Sɩm
Palʊlʊʊ ɛyʊ nɛ ɛcaɣ wezuu. Alɩwaatʊ ndʊ ɛyʊ feziɣ, ɛtɔkɩ nɛ ɛñɔʊ yɔ, pɔtɔŋ se ɛcaɣ wezuu. Yee alɩwaatʊ natʊyʊ eyeba fezuu nɛ ɛ-tomnaɣ eeciidiɣ nɛ ɛ-ñamɩyɛ ɛɛñaŋ kɔyɔ, pɔtɔŋ se ɛsɩba. Kpaɣ alɩwaatʊ ndʊ palʊlʊʊ ɛyʊ nɛ powolo pɩsɩɩna alɩwaatʊ ndʊ ɛsɩba yɔ payaɣ se wezuu caɣʊ. Wezuu caɣʊ alɩwaatʊ taa ɛyʊ pɩzɩɣ ɛla mbʊ ɛsɔɔlaa yɔ, ɛtɔkɩ nɛ ɛñɔɔ. Ɛlɛ, alɩwaatʊ ndʊ ɛyʊ yeki fezuu, pʊ-tɔbʊʊ se ɛ-ñamɩyɛ ɛɛtasɩɣ ñam, ɛ-kalɩzaɣ lɩ e-tomnaɣ taa yɔ pɔtɔŋ se ɛsɩba.
Toovenum lɛ, pʊdʊnaa naadozo kpɛndɩna nɛ pɩla ɛyʊ, pʊ-tɔbʊʊ se ɛyʊ wɛ tam naadozo taa : tomnaɣ, fezuu nɛ ciyam yaa kalɩzaɣ. Ɛsɔ nuuti cʊʊ nɛ ɛmana ɛyʊ nɛ ehosi ɛ-nɔɔŋ tɛɛ nɛ ɛha-ɩ fezuu. Ɛsɔ ma ɛyʊ ɛ-lɛzʊʊ, pʊ-tɔbʊʊ se ɛyʊ wɛna ciyam. Ciyam ŋgʊʊ lalaa yaɣ se kalɩzaɣ. Pʊdʊnaa naadozo mba pɛkpɛndɩna nɛ pacaɣ wezuu. Pʊdʊnaa naadozo mba pa-taa lɛ, tomnaɣ ɖeke panaɣna ɛsa pe. Alɩwaatʊ ndʊ ɛyʊ fezuu yɔ, pɔtɔŋ se ɛcaɣ wezuu. Alɩwaatʊ ndʊ ɛyʊ yeki fezuu yɔ, pɔtɔŋ se ɛsɩba. Ciyam lɩɣ tomnaɣ taa nɛ piyele pakpaɣ tomnaɣ pepi nɛ kapɩsɩ mʊzʊʊ ɖɔɖɔ ɛzɩ ka-mayʊ kɔyɔɔdʊʊ. Ɛlɛ kɔyɔɔdaa se ɛyʊ kɛ mʊzʊʊ nɛ ɛkaɣ pɩsɩʊ mʊzʊʊ. Ciyam lɩɣ tomnaɣ taa mbʊ lɛ, kɩpɩsɩ kɩ-mayʊ cɔlɔ. Pʊ-tɔbʊʊ se ciyam ɛɛsɩkɩ.
