Perzische Golf
Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.
De Perzische Golf (Perzisch: خلیج فارس; Arabisch: الخليج العربي Arabische Golf) is 'n golf in 't Midde-Ooste waat grens aan Irak, Iraan, Omaan, de Vereinigde Arabische Emirate, Qatar, Bahrein, Saoedi-Arabië en Koeweit. De oppervlakde daovan is zoget 251.000 veerkantje kilomaeter. De belangriekste revere die oetmunje in de golf zeen de Eufraat en de Tigris. De grótste sjtej die aan de golf ligke zeen Koeweit, Dubai en Abu Dhabi. De golf weurt verbónje mit de Arabische Zee en de Indischen Oceaan mit de Sjtraot van Hormoez en de Golf van Omaan. 't Is 'n belangrieke route veur 't verveur van roewen aerdaolie.
De Perzische Golf haet door zien riekdóm aan roewen aolie en aerdgaas e groot strategisch belank. De vief grótste producente van roewen aolie, Saoedi-Arabische, Iraan, Irak, Koeweit en de Vereinigde Arabische Emirate, ligke hie. Daoboete höbbe Iraan en Qatar naeve Ruslandj de grótste veurraod aan aerdgaas. Euver dees fossiel riekdóm zeen e groot deil oorloge geveurd gewaore, worónger d'n Irak-Iraanoorlog (1980-1988), de Golfoorlog (1990-1991) en d'n Irakoorlog (2003-2011).
In de golf ligke gooj vèsgrunj, oetgebrèdde koraalriffe en pareloesters, mer dees waere bedreig door vervoeling van de industrie.