Reeuwijk

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Reeuwijk in Zuid-Holland

Kathelikke, neogotische dörpskèrk in Reeuwijk

Reeuwijk is 'n veurmaolege gemeinte in de provincie Zuid-Holland, tege de grens mèt Utrei. Ouch is 't 'n dörpsnaom; 't gief evels sinds jaor en daag twie kerne mèt de naom Reeuwijk (zuug oonder).

Historie

Reeuwijk weurt in 1248 veur 't iers geneump, wat relatief laat is. 't Waor in deen tied 'n törfkolonie. Törf steke bleef nog lang zien belaankriekste functie; groete aofnummer waor de stad Gouda. De pole die westelek vaan Reeuwijk-brug ligke (de zoegeneumde Reeuwijkse Plassen) getuige dao nog vaan. In 1855 kaom 't zier landelek Middelburg bij de gemeinte Reeuwijk. In 1989 woort 't groetste deil vaan de gemeinte Driebruggen, boe-oonder de dörpskerne Driebruggen en Waarder, aon Reeuwijk touwgevoog. In 2011 góng 't op in de nui gemeinte Bodegraven-Reeuwijk.

Ciefers en kerne

De gemeinte Reeuwijk had op 1 januari 2010 13.055 inwoeners en 'n oppervlak vaan 50,11 km² (daovaan 11,89 km² water). Ze bestoont oet de kerne Driebruggen, Hogebrug, Reeuwijk-Brug (raodhoes), Reeuwijk-Dorp, Sluipwijk, Tempel en Waarder. Reeuwijk-Brug waor in d'n twintegsten iew door intensieve nuibouw väöl groeter gewore es Reeuwijk-Dorp.