Saudah binti Zam'ah
 | |
| Asmana ḍâlem bhâsa asli | (ar) سودة بنت زمعة  |
|---|---|
| Carèta oḍi' | |
| Èlahèraghi | 589 Mekka |
| Sèdhâ | 1r Sèptèmber 674 (84/85 taon) Maḍina |
Data pribadi (id)  | |
| Aghâma | Islam |
| Kegiatan (id) | |
| Pekerjaan (id) | Sahabat Nabi (id) |
| Keluarga (id) | |
| Pasangan nikah (id) | Muhammad (619 (Kalender Masehi Gregorius)–632 (Kalender Masehi Gregorius)) As-Sakran ibn Amr (en) (nilai tidak diketahui–nilai tidak diketahui) |
Saudah binti Zam'ah (bhâsa Arab: سودة بنت زمعة بن قيس) èngghi panèka sala sèttong rajina Nabbhi Muhammad saw.[1] Saudah aropa'aghi raji kaḍuwâ'na Kanjeng Nabbhi. Sabellun araka sareng Nabbhi, Saudah akabin sareng Sukran bin Amr bin Abdusy Syams tor ngaghungè potra asmana Abdullah.[2]
Saamponna 25 taon amonogami sareng Khadijah, Nabbi Muhammad molaè apoligami sareng Saudah è bulân sè sami saamponna Khadijah sedhâ, ya'ni bulân pasa, 3 taon sabellunna hijrah.[3] Khaulah binti Hakim mator ka Nabbhi kaangghuy akabin sareng Saudah.[1] Taḍâ' riwayat sè jellas parkara omor saponapa Saudah akabin sareng Rasulullah, namong ramana ècathet ghi' oḍi' è bâkto Saudah akabin sareng Rasulullah tapè pon seppo.[1] Saudah sèdhâ saamponna 57 taon akabin sareng Rasulullah, èngghi panèka è bulân Sabâl è taon 54 hijriyah.[4]
Sauda panèka raji sè partama akabin sareng Nabbhi Muhammad saamponna Khadijah sèdhâ. Sauda apolong sareng Nabbhi Muhammad ra-kèra tello taon sampè' Nabbhi akabin sareng Aisyah.[1]
Saudah ngèrèng ka Perrang Khaybar sareng Haji Wada'. Samarèna Haji Wada', Saudah ta' ahajji polè sareng lako neng-neng è dhâlemma (ta' kalowaran). Dhibi'en sèdhâ è bâkto Umar bin Khattab dhâddhi khalifah abâk ngabuḍi sareng aropa'aghi Ummul Mu'minin sè sèdhâ ḍâ'-aḍâ' lasatarèna sèdhâna Kanjeng Nabbhi.[5]
Saudah èkennal orèng binè’ se tatak sareng nèserran. È bakto Saudah abek seppo, dhibi'en aparèng jadwal jima' abhâreng Kanjeng Nabbhi ka Sayyidah Aisyah sè aropa’aghi raji sè èkasennengngè Kanjeng Nabbhi. Aisyah toman adhâbu:
"Kaulâ ta' toman nyongngo' rèng binè' laèn sè kalakowanna terro kaulâ tèro, sè lebbiyân ḍâri Saudah binti Zam'ah."[1]
Saudah aropa'aghi raji Kanjeng Nabbhi Muhammad sè bâḍâ è ḍâlem kadhâddhiyân sè nyabâbaghi toronna ayat hijab. Sabellunna ḍâteng parènta ḍâri Allah kaangghuy aguna’agi jilbab, rajina Nabbhi ta’ aghuna’agi jilbab. Namong, Umar bin Khattab, sahabat Rasulullah se anḍi’ akhlak tangguh, rabu ka Rasulullah, aparèng nasehat ka'angghuy ahijab rajina tapè Nabbhi ta' mèrengaghi saranna. È jhâmanna Nabbhi Muhammad, manabi rajina terro kaberrdhân, dhibi'en kalowar malem ka kennengngan sè lèbar tor tabukka’ se anyama Al-Manasi. Ngaonèng ka’ḍinto, Umar sè cè’ somangatta ka'angghuy ètoronnaghi ayat jilbab aḍântos sampè' Saudah terro muwang hajhât lajhu Umar aserro, “Saongghuna kaulâ tengngen ka panjhennengngan, ya Saudah!".[1] Tako’ kadhaddhiyân sè kantaa jârèya polè, Saudah mator ka Nabbhi. Ta’ abit ayat hijab toron.
Sombher
[beccè' | beccè' sombher]- ↑ 1,0 1,1 1,2 1,3 1,4 1,5 Syaikh Mahmud Al-Mishri. Biografi 35 Shahabiyah Nabi Muhammad. Jakarta Timur: Ummul Qura. Maret 2023. ISBN 9786027637306.
- ↑ Muhammad bin Saad Al-Baghdadi. Al-Tabaqat Al-Kubra. Juz 4. Kaca 204. 15 Maret 2018.
- ↑ Al-Tabari. History of Al-Tabari, Vol. 39. hlm. 161.
- ↑ Ibnu Sa'ad. Kitab at-Tabaqat al-Kabir Volume VIII: The Women of Madina. hlm. 43.
- ↑ Yazir bin Waziri. Zaujatur Rasul. Kaca 4