je stade ametude te DePauw University, la universitât che e veve frecuentât so pari. Dopo un an, cundut de oposizion di so pari, si à trasferît li dal Barnard College, dulà che e à studiât psicologjie. Chi e à cognossût e e je deventade tant amie di Ruth Benedict, che le à persuadude a deventâ antropolighe. Dilunc dai studis e à cognossût un student di teologjie, Luther Cressman, che e à maridât intal 1923. E veve il sium di vê une famee numerose, ma i miedis i àn dite che no podeve vê fîs. Intal 1925 e je lade a Ta’ū, isule samoane, dulà che si à dedicât al studi des adolessentis. E je tornade intal 1926, e à scrit il so prin libri (Coming of Age in Samoa), che al è stât tradusût in tantis lenghis e che in chel la Mead, tra chês altris robis, e concludeve che il regrès adolessenziâl al jere imparât e no naturâl e che al jere origjinât di aspiets culturâi e no biologjics. Intal 1928 e à divorziât e e à maridât un psicolic neozelandês, Reo Fortune. Si àn trasferît ducj i doi in Gnove Guinee, dulà che la Mead si à dedicât al studi dal disvilup dai fruts e dai compuartaments dai adolessents de popolazion de Isule di Manus. Intal 1935 e à publicât “Ses e caratar”, basât su lis ricercjis fatis in Gnove Guinee su trê popolazions primitivis: i Arapesh, i Mundumugor e i Tchambuli. In chest tant che in altris lavôrs sucessîfs, e à afermât che i rûi sessuâi a diferivin fra lis diviersis societâts e a jerin tant plui influençâts dai aspiets culturâi che no di chei biologjics. Intal 1936 e je lade cul tierç om, l’antropolic Gregory Bateson, a Bais. Intal 1939 e je nassude sô fie Catherine. Intal 1942 e à publicât un libri, Balinese Character: A Photo Analysis, scrit cul so om Gregory, li che e à doprât une vore di documents fotografics, zontant in chest mût une inovazion intai studis antropologjics.
La seconde vuere mondiâl e à fermât i siei studis intal Ocean Pacific: intal 1944 e à fondât cun Ruth Benedict l’Institute for Interculturâl Studies. Intal 1953 e je tornade te isule di Manus par analizâ i cambiaments sucedûts dopo de esposizion cun altris culturis e e à scrit il libri New Lives for Old. Intal 1959 e à publicât il libri An Anthropologist at Work: Writings of Ruth Benedict, un studi su la sô coleghe Ruth Benedict. Intal 1972 e à scrit invezit la sô autobiografie, Blackberry Winter. E je muarte di cancar a New York ai 15 di Novembar dal 1978. Margaret Mead e à scrit 44 libris e plui di 1000 articui publicâts in diviersis lenghis. Arleve di Franz Boas, e sostignive la idee di une impostazion sientifiche in linie cun chê che e dominave in chê volte intai Stâts Unîts, incentrade a fuart su la ricercje etnografiche particolaristiche, cun grande cautele intes comparazions tra diviersis culturis e intes teorizazions gjenerâls. Al jere fondamentâl l’aprofondiment storic de evoluzion di ogni singule culture, calcolade uniche a pet di chês altris. In realtât la Mead, fin de famose ricercje intes isulis Samoa, e je lade daûr di un metodi no propit in linie cun chescj fins: pôc aprofondiment storic e paralêli fis tra la esperience adolessenziâl in Americhe e chê des zovinis samoanis. Cun di plui, ancje in graciis de sô formazion studentescje, al è stât simpri impuartant l’apuart di concets de psicologjie. Di consecuence, intune cun Ruth Benedict, e ven calcolade esponente principâl di une corint di studis definide studis di culture e personalitât. Po dopo e je stade tra lis primis a sostignî il caratar di costruzions culturâls dai rûi basât sul ses. La ricercje plui famose e impuartante di M.Mead e je stade La adolessence a Samoa, là che e sostignive che lis dificoltâts personâls cjatadis des adolessentis ocidentâls (americanis in particolâr), no son universâls e necessariis, ma gjeneradis pal plui des costrizions e des imposizions che i elements plui tradizionaliscj e moralistics de culture americane a imponin. Lis adolessentis samoanis, al contrari, a saressin lassadis libaris di rivâ ae maturitât fisiche, identitarie, sessuâl, sociâl, cence masse condizionaments, e no sofriressin des crisis e des dificoltâts cjatadis des ocidentâls. Chestis tesis a àn vût grandissima risonance intai Stâts Unîts, e a son stadis contestadis cun durece de bande de opinion publiche di orientament conservadôr. Lis critichis dispès a àn tacât plui intal metodi che intal merit il studi de Mead, par altri probabilmentri a reson a rivuart di une impostazion metodologjiche che e podarès vê fat sù un cuadri no masse atendibil. Di chê altre bande la Mead e je restade fin tai agns Sessante un personaç public une vore cognossût e paladine ferbinte dai valôrs progressiscj, antiautoritaris e antidiscriminatoris.