Civetkatachtign

Dat artikel es geschreevn in 't Noordelik West-Vlams.

---

Civetkatachtign
Taxonomische indêlienge
Ryk: Animalia (Bêest'n) Stamme: Chordata (Chordabêest'n) Klasse: Mammalia (Zoogbêest'n) Orde: Carnivora (Roofbêest'n) Ounderorde: Feliformia (Katachtign)
Familie
Viverridae Gray, 1821

De civetkatachtign (Viverridae) vormn e familie van klêene toet middelgrôte zoogbêest'n in d' orde van de roofbêest'n. 't Zyn de mêest primitieve van al de families van de Feliformia.

Z' hèn e lankwerpig, lenig lyf, klêene ôorn, korte pôot'n, e lange steirt met hoar ip en e gestriepte of gevlekte vacht, moa der zyn ook sôort'n in 'n efn kleur. Hunder snute is langer of da van de katachtign (Felidae). Hunder klauwers kunn z' intrek'n.

Civetkatachtign zyn over 't algemêen nachtbêest'n en sloap'n overdag in boomholtes of goat'n in de groend. Vele sôort'n zyn goeie klemmers en leevn mêestal in boomn. De mêeste leevn solitair en hèn allêne moa contact met andere binst de poartyd.

Z' hèn anoale kliern die e straf riëk'nde stoffe kunn speit'n, woarmee dan z' hunder territorium markeern of vyand'n verjoagn. Die stoffe wordt deur de mens gebruukt in parfums en de farmaceutische industrië.

Civetkatachtign leevn in Zuud- en Zuudôost-Azië, van Indië via Zuud-China toet Indonesië en de Filipynn. Ze zyn ook te viend'n in hêel Afrika en 't Arabisch schiereiland. Êen sôorte, de genetkatte, komt ook vôorn in Zuudwest-Europa. Ze leevn surtout in busschn.

Oenderfamilies en geslacht'n

• Oenderfamilie Viverrinae (civetkat'n)
  • Civettictis: Afrikoansche civetkatte (Civettictis civetta)
  • Viverra (Aziatische civetkat'n): 4 sôort'n
  • Viverricula: Klêene Indische civetkatte (Viverricula indica)
• Oenderfamilie Genettinae (Genetachtign)
  • Genetta (Genetkat'n): 15 sôort'n
  • Poiana (Afrikoansche linsangs): 2 sôort'n
• Oenderfamilie Paradoxurinae (Palmrollers)
  • Arctictis: Bintoerong (Arctictis binturong)
  • Arctogalidia: Driestrepige palmroller (Arctogalidia trivirgata)
  • Macrogalidia: Celebespalmroller (Macrogalidia musschenbroekii)
  • Paguma: Gemasscherde palmroller (Paguma larvata)
  • Paradoxurus: Moesangs: 5 sôort'n
• Oenderfamilie Hemigalinae
  • Chrotogale: Palmroller van Owston (Chrotogale owstoni)
  • Cynogale: Ottercivetkatte (Cynogale bennettii)
  • Diplogale: Civetkatte van Hose (Diplogale hosei)
  • Hemigalus: Bandcivetkatte (Hemigalus derbyanus)

Ofbeeldiengn die ier by passn ku je vien in de categorie Viverridae van Wikimedia Commons.