Al initio, Cohen voleva un carriera como un poeta e romancero. Ille non comenciava un carriera in le musica usque 1967, quando ille habeva 33 annos. Su prime album Songs of Leonard Cohen (1967) e le canto Suzanne lanceava su carriera musical. Su prime albumes habeva un sono minimalista del musica folk. Con su quinte album Death of a Ladies' Man (1977), ille comenciava usar nove influentias, e durante le annos 1980 ille incorporava le musica jazz, oriental e mediterranean. Le mesme decennio, ille registrava Hallelujah, que post 2001 deveniva su canto plus cognite, e le album I'm Your Man (1988), quando ille introduceva synthetisatores in su musica. Post le sequente album The Future (1992), Cohen registrava minus frequentemente usque le annos final de su vita, quando ille publicava tres albumes in cinque annos. Un album postume esseva publicate in 2019.
Cohen habeva un recognoscibile voce multo grave e un sono que cambiava inter decennios. Su parolas explorava le religion, politica, isolation, meloncholia, amor, coito, perdita, e morte. Ille deveniva un del autor-compositores canadian le plus acclamate e honorate.
