Safonovo (lidn)

Safonovo
Сафоново
	Lidnanznam;
Valdkund	Venäma
Eläjiden lugu (2024)	37,055 ristitud
Pind	29,58 km²
Pämez'	Svetlana Šapovalova; (sügüz'ku 2016—)
Telefonkod	+7−48 142-xx-xxx
Avtokod	67
Aigvö	UTC+3 (MSK+0)

Safonovo (ven.: Сафо́ново) om Venäman lidn, lidnankund da transporttesol'm Smolenskan agjan keskuzpalas. Se om agjan videnz' lidn eläjiden lugun mödhe, Safonovon rajonan administrativine keskuz.

Istorii

Eländpunktan aluz om pandud vl 1859 kuti Dorogobuž-raudtestancii da žilo senno udel «Moskv — Smolensk»-raudtel, radaškanzi vl 1870. Nimitihe stancijad lähembaižen lidnan mödhe. Kätihe žilod Safonovon rajonan keskuseks vl 1929, hot' volostin enzne Safonovo-külä sijazihe kümnes kilometras stancijaspäi. Nimituz libub hristanuskondan kalendarin Sofonii-nimespäi. Žilo stancijanno sai radnikžilon statusad vn 1938 7. päiväl redukud, nimitihe nügüdläižikš, raudtestancijad-ki. Šingotihe vll 1948−1960 kuti buran hilen samižen keskuz. Safonovo om lidnan statusanke vn 1952 sulakun 8. päiväspäi.

Safonovo šingotase plastikmaterialiden da plastmasstegesiden kudel edheotandal, mašinansauvomižel (elektrolikutimiden da generatoriden tegim^[1], ühthekeitandapparatad, katilmašiništ), sauvondmaterialiden pästandal (raudbetontegesed, savič, asfal't, mecanümbriradmižen tegim, mobiližed pertid), sömtegimištol (lihan i leibän edheotandad).

Geografijan andmused

Lidn sijadase rajonan suves, Vopec-jogen randoil (ven.: Вопе́ц 74 km pitte, Dnepran üläjoksmusen oiged ližajogi), 213 m ü.m.t. keskmäižel korktusel.

Matkad Smolenskhasai om 83 km päivlaskmha-suvipäivlaskmha orhal, 97 km avtotel vai raudtel. Toižed lähembaižed lidnad oma Jarcevo 35 km päivlaskmha orhal, 39 km avtotedme vai raudtedme, i Dorogobuž 22 km suvhe orhal vai 24 km avtotedme. «Smolensk — Moskv»-avtote mäneb lidnan pohjoižes i pohjoižröunaks. «Smolensk — Moskv»-raudtekeskust läbitab lidnad.

Tobmuz

Safonovo om lidnankundan üks'jäižeks eländpunktaks. Lidnankundan pind — 29,58 nellikkilometrad.

Lidnankundan pämez' om sen nevondkundan ezimez'.

Eläjad

Vl 1939 lidnan ristitišt oli 3 589 eläjad. Vn 2010 Venäman rahvahanlugemižen mödhe lidnan eläjiden lugu oli 43 500 ristitud, rajonan koume nelländest, vn 2021 — 38 403 ristitud. Kaik 42 707 eläjad oli lidnas vl 2017. Kaikiš suremb lidnan ristitišt oli 53..56 tuhad eläjid vll 1976−1998 (56 571 rist. vl 1989).

Rahvahad (2002): venälaižed — 94,0 %, vaugedvenälaižed — 1,3 %, ukrainalaižed — 1,1 %, toižed rahvahad — 3,6 %.

Rahvahad (enamba 0,4 % vl 2021): venälaižed — 80,9 %, čiganalaižed — 0,5 %, toižed rahvahad — 2,5 %, rahvahuden ozutandata — 16,1 %.

Ortodoksižen hristanuskondan viž jumalanpertid^[2] oma kaičenus i saudud lidnas. Protestantizman koume pühäpertid oma avaitud.

Lapsiden opendusen aluzkundad oma severz'-se päivkodid, keskškolad. Safonovon industrialiž-tehnologine tehnikum^[3], privatine Turizman, menedžmentan da informacižtehnologijoiden tehnikum (om reorganizacijan pordhal vn 2024 kül'mkuspäi) i valdkundaližen Smolenskan profopendusen akademijan Safonovon filial^[4] oma lidnan professionaližen opendusen aluzkundoikš.

Galerei

Raštvoiden jumalanpert', vn 2015 nägu
«Avangard»-tedotehmižkompleksan ofis (2011, plastik i kompozitmaterialad)
Lidnan kul'turkeskuz (2005)
Lidnan avtobusstancii vl 2008 vai sen aigemba
Safonovo-päraudtestancijan sauvuz vl 2015

Homaičendad

Irdkosketused

Safonovo (lidn) Vikiaitas

	Smolenskan agjan lidnad
	Demidov \| Desnogorsk \| Dorogobuž \| Duhovščin \| Gagarin \| Jarcevo \| Jel'n' \| Počinok \| Roslavl' \| Rudn' \| Safonovo \| Sičovk \| Smolensk \| Veliž \| Väz'm

[1] Safonovon elektromašinansauvomižen tegim ruselprom.ru-saital. (ven.)

[2] Safonovon pühäpertid sobory.ru-saital. (ven.)

[3] Safonovon industrialiž-tehnologižen tehnikuman sait (safonovo-industr-tehn-tehnikum.ru). (ven.)

[4] Smolenskan profopendusen akademii, Safonovon filialan sait (ssmolapo.ru). (ven.)

[1]

[2]

[3]

[4]