Placentale pattedyr

Placentale pattedyr
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Megaklasse:	Beinfiskar Osteichthyes
Overklasse:	Tetrapodar Tetrapoda
Klasse:	Pattedyr Mammalia
Underklasse:	Theria
Infraklasse:	Placentale pattedyr Placentalia Owen, 1837

Placentale pattedyr eller morkakedyra (Eutheria) er dei pattedyra som har ei morkake (placenta) som samband mellom kretsløpssystemet til foster og mor. Morkaka oppstod evolusjonært ved at fosterhinnene og allantois (som er «urinsekken» til fosteret hjå alle amniotar) la seg inntil livmorveggen. Morkaka er den eigenskapen som gjer forlenga drekt mogleg, fordi fosteret ellers ikkje kunne blitt forsynt med oksygen og næring. Drekta hjå placentale pattedyr kan vare opptil elleve månader mot maksimalt éin månad hjå pungdyr.

Fellestrekk

I stamarten til dei placentale pattedyra – og i mange av de nolevande representantane – fanst og finst det framleis to livmorer. Derimot har dei to skjedene, som ein til dømes finn hjå pungdyr, smelta saman til éin.

Endå eit avleidd fellestrekk for dei placentale pattedyra er at talet på tenner blei redusert med to fortenner og éi jeksel. Stamarten hadde altså tre fortenner, éi hjørnetann, fire premolarer og tre jekslar. I mange delgrupper har talet på tenner blitt vidare redusert.

Inndeling

Tradisjonelt deler ein dei placentale pattedyra inn i rundt 20 ordenar. Nyare analysar viser at desse ordenane igjen fell i fire grupper, som truleg representerer tidleg utvikling på ulike stader ettersom superkontinenta Laurasia og Gondwanaland blei splitta opp av kontinentaldrift tilbake i jura- og krittida:

• Laurasiatheria, rovpattedyr, klauvdyr, kvalar og insektetarar, oppstod truleg tidleg i krit på det laurasiske superkontinentet etter at det blei lausrive frå Gondwanaland
• Euarchontoglires, gnagarar, haredyr og primatar, skilde seg truleg frå laurasitherane i midtre krit og utvikla seg på øyene som seinare blei Europa.
• Xenarthra, maurslukarar, beltedyr og dovendyr, utvikla seg i Sør-Amerika då Gondwanaland delte seg opp i tidleg krit.
• Afrotheria, elefantar, sjøkyr, klippegrevlingar, utvikla seg i Afrika då Gondwanaland delte seg opp i tidleg krit.

Ordenar

• Afrodyr (Afrosoricida)
• Klauvdyr (Artiodactyla)
• Rovpattedyr (Carnivora)
• Kvalar (Cetacea)
• Flaggermus (Chiroptera)
• Beltedyr (Cingulata)
• Skjermflygarar (Dermoptera)
• Piggsvindyr (Erinaceomorpha)
• Klippegrevlingar (Hyracoidea)
• Haredyr (Lagomorpha)
• Springspissmus (Macroscelidea)
• Hovdyr (Perissodactyla)
• Skjeldyr (Pholidota)
• Dovendyr (Pilosa)
• Primatar (Primates)
• Snabeldyr (Proboscidea)
• Gnagarar (Rodentia)
• Trespissmus (Scandentia)
• Sjøkyr (Sirenia)
• Spissmusdyr (Soricomorpha)
• Jordsvin (Tubulidentata)

Bakgrunnsstoff

Commons har multimedium som gjeld: Placentale pattedyr

Wikispecies

Wikispecies har taksonomisk informasjon om Eutheria