Подданство

Подданство — форма феудалной зависимости селян-кметьох: привязаня их ку земли и подряджѣня административной и судовой владѣ землепана.

Повинности кметьох

Велика векшина кметьох жила лем з того, што добыли, обробляючи таблу землѣ, котра была властностьов землепана. Тото быв засадна одличность кметьох од рабох, котры самы были властностьов пана и были купованы и продаваны без жадного одношѣня ку земли. Кметь мав ся сам старати о свою выживу, облечѣня, обув, а тото собѣ добывав своев властнов продукциов, котру продавав або выхосновав про себе. Значну часть зоз той продукции мав оддати землепанови, а землепан тыж мав право принутити го обробляти панску землю, не придѣлену кметям (майор). Кметь повинен быв тыж молоти свое зерно на млинах свого землепана, а нигде инде.

Одумераня подданства

В Западной Европѣ, де в середновѣку в подданствѣ были англицкы вилланы, каталонскы ременсы, французскы и талианскы сервы, елементы подданства пропали в XVI. – XVIII. сторочах. В Середньой и Восточной Европѣ в тых истых сторочах вывинули ся бруталны формы подданства. Тут подданство было скасоване в ходѣ буржоазных реформ од конця XVIII. стороча и током XIX. стороча. В России было скасоване реформов з року 1861.

Жерела и одказы

• Большой энциклопедический словарь. Главный редактор А. М. Прохоров — Москва: Советская энциклопедия, 1993. — 1630 с. ISBN 5-85270-015-0 русс.
• Serfdom. Encyclopædia Britannica, inc.. August 20, 2019. https://www.britannica.com/topic/serfdom. [перевірено May 25, 2020]. англ.