Castell Sforzesch de Milan
El Castell Sforzesch de Milan l'è staa faa su in del XV secol del Francesch Sfòrza, che l'era diventaa de pòcch Duca de Milan, sora di rest de ona fortificazion del XIV secol.
Di temp del Ducaa milanes e spagnoeu a l'era 'na fortificazion proppi importanta e strategica, tant che 'l sò castellan a l'era in tra i caregh pussee important del Stat, sotta i austriegh l'ha perduu importanza e l'è deventaa sed de la Milizia Urbana. In di primm agn del Regn d'Italia a l'era borlaa in disgrazia e on poo de gent l'ha parpognuu de sbattél giò per fàgh su 'na zona residenziala, tant che 'l sindegh Giulio Bellinzaghi l'ha approvaa el progett, ma a la fin la volontà di gent de coltura l'ha prevals e l'è staa restaveraa a la veggia gloria di Sforza, anca per desmentegà i secoi de domini militar.
Al dì d'incoeu l'è vun di sitt pussee visitaa de Milan, e denter el castell gh'è di musee, ligaa sia a la storia del Castell sia a l'art che a la storia antiga.
L'è servii de du stazion de la metropolitana milanesa: Cadorna FN e Cairoli.