Karl Carstens

Prof. Dr. Karl Walter Claus Carstens (* 14. Dezember 1914 in Bremen; † 30. Mai 1992 in Meckenheim) weer en düütschen Politiker (CDU). He weer vun 1979 bet 1984 as Bundspräsident Staatshööft vun de Bundsrepubliek Düütschland.

Wat he lehrt hett un wat för’n Beroop he harrt hett

Carstens an'n 28. Juni 1982 bi'n Bundsnahrichtendeenst

Carstens is as Söhn vun en Studienraat boren. Ehr he up'e Welt keem, is sien Vadder in Frankriek fullen. 1933 möök he up dat „Ole Gymnasium“ in Bremen sien Abitur un studeer Jura un Politologie in Frankfort an'n Main, Dijon, München, Königsberg un Hamborg. 1936 möök he sien eerstet un 1939 sien twedet Staatsexamen. 1938 hett he sien Promotschoon to'n Dr.jur. kregen. Vun 1939 bit 1945 is he as Suldat bi de Flakartillerie in'n Tweeten Weltkrieg ween. Tolest weer he Leutnant. As de Krieg vörbi weer, is he in Bremen as Afkaat tolaten wurrn. 1948 güng he bi un studeer an de Yale-Universität in New Haven, Connecticut (USA). Düt Studium hett he 1949 afslaten mit den Titel vun en „Master of Laws“ (LL.M.). Vun 1949 bit 1953 weer he Raatgever för Recht bi den Bremer Senat un Bevollmächtigten vun dat Land Bremen bi den Bund. Vun 1950 af an hett he en Lehrupdrag an de Universität to Köln harrt. Dor hett he denn ok sien Habilitatschoon maakt. 1954 is he bi de Bunnsrepublik Düütschland in den Deenst bi dat Butenamt intreden. Bit 1955 weer he stännigen Vertreder vun de Bunnsrepublik Düütschland bi den Europarat in Straßburg, denn güng he na dat Butenamt in Bonn. 1958 is he dor Baas vun de Afdelen "West I Europa" wurrn. 1960 is he as Professor för Recht vun de Staten un Völker an de Universität Köln wurrn. Vun 1970 bit 1972 hett he dat Leit harrt in dat Institut för Forschung vun de Düütsche Sellschop för Butenpolitik in Bonn.

Familie

1944 hett Carstens Veronica Prior (* 1923) freet. Veronica Carstens is later Doktersche för Binner Medizin wurrn. Kinner hefft de beiden nich kregen. 1982 hefft se tosamen de Karl un Veronica Carstens-Stiftung grünnt. De scholl Wetenschop un Forschen vun Naturheilkunn un Homöopathie föddern.

Liddmaat vun NSDAP un CDU

Vun 1940 bit 1945 weer Carstens Liddmaat vun de NSDAP. He schall den Andrag up Upnahm stellt hebben, as he Referendar weer. Dor schall de Präsident vun dat Landgericht em seggt hebben, he scholl man beter bitreden, wenn he anners nich Nadelen up sik nehmen müch. Man Carstens is al vun 1933 af an Liddmaat vun de SA ween.

Vun 1955 af an höör he to de CDU to.

Afordenten

Vun 1972 bit 1979 hett Carsten in den Düütschen Bundsdag seten. He is 1972 över de List vun dat Land Sleswig-Holsteen in den Bundsdag intagen. 1976 is he as Afordenten vun den Wahlkreis Oostholsteen direktemang wählt wurrn. Vun Mai 1973 bit Oktober 1976 is he dor Vörsitter vun de CDU/CSU-Fraktschoon in den Bundsdag ween. Dor hett he de Oppositschoon mit anföhrt. Na de Wahlen to'n Bundsdag 1976 is Carstens an'n 14. Dezember 1976 to'n Präsidenten vun den Düütschen Bundsdag wählt wurrn.

Annere Ämter, de Carl Karsten utöövt hett

Karl Carstens to Besöök bi „25 Jahre Bundsamt för Zivilschutz“, 1983.

Vun Juli 1960 bit Dezember 1966 weer Carstens Staatssekretär in dat Utwärtige Amt. In de Johre vun de Grote Koalitschoon vun Dezember 1966 bit 1969 is he denn as Staatssekretär Baas vun dat Bundskanzleramt bi Bundskanzler Kiesinger ween. Bi de Wahlen to den Düütschen Bundspräsidenten 1979 hett de Düütsche Bundsversammlung em to'n 5. Bundspräsidenten vun de Bundsrepubliek Düütschland wählt. Dor hett he Walter Scheel mit aflööst. Carstens is in siene Amtsjohre bekannt wurrn as de „Wannerpräsident“, vunwegen datt he so geern wannern dö. Bi't Wannern is he faken mit allerhand Minschen tohopenkamen, de denn en Stück mitlopen sü+nd un mit de he denn ok unnerwegens wat eten hett. Vunwegen sien Öller hett he sik de tweete Amtstied begeven un hett an'n 30. Juni 1984 Bott geven.

Bundspräsident Karl Carstens unnerwegens

Staatsbesöke

Johr	Maand	Staaten
1980	April/Mai	Irland
	Juli	Portugal
1981	Januar	Öösterriek
	März	Indien
	Juli	Vereenigt Königriek
	September/Oktober	Spanien
	Oktober	Belgien, Rumänien, Ägypten
1982	Februar	Grekenland
	April	Brasilien, Jamaika
	Mai	Däänmark
	August	Swiez
	Oktober	Italien, Vatikan, VR China
1983	September	Jugoslawien
	Oktober	USA, Frankriek
	November	Elfenbeenküst, Niger
1984	Februar/März	Indonesien, Thailand

Schriften

Der gutgläubige Erwerb von Pfandrechten an Grundstücksrechten. Dissertatschoon, 1938.
Grundgedanken der amerikanischen Verfassung und ihre Verwirklichung. Habilitatschoon, 1952/54.
Das Recht des Europarates, 1956
Politische Führung – Erfahrungen im Dienst der Bundesregierung. 1971.
Bundestagsreden und Zeitdokumente. Bonn 1977.
Reden und Interviews. 4 Bände, Bonn 1979–1983.
Deutsche Gedichte. (Hrsg.) 1983.
Erinnerungen und Erfahrungen. 1993.

Literatur

Tim Szatkowski: Karl Carstens. Eine politische Biographie. Böhlau-Verlag, Köln/Weimar/Wien 2007, ISBN 978-3-412-20013-8.
Daniel Lenski: Von Heuss bis Carstens. Das Amtsverständnis der ersten fünf Bundespräsidenten unter besonderer Berücksichtigung ihrer verfassungsrechtlichen Kompetenzen. EKF, Leipzig/Berlin 2009, ISBN 978-3-933816-41-2.

Weblenken

Karl Carstens. Mehr Biller, Videos oder Audiodateien to’t Thema gifft dat bi Wikimedia Commons.

DNB-Katalog
Biografie up de Siet vuzn den Bundspräsidenten
Interview mit Karl Carstens im Historischen Archiv der EU in Florenz

Einzelnachweise

Bundspräsidenten vun de Bundsrepubliek Düütschland

Präsidenten vun den Düütschen Bundsdag

Frakschoonsvörsitter vun de CDU/CSU