Dalmatovo

Dalmatovo
Далматово
Lidnanznam;	Flag;
Valdkund	Venäma
Eläjiden lugu (2021)	11,584 ristitud
Pind	25 km²
Telefonkod	+7−35 252-xx-xxx
Avtokod	45
Aigvö	UTC+5 (MSK+2)

Lidnan sijaduz rajonan i agjan kartal vl 2014

Dalmatovo (ven.: Далма́тово) om Venäman lidn Kurganan agjan lodehes. Se om Dalmatovon ümbrikon (edel vn 2022 redukud — rajonan) administrativižeks keskuseks da palaks.

Istorii

Pühä Dalmat Isetilaine pani Emäganpäivän mez'jumalankodin alust vl 1644. Eländpunktan aluz om pandud vl 1651 kuti Služnäi-slabad (ven.: Служняя слобода) jumalankodinno. Vll 1691−1781 oli Nikolajevskoje-žiloks. Se sai lidnan statusad vl 1781 Dalmatov-nimenke. Vll 1924−1947 kadoti lidnan statusad i oli Dalmatovo-žiloks. Vn 1947 7. päiväl kezakud radnikžilo sai lidnan statusad tošti.

Dalmatovo šingotase avtocisternoiden tegimel, sömtegimišton mašiništon tegimel, sömtegimištol (konditerine fabrik, villänpurnud, kombisötken tegim) i tekstil'edheotandal. Sadas uranad lidnan ümbrištos manalaižel mahtusel.

Geografijan andmused

Lidn sijadase Iset'-jogen hural randal (Tobolan hura ližajogi), 100 m ü.m.t. keskmäižel korktusel.

Matkad Kurganhasai om 174 km suvipäivnouzmha orhal, 196 km avtol vai raudtedme. Lähembaine lidn om Kataisk 25 km päivlaskmha kaikil teil.

Tobmuz

Kaik koume pen't küläd mülüiba lidnankundha Dalmatovon ližaks: Üläsuvariš (ven.: Верхний Суварыш, 154 eläjad vl 2010), Lugovai (Луговая, 97 rist.) i Roščino (10 rist.). Lidnankundan pind oli 169,56 km².

Lidnankundan tobmuden pämez' oli sen Administracijan pämez'. Jäl'gmäižed lidnan pämehed oliba Sergei Spicin (Сергей Спицин, sügüz'ku 2019 — semendku 2023) i Jevgenii Volinec (sügüz'ku 2014 — eloku 2019). Lidnan Administracii om likvidacijan pordhal, Sergei Spicin radab sen likvidacižen laudkundan ezimehen vn 2023 semendkuspäi. Lidnan Dum om likvidiruidud vn 2024 sulakus, likvidator oli Sergei Spicin vn 2023 kezakuspäi. Jäl'gmäine Duman ezimez' oli Jurii Oboskalov (reduku 2019 — semendku 2023).

Eläjad

Vn 2010 Venäman rahvahanlugemižen mödhe lidnan eläjiden lugu oli 13 911 ristitud, lidnankundan — 14 172 ristitud, rajonan pol'. Vn 2021 rahvahanlugemižen mödhe lidnan ristitišt oli 11 584 eläjad. Kaik 12 772 ristitud elihe lidnas i 13 020 ristitud kaikes lidnankundas vl 2017. Kaikiš suremb lidnan ristitišt oli 17 494 eläjad vl 1989.

Ortodoksižen hristanuskondan seičeme pühäpertid^[1] oma kaičenus i saudud lidnas: Emäganpäivän mez'jumalankodi (udessündutase vspäi 2011, Pühän Jumalanmaman Emäganpäivän päjumalanpert', kaks' jumalanpertid i kaks' časounäd), kaks' časounäd sen ližaks. Kaks' pühäpertid ei ole kaičenus: Koumen Pühämehiden-moskvalaižiden puine jumalanpert' (oli vspäi 1763) kaumžomal i üks' časoun' jumalankodiš.

Lapsiden opendusen aluzkundad oma severz'-se päivkodid, augotižškol, kaks' keskškolad (nomer 2 i 3), čomamahtoiden škol, lapsiden da norišton sportškol. Kurganan tehnologižen kolledžan filial om lidnan professionaližen opendusen aluzkundaks.

Galerei

Kodirandantedištandmuzei (2018)
Udessündutadud Jumalanmaman «Kaikiden gorähižiden ihastuz»-jumalaižen pühäpert' Dalmatovon jumalankodiš, vn 2015 nägu
Nikol'skii-torguindkeskuz vl 2012
Järgeline pertišt (2012)
Dalmatovon mez'jumalankodin ansambl', vn 2018 nägu