O Virxiniano

O Virxiniano
Na rede
[ editar datos en Wikidata ]

O Virxiniano (en inglés: The Virginian) é unha serie de televisión emitida pola Televisión de Galicia. Producida pola NBC, estreouse orixinalmente no ano 1962, durou en antena ata setembro de 1970. Inspirada no medio rural americano, relata o día a día dun vaqueiro sen nome alcuñado "O Virxiniano".

Historia

O Virxiniano foi a primeira serie de televisión cunha duración de noventa minutos, mentres as demais series, como Bonanza, duraban setenta e cinco. Logo dun episodio piloto de hora e media no 1958 e co mesmo actor principal, James Drury, a cadea de televisión non lle gustou o formato e decidiu non arriscar no proxecto. Así e todo, a nova ondada de series de televisión baseadas no oeste americano animaron a NBC a investir nela, aínda que con cambios. Pese a ser o 'remake' da novela homónima de Owen Wister, a personaxe do vaqueiro de Virxinia sufriu variacións do texto orixinal e das películas predecesoras para adaptala ó formato televisivo e ós gustos da audiencia. Mentres que na novela o argumento principal versaba sobre o amor entre unha profesora e o vaqueiro, na serie omitiuse para tratar temas cotiáns e os valores tipicamente americanos coma a xustiza, os prexuízos e as relacións entre os habitantes de Medicine Bow. A serie converteuse nun grande éxito para a cadea e durou en antena oito anos entre cambios de personaxes, mais James Drury e Doug McClure, o seu amigo Trampas, permaneceron ata o final da serie.

Sinopse

A serie arranca no ano 1980 nunha pequena vila de Wyoming chamada Medicine Bow onde chega un misterioso vaqueiro ó que chaman 'O Virxiniano' e é contratado polo xuíz local, Henry Garth (interpretado por Lee J. Cobb) como capataz do seu rancho de Shiloh. Alí coñecerá a filla adoptiva do xuíz, Betsy Garth, e unha periodista do diario local chamada Molly Wood. Na novela orixinal, Molly Wood era a profesora coa que casaría pero este dato foi modificado polos guionistas. Afastándose do estilo das demais producións sobre o oeste, cada episodio trataba un tema diferente profundizando na personalidade das personaxes fuxindo dos tópicos do xénero. Tódolos capítulos seguían a liña de introdución, nó e desenlace, cunha ensinanza sobre a xustiza ou as relacións humanas. Ó final da serie os produtores cambiaron o nome da serie, 'O Virxiniano', polo de 'Os homes de Shiloh'.

Elenco

Á parte de James Drury e Doug McClure, tódalas personaxes de Medicine Bow foron interpretadas por diferentes actores.

• O Virxiniano: James Drury.
  • Trampas: Doug McClure.
  • Steve Hill: Gary Clarke (1962-1964).
  • Xuíz Henry Garth: Lee J. Cobb (1962-1966).
  • Molly Wood: Pippa Scott (1962-1963).
  • Betsy Garth: Roberta Shore (1962-1965).
  • Randy Benton: Randy Moore (1963-1966).
  • Emmett Ryker: Clu Gulager (1964-1968).
  • Jennifer Sommers: Diane Roter (1965-1966).
  • John Grainger: Charles Bickford (1966-1967).
  • Sheriff Mark Abbott: Ross Elliot.
  • Stacey Grainger: Don Quine (1966-1968).
  • Elizabeth Grainger: Sara Lane (1966-1970).
  • Clay Grainger: John McIntire (1967-1970).
  • Holly Grainger: Jeanette Nolan (1967-1970).

Algúns dos actores de renome que fixeron aparicións especiais ou cameos foron: Charles Bronson, Bette Davis, Lee Marvin, Brandon De Wilde e George C. Scott. A outros coma Robert Redford e Leonard Nimoy serviulles de trampolín ó éxito.

Véxase tamén

Ligazóns externas

• Episodios do Virxiniano en epguides.com (en inglés)