Jemanželinsk

Jemanželinsk
Еманжелинск
Lidnanznam;	Flag;
Valdkund	Venäma
Eläjiden lugu (2023)	27,371 ristitud
Pind	20 km²
Pämez'	Dmitrii Gatov; (kül'mku 2020—)
Telefonkod	+7−35 138-xx-xxx
Avtokod	74, 174
Aigvö	UTC+5 (MSK+2)

Jemanželinsk (ven.: Еманжели́нск, tot.: Яманъелга) om Venäman lidn da lidnankund Čeläbinskan agjan keskuzpalan pohjoižes. Se om Jemanželinskan rajonan administrativine keskuz.

Istorii

Eländpunktan aluz om pandud Jemanželinskije hilenvarad-radnikžiloks (ven.: Еманжелинские угольные копи) vll 1930−1931 samha kivihil't, nimitihe penen jogen mödhe. Žilo sai lidnan statusad vn 1951 25. päiväl sügüz'kud. Vspäi 1997 kaivused oma sauptud.

Jemanželinsk šingotase «Uralec»-minitraktoriden edheotandal^[1], keramižen savičun tegimel, agregatiž-mehanižel tegimel (maižanduztehnikan kohenduz i varapalad), Uralan pirotehnikan tegimel^[2], omblendfabrikal i kombisötken tegimel.

Geografijan andmused

Lidn sijadase rajonan pohjoižpäivnouzmas, 220 m ü.m.t. keskmäižel korktusel. Hutorskoje-järv om lidnan päivnouzmaižes palas. Jemanželink-jogi (bašk.: Яманйылға «huba jogi» 20 km pitte) lankteb stokutomaha Sur' Sarikul'-järvhe, se levitase ühtes kilometras suvipäivnouzmha lidnaspäi (bašk.: Оло Һарыкүл «pakuine järv» 68 km², ende 103 km²).

«Čeläbinsk — Magnitogorsk»-avtote mäneb ühtes kilometras päivlaskmha lidnaspäi. Matkad Čeläbinskan röunhasai om 30 kilometrad pohjoižhe orhal vai avtotedme. Lähembaine lidn om Korkino 15 km pohjoižhe orhal vai avtotedme. Jemanželinsk-raudtestancii om saudud rajonan Zaural'skii-žilos vides kilometras lodeheze lidnaspäi.

Tobmuz

Kaik koume žilod mülüdas lidnankundha Jemanželinskan ližaks: Borisovk (ven.: Борисовка, 709 rist. vl 2010), Klenovk (Кленовка, 103 rist.) i Tajandi-žilo raudtestancijanno (Таянды, 108 rist.). Lidnankundan pind — 64,34 km².

Lidnankundan tobmuden pämez' om sen Administracijan pämez'. Edeline lidnankundan pämez' om Aleksandr Hrulev (keväz'ku 2005 — kül'mku 2020). Lidnan Deputatoiden nevondkundan ezimez' om Dmitrii Gemel' vn 2015 tal'vkuspäi.

Eläjad

Vl 1939 lidnan ristitišt oli 11 100 eläjad. Vn 2010 Venäman rahvahanlugemižen mödhe lidnan eläjiden lugu oli 30 216 ristitud, lidnankundan — 31 136 ristitud. Kaik 29 077 ristitud elihe lidnas i 29 921 ristitud kaikes lidnankundas vl 2017. Kaikiš suremb lidnan ristitišt oli 36 tuhad eläjid vl 1967.

Rahvahad (2010): venälaižed — 87,9 %, totarlaižed — 4,3 %, ukrainalaižed — 2,6 %, baškiralaižed — 1,2 %, saksalaižed — 1,2 %, toižed rahvahad — 2,8 %.

Ortodoksižen hristanuskondan kaks' pühäpertid^[3] oma saudud lidnas: Pühän Jumalanmaman Tulendan Pühäpertihe jumalanpert' (1978), časoun' (2006). Niiden ližaks Sündun Sretenjan sur' jumalanpert' om sauvomas vspäi 2013. Islaman pühäpert' om avaitud vl 2001, medrese om senno vspäi 2006.

Pervomaiskijan sauvondmaterialižtegimišton tehnikuman Jemanželinskan filial^[4] om lidnan professionaližen opendusen aluzkundaks.

Galerei

Suren sodan memorialine kompleks (2010)
Kul'turkeskuz Puškinan nimed, vn 2010 nägu
Lihanümbriradajan «Romkor»-kompanijan tulend vl 2010
Lidnan poliklinikan naižkonsul'tacijan tulend (2014)
Čomamahtoiden škol lapsiden täht Vägestusen skveras (2001)

Homaičendad

Irdkosketused

Lidnankundan oficialine sait (emanjelinsk.ru). (ven.)

Jemanželinsk Vikiaitas

	Čeläbinskan agjan lidnad
	Aš \| Bakal \| Čebarkul' \| Čeläbinsk \| Jemanželinsk \| Jurüzan' \| Karabaš \| Kartali \| Kasli \| Katav-Ivanovsk \| Kištim \| Kopeisk \| Korkino \| Kus \| Magnitogorsk \| Miass \| Min'jar \| Näzepetrovsk \| Ozörsk \| Plast \| Satk \| Sim \| Snežinsk \| Suviural'sk \| Zlatoust \| Troick \| Tröhgornii \| Ust'-Katav \| Üläufalei \| Üläural'sk

[1] «Uralec»-torguindmarkan oficialine sait (уралец.рф). (ven.)

[2] Uralan pirotehnikan tegimen sait (oooupz.ru). (ven.)

[3] Jemanželinskan pühäpertid sobory.ru-saital. (ven.)

[4] Jemanželinskan filial Pervomaiskijan sauvondmaterialižtegimišton tehnikuman p-ptpsm.ru-saital. (ven.)

[1]

[2]

[3]

[4]