't Manx (Gaelg of Gailck) ook Manx-Gaelisch, historisch ook Manks gespeld, is e Keltische, Goidelische toale die deur e dêel menschn gesprookn wierd ip 't Eyland Man os êeste toale, moa die uutgestorvn is by de dôod van de latste spreker Ned Maddrell in 1974. Toch is de toale nôois hêlegans uut gebruuk gerakt. Manx is nog assan e belangryk dêel van de cultuur en 't erfgoed van 't eyland.
In 2009 is 't Manx uutgestorvn verkloard deur den UNESCO-Weireldatlas van Bedreygde Toaln (UNESCO's Atlas of the World's Languages in Danger), moa sedertdien hèn ze da veranderd in "ernstig bedreygd".
Den dag van vandoage is de toale an een heriplevienge bezig. In 2015 woarn der roend de 1.800 menschn die ip verschillige niveaus Manx kostn klappn os twêede toale. Sedert ende 20e êeuwe is Manx ook zichtboarder gekommn ip 't eyland mè wegwyzers, radio-uutzendiengn en der is ook e boasisschole woar da lesse gegeevn wordt in 't Manx: Bunscoill Ghaelgagh. D' heriplevienge wordt vergemakkelykt deurdat de toale goed beschreevn is: den Bybel is byvôorbeeld vertoald gewist in 't Manx in 1775 en der zyn ook audio-ipnoames gemakt van moedertoalsprekers.
