Orthografie

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De orthografie van 'n spraok is de algemein vasgelagdje meneer worop me de wäörd van die spraok in sjrif mót stèlle. Ze specificeertj de krekke waeg worop e specifiek sjriefstèlsel wuuertj gebroek veur 'n spraok te sjrieve; wen me mieër es ei sjriefstèlsel veur 'n spraok kèntj, wie bie 't Koerdisch, kónnen 't 's ouch mieëder orthografieje zeen. 't Waord "orthografie" is aafgelèdj gewaore van 't Aadgrieks: ὀρθός orthós ("krek") en γράφειν gráphein ("wie te sjrieve"). Orthografie is get anges es typografie. Bie 't litste geit 't euvere vórmgaeving (littertyp, zètting), dewiel orthografie euvere spèlling en interpunksje geit.

Orthografie besjrief of definieertj 't stèl aan symbole (grafeme of diakritische teikes) die waere gebroek enne regelen euver wie me die symbole mót sjrieve. Aafhengendj vanne aerd van 't sjriefstèlsel kónne dees regele laesteikes, spèlwies en houflitterbroek ómsloete.

In inkel vel kan 'n spraok mit ei sjriefstèlsel toch twieë orthografieje höbbe. E veurbild hievan is 't Ingels. 't Amerikaans en 't Brits Ingels höbbe namelik bei häör eige sjrifwies, meh broeke waal bei 't Letiens alfabèt. Dink hiebie aan versjille wie harbor (Amerikaans) en harbour (Brits).