Jeff Baxter
Jeffrey Allen "Jeff Skunk" Baxter (* 13. Dezember 1948 in Washington (D.C.)) is en US-amerikaansch Rockgitarrist un Dobrospeler, bekannt wurrn dör sien Arbeit mit Steely Dan un den Doobie Brothers.
Baxter sien Musikkarriere fung in de 1960er Johren an, as he vör en körten Tiet Liddmaat vun de Holy Modal Rounders wurr. 1969 hett he an dat letzt Album vun de Psychedelic Rock-Band Ultimate Spinach mitwarkt. 1972 speel he denn de Leadgitarr bi Steely Dan up deren Debütalbum Can't Buy a Thrill. Nah Countdown to Ecstasy van 1973 un Pretzel Logic van 1974, hett aber Walter Becker de Leadgitarrenparts övernommen, so dat Baxter dor nich mehr bruukt wurr.
He is denn 1974 to de Doobie Brothers wesselt un weer dor glieks an de Upnahmen to What Once Were Vices Are Now Habits bedeeligt. Dornah speel he noch up all tosommen veer Alben vun de Band un speel dor denn ok noch af un to de Steelguitar. 1979 hett he de Doobies weer verlaaten.
Siet Midden vun de 1970er Johren is Baxter ok as Session-Musiker in verscheeden Genres tätig. To de Musikers, de Baxter begleit hett hörrn to'n Bispeel Al Kooper, Rod Stewart, Joni Mitchell, Ringo Starr, Rick Nelson, Barbra Streisand, Bryan Adams, Donna Summer, Dolly Parton, Carly Simon, Hoyt Axton un Freddie Hubbard.
Baxter tour 1990 mit Keith Emerson (Emerson, Lake & Palmer), John Entwistle (The Who), Joe Walsh (Eagles) un den profileerten Studiodrummer Simon Phillips ünner de Bandnaam The Best dör Hawaii un Japan. En Album vun disse Band keem aber nich tostannen.
Later wurr Baxter todem as Musikproduzent tätig, so hett he eenig Alben vun Nazareth produzeert. Ok wuss sien Interesse an Militärtechnologien, wat dorto führen dee, dat he 2001 vun de US-amerikaansch Regeeren anstellt wurr.