Laren (Noord-Holland)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Laren is e versteidelek dörp en 'n gemeinte in de Nederlandse provincie Noord-Holland, in 't Gooi, mèt (1 juli 2006) 10.935 inwoeners en 'n oppervlak vaan 12,37 km² (daovaan 0,19 km² water). Binne de gemeintegrenze ligke gein ander kerne.

Oondanks sterke bevolkingsgreuj en de vesteging vaan väöl rieke lui mèt es gevolg tot de plaots väöl villa's kint, heet Laren gans get vaan zien aajd dörpsaonziech behawwe. Midden in 't dörp ligk 'ne brink, daorum eweg 'n aontal boerderije, die allewijl neet mie functionere. Laren is e belangriek cultureel centrum door de hoesvesting vaan 't Singer Museum en de Singer Concertzaal. Bovedeen is 't ein vaan de riekste gemeintes vaan Nederland. Petroenheilege vaan Laren is Sint Jan de Baptis.

Historie

Laren is al sinds de vreug Middeliewe bewoend. In 1085 stiechde de bisjop vaan Utrei hei e kapittel gewijd aon Sint Jan. Nao de reformatie bleef 't dörp es eineg in 't Gooi katholiek; de percessie vaan Sint Jan op 24 juni moch zelfs blieve doorgoon. Laren leefde in deen tied vaan landbouw en sjaopheerderij. In de late negentiende iew kaom 't dörp in trèk bij rieke Amsterdammers en kunstenere: wat Bussum veur sjrievers waor, woort Laren veur sjèlders. Later kaom ouch d'n Amerikaanse kunshandeleer William Singer hei te woene. In de jaore tacheteg vaan de twintegste iew kaom 't dörp in trèk bij nouveaux riches.