Soria

ZE	Quésta pàgina a l'é scrîta in zenéize, segóndo a grafîa ofiçiâ

Soria comùn
Soria – Veduta Vìsta de Soria da-o mónte do castéllo
Localizaçión
Stâto	Spàgna
Comunitæ outònoma	Castiglia e León
Provìnsa	Soria
Aministraçión
Alcalde	Carlos Martínez Mínguez (PSOE) da-o 2019
Teritöio
Coordinæ:	41°46′N 2°28′W41°46′N, 2°28′W (Soria)
Altitùdine	1 063 m s.l.m.
Superfìcce	271,8 km²
Abitanti	39 821 (2020)
Denscitæ	146,51 ab./km²
Comùn confinanti	Abejar, Alconaba, Borobia, Cabrejas del Pinar, Canicosa de la Sierra, Cidones, Covaleda, Duruelo de la Sierra, El Royo, Garray, Golmayo, Los Rábanos, Molinos de Duero, Navaleno, Noviercas, Ólvega, Regumiel de la Sierra, Vadillo, Velilla de la Sierra, Vinuesa
Âtre informaçioìn
CAP	42001–42005
Prefìsso	975
Fûzo oràrio	UTC+1
Còdice INE	42173
Targa	SO
Nomme abitanti	(es) Soriano
Sànto patrón	Sàn Satûio Vèrgine do giancospìn
Comarca	Frentes
Mòtto	Soria pura, cabeza de Estremadura
Cartògrafîa
Soria
Soria – Mappa Poxiçión do comùn de Soria inta sò provìnsa.

Soria o l'é 'n comùn spagnòllo de 39.821 abitànti (a-o 2020), capolêugo da provìnsa co-o mæximo nómme, ch'o se trêuva inta comunitæ outònoma de Castìggia e Lión.

A çitæ, dónde ghe stâ ciù do 40% da popolaçión da provìnsa intrêga, co-i só 1.063 mêtri d'altéssa in sciô livéllo do mâ a l'é o segóndo capolêugo de provìnsa ciù èrto de tùtta a Spàgna, dòppo Ávila (1.131 m). Pe de ciù, Soria a l'é o segóndo capolêugo ciù picìn tra quélli de provìnse spagnòlle, sùbito prìmma de Teruel (Aragónn-a) che, a-o 2022, o l'àiva 'na popolaçión de 35.900 abitànti.

Giögrafîa

L'éremo de Nòstra Scignôa de Mirón e o paizàggio d'in gîo

O comùn de Soria a l'é scitoòu in scê zìnn-e do sciùmme Duero, inta pàrte ciù èrta do sò córso, a-i pê da cadénn-a do Scistêma Ibérico. A çitæ a s'esténde tra dôe colìnne, o Cerro del Castillo e o Cerro del Mirón, e o valón ch'o-e sepâra, lóngo a zìnn-a de drîta do Duero. Scibén che gh'é di quartê in sciâ zìnn-a de mancìnn-a ascì, ligæ a-o céntro pe mêzo do Puente de Piedra, a çitæ a s'é svilupâ sorviatùtto vèrso ponénte.

Fêua da çitæ, into teritöio do comùn gh'é ancón o quartê de Las Casas, distànte 1,2 km da-o céntro, e-e træ localitæ de Oteruelos, de Pedrajas e de Toledillo, tùtte træ vèrso nòrd-òvest. Gh'é pöi dôe ecsclâve sénsa abitànti, sàiva a dî i Pinares de Soria a ponénte e 'na pàrte picìnn-a da Sierra de Toranzo a levànte. Into comùn de Soria gh'é tréi lâghi artifiçiâli realizæ lóngo o córso do sciùmme Duero: Los Rábanos a sùd, o Campillo de Buitrago a nòrd-òvest e La Cuerda del Pozo inte l'ecsclâve de Los Pinares de Soria.

O comùn o l'à 'na superfìcce totâle de 27.420 ètari, co-in'altéssa in sciô livéllo do mâ ch'a và da 1.000 a 1.200 mêtri. Prezénpio, o céntro da çitæ o l'é a 1.064 m, a colìnn-a de Santa Ana a l'arîva a 1.268 m e o brìcco de Berrún a 1.224 m. Ciù ò mêno, quésti brìcchi són delimitæ da-o córso do sciùmme Duero e da de cadénn-e che chìnn-an zu da-o Scistêma Ibérico.

A çitæ a fà pàrte da comarca de Soria e a se trêuva a 'na distànsa de 101 km da Logroño, de 142 km da Burgos, de 159 km da Saragóza, de 178 km da Panplónn-a, de 207 km da Valladolid e de 231 km de Madrìd.

Stöia

A Ciàssa Magiô de Soria

Pòsti de interèsse

In sciâ bâze de 'n rezocónto comunâle, into 2014 a Soria gh'êa 292 scîti de interèsse tra costruçioìn stòriche, monuménti e òpie d'àrte.

Architetûe religiôze

A çitæ de Soria a l'é conosciûa cómme "a çitæ de 35 paròcchie" ascì dæto che, a-o censiménto do 1270 vosciûo da-o rè de castìlia Alfonso X, a rizultâva spartîa inte 35 paròcchie. A-a giornâ d’ancheu n'é sopravisciûo sôlo quarchedùn de 35 paròcchie òriginâie, a ògni mòddo o patrimònio de architetûe religiôze da çitæ o l'é ancón asæ inportànte.

• Cocatedrâle de Sàn Pê
• Gêxa de Sàn Zâne de Rabanera
• Gêxa de Sànto Doménego
• Gêxa de Sànta Màia a Magiô
• Gêxa de Nòstra Scignôa do giancospìn
• Convénto de Nòstra Scignôa do Càrmo
• Éremo de Sàn Satûio
• Éremo de Nòstra Scignôa de Mirón
• Monestê de Sàn Zâne de Duero

Architetûe civîli

• Palàçio di Cónti de Gómara
• Plaza de toros, ò La Chata

Architetûe militâri

• Castéllo de Soria
• Miâge da çitæ

Muzêi

• Muzêo Numantìn
• Muzêo medievâle de Sàn Zâne de Duero
• Muzêo diocezàn

Âtro

• Giardìn Alameda de Cervantes
• Pàrco do castéllo
• Rèsti archiològichi da çitæ romànn-a de Numantia, into teritöio do comùn de Garray

Comunicaçioìn

A staçión de Soria-Cañuelo

Stràdde

A çitæ de Soria a l'è servîa da-e outostràdde elencæ chi de sótta:

• A-11: a conlîga a çitæ con Valladolid, Zamora e a frontêa co-o Portogàllo, vèrso ponénte.
• A-15: a conlîga Soria con San Sebastián, inti Pàixi Bàschi.

Ferovîe e traspòrti pùblichi

Soria a l'é conligâ a-a ræ feroviària spagnòlla atravèrso a staçión de Soria-Cañuelo, capolìnia do trêno 54 ch'o và da chi scìnn-a Madrìd. Gh'êa âtre dôe lìnie che servîvan a çitæ ma, a-a giornâ d'ancheu, són fêua de servìçio.

O traspòrto pùblico o l'é garantîo da 6 lìnie de coriêre urbâne e da numerôxi ligàmmi èstra-urbâni.

Ariopòrti

L'ariopòrto ciù vixìn o l'é l'ariodromo de Garray (còdice IATA "SORIA-GARRAY) de dónde però no pàrte de conligaménti de lìnia con âtre çitæ. I ariopòrti comerciâli ciù vixìn a Soria són quélli de Logroño, de Saragóza e de Madrìd.

Aministraçión

Binelàggi

• Collioure
• Meharrize

Scìndichi de Soria

1979-1983	Jose Luis Liso Marin	UCD
1983-1987	Jose Luis Liso Marin	AP
1987-1991	Bravo Virgilio Velasco	PP
1991-1995	Bravo Virgilio Velasco	PP
1995-1999	Javier Jimenez Vivar	PP
1999-2003	Eloísa Álvarez Otero	PSOE
2003-2007	Encarnacion Redondo Jiménez	PP
2007-2011	Carlos Martínez Mínguez	PSOE
2011-2015	Carlos Martínez Mínguez	PSOE
2015-2019	Carlos Martínez Mínguez	PSOE
2019-in càrega	Carlos Martínez Mínguez	PSOE

Galerîa d'inmàgine

• 
  Vìsta da cocatedrâle de Sàn Pê de Soria.
• 
  I rèsti do pòrtego de Sàn Zâne de Duero.
• 
  L'éremo de Sàn Saturio, constrûto in sce 'n derûo in sciô sciùmme Duero.
• 
  O palàçio di Cónti de Gómara.
• 
  E miâge medievâli da çitæ.

Âtri progètti

Altri progetti

• Wikimedia Commons

• Wikimedia Commons a contêgne di files in sce Soria

Conligaménti estèrni

• (ES) Scîto ofiçiâ, in sce soria.es. URL consultòu o 26 arvî 2021.