SERMON BUATSAIH DAN

Rev. Fanai Hrangkhuma,. Ph. D.

Mizoram kohhrante hian thusawitu hi kan nei tam khawp mai. Mizoram kohhrante anga
thusawitu nei tam hi khawi kohhranah mah hian an awm ka ring lo. Tualchhung kohhran
tin hian thusawitu engemaw zat kan nei vek a. Heng ho bakah evangelist leh an deputy
speaker te nen, za engemaw zat kan han nei leh nghal a. Chutih rual chuan kan pastorte hi
khawvel pastorte zingah hian thusawi tlem ber an ni hial awm e. Ram dangah chuan pastor
te hian Pathian ni apiang hian thu an sawi a ni. Ṭhenkhat phei chuan vawi 2 an sawi ṭhin.
Mi dangin an sawi ve meuh lo.

Heti taka thusawitu (sermon sawitu) Pathianin min pek lai hian Sermon inbuatsaih dan leh
sawi dan mumal taka zir te hian thu an sawi tam lo leh viau bawk si. Chuvangin mumal
taka sermon chi hrang hrang inbuatsaih dan leh sawi dan hi zirho ta ila ṭangkai pui kan
awm beiseiin tlem azawng inkawhhmuhna ang chauhvin han thai lan ka tum a ni.

Sermon hi chi thum hlawm lian takin ṭhen a ni tlangpui a. Chung chi thumah te chuan
sermon zawng zawng hi a khung len theih deuh vek awm e. Chungte chu Topical sermon
(thupui bik neia sermon), Textual sermon (Bible chang khat emaw aṭanga sermon sawi)
leh Expository sermon (Bible chang sei deuh emaw bung khat hial pawh behchhana
sermon sawi. A sapṭawng hi kan hmang zel tawh mai ang).

PART-I

TOPICAL SERMON.

Topical Sermon chu thupui ruat/thlan sa hmanga thusawi hi a ni a. Hman ni lawka Zoram
pum huapa Online sermon ho kha topical sermon vek a ni a. Thupui chu SIMNA a nih kha.

Topical Sermon ṭhatnate :

1. Subject hrang hrang Biblein a zirtir dan hriatna pawimawh tak a ni. Sawitura kan duh,
entirnan - rinna, thiamchanna, tihdamna, hengte leh subject dang tam tak te Bible-a kan
hmuh dan zirna ṭha tak a ni a. Heta ṭang hian Systematic Theology (Pathian thu zirtirna
mumal tak) kan phawrh chhuak thei a ni. Bible-a ro hlu tak tak haichhuahna a ni a. Hlawk
tak a ni.
2. A ṭhatna dang leh chu ringtu nun ṭhanlenna bul pawimawh tak a ni.

3. Thusawi tur tlakchham a awm lo. Bible hi zir turin a khat ti ila a sual awm lo ve.

Topical Sermon Hlauhawmna te :

Dik taka hmana a ṭhat em em laiin, hlauhawmna awm ve nual mai.

1. Bible sawi ang ni lem lova, a hrula sawi chiam theih a ni a. Zirtirna diklo leh hrisello lo
chhuahna bul a ni fo ṭhin.

2. Thupui thlan bik sawifiah nan, chang khat chauh hman hi a hrisel lova, zirtirna diklo
chhuahna bul a ni fo ṭhin.

3. Tute emaw khen nana thupui thlan a awm thei a. Hei hi chin tawp loh tur a ni.

4. Mahni insawimawina lam thupui, kan lo ṭangkaipui tawh ṭhin, insawi pawimawh nan
hman theih a ni a. Hei hian Pathian thu lam ni lovin keimahni indahsanna, midang tena min
ngaihsanna lam a thlen fo ṭhin.

5. Thupui dangdai lutuk, mi rilru a ni lo lama la peng theitu lam hi thlan loh a ṭha.

Topical Sermon Buatsaih Dan :

1. Thupui thlan hi fimkhur viau tur a ni. Thupui thlan dawna kan rilru hruaitu atan hengte
hi an pawimawh :-

i. Kohhranin kan mamawh ngaihtuah hram tur.

ii. A hun lai boruak nena inmil thupui ngaihtuah chunga thlan a ṭha. Camping zawh hlima
sawi awm te, chhiatna a thlen laia sawiawm te, chutiang zelin.

iii. Kristian thurina pawimawh sawifiah ngai ang chite hi ngaihtuah fo a ṭha.

iv. Kan thupui thlan kha a te lutuk emaw, a lian lutuk emaw tur a ni lo.

2. Thupui kan thlan fel hnu chuan kan thupui thlan kha Zirtirtu hrang hrang - Isua te, Paula
te, Isaia te, Bible ziaktu hrang hrangin an sawi/zirtir dan kha ngun taka zir tur a ni. Entir
nan - SIMNA hi Isaia te, Amosa te, Lal Isua te, Tirhkohten engtinnge an lo sawia, an zirtir
tihte ngun takin zir ila. Inkalh ang deuhte a lo awm chuan inkalh ni lovin awmze dang,
tifiah chiangtu a ni zawk em tihte chhut tur a ni. Heta tan hian Bible zawnawlna
(concordance) a ṭangkai em em a ni. Bible Dictionary pawh a ṭangkai hle bawk. Hmannia
SIMNA thupui sawitute khan an duh dan danin thupui thuhmun kha an han sawi ta kha a ni
a. Thusawi thiam nia hriat thlan chhuah an ni bawk a, an sawi ngaihnawm khawp mai.
Amaherawh chu, thupui ṭhenhran sak an nih loh avangin Simna thu mumal taka Bible
zirtirna erawh kan hriat tam phah em em lo mai awm mang e.

3. Hemi zawhah hian sawi dan tur te, sawichin tur te ngunthluk takin buatsaih leh tur a ni.
Entir nan, Thiamchanna hi thupuiah lo thlang ta ila, hetiang deuh hian zam ta ila :-

i. Thiamchanna awmzia

ii. Tute nge thiamchan ngai? Engvanga thiamchan ngai nge

iii. Tu hmaah nge thiamchan ngai

iv.Tunge thiamchantir

Tihdamna hi thupui lo ni ta se, hetiang deuh hian sawi dan tur a ruahman theih awm e.

i. Tidamtu chu tunge

ii. Engtin nge a tihdam (Bible-a damlo te tihdam dan hmun hrang hranga mi lak chhuah
tur) a ni. Chang hnih khat ngawta kan innghah chuan zirtirna hrisel lo tak kan sawi mai
dawn a ni.

iii. Rinna leh tihdamna.

iv. Tlangkawmna.

Pawimawh em em chu Bible pumpui hian engtinnge tihdamna thu hi a sawi tih hriat chian
kha a ni. Mahni duh dan ang anga sawi hi zirtirna hrisello lo chhuahna bul a ni tih hi hriat
reng tur a ni.

Kohhran leh ringtu mimalin kan hlawkpui em? Zirtirna him lo a awm thei em? Pathian a
chawimawi em?

Ngaithlatute Lal Isua a ngaihsantir nge thusawitu zawk? Bible ngainatna lamah mi a hruai
em? tihte hi inzawh fo a ṭha. Hetianga thupui ka thlana ka sawi hian rinna him lo lamah
ngaithlatute a hruai thei ang em? A ngaihnawm lam nge ka uar a hlawk lam tihte hi kan
ngaihtuah fo tur a ni.
 PART II

TEXTUAL SERMON.

Topical sermon tawitein kan chhuah tawh a. Textual sermon kan chhui leh dawn a, topical
sermon nen invuakthuahna lai a awm a, chuvangin ka sawi tel leh hlek hlek ang.

1. Textual Sermon chu ange ni? :

Bible chang khat emaw chang hnih emaw hmanga sermon hi textual sermon kan tih chu a
ni. Tlem lai deuh aṭang khan Pastor ṭhenkhatin sermon tawi fel tak tak nitinin whatsapp
group ṭhenkhatah an post ṭhin a. Khangkha textual sermon ṭha tak an ni deuh vek a ni.
Sermon thupui pawh changthlan aṭanga chher chhuah tur a ni a. A thupui ṭhensawm pawh
changthlan ami vek a ni tur a ni.

Textual Sermon example :

Johana 3:16 "Pathianin khawvel a hmangaih em em a; chutichuan, a Fapa mal neih

Thupui: Mihringte tana Pathian remruat/thiltum

1. Ruahmantu Pathian.

2. Ruahman tirtu/nawrtu ... A hmangaih em em a.

3. A ruahman saka chu ... khawvel/nangmah

4. A thil ruahman tihhlawhtlinna tur... A Fapa mal neihchhun a pe a.

5. A thil ruahman/tum chu .. boral lohna, chatuan nunna.

6. A taka chantirna ... a ring apiang.

7. A huam chin.. Tupawh.

He Bible chang hi amal pawha sawi tham ni mahse, a context, a hma leh hnunga thu
awmte nen a inmil tur a ni. Tin, a fiah lehzual nan leh Bible zirtirna ang lo deuhva chhui
zau chiamna laka vengtu atan hmun danga Bible chang dang pawh hman tel a tha.
Example dang i lo thlir leh teh ang u. Rom. 12:1-2 "Chutichuan, unaute u, Pathian
khawngaihna avang hian, inthawina nung leh, thianghlim leh, Pathian lawm tlak ni turin,
in taksa chu inhlanah ka ngen a che u; chu chu in rawngbawlna awm reng a ni. He
khawvel dan ang hian awm suh ula; Pathian duhzawng, a ṭha leh, lawm tlak leh, ṭhat
famkim chu in hriatfiah theih nan, in rilru a thara awmin lo danglam zawk tawh rawh u."

Thupui: Pathian duhzawng.

1. I taksa pumhlan rawh

2. Engvangin maw (chutichuan/chuvang chuan).

3. Awmloh dan tur

4. Danglam zawk tur

5. A rah - Pathian remruat, a duhzawng hriat.

Thupui khi changthlan aṭanga lak a ni a. A thupui ṭhendarh pawh changthlan aṭanga siam
vek a ni. Bung hma lama Pathian khawngaihna lo lang tawh hi kan taksa kan hlanna chhan
tur a ni a. Bung 12:3 leh hnulama rawngbawlna chi hrang hranga kan tan ṭheuhva Pathian
remruat hriatna kha kan inpumhlannain a tum chu a ni. Kan thusawi puitu atan leh
tifiahlehzualtu atan chang dang leh thil dang, illustration kan tih neih nual a ṭangkai thei
viau bawk.

2. Textual sermon thatna te:

i. Bible chang hriatfiahna leh hruatthiamna a ni a, Bible ngainatna a thlen thei a ni.

ii. Sermon ngaihthlak a nuamin hriatthiam a awl.

iii. A sawitu tan pawh Pathian thu luhchilhna a ni a, sawifiah pawh a nuamin a awlsam
deuh.

iv. Zirtirna hrisel lo laka vengtu ṭha tak a ni thei.

v. A sawitu lam aiin Pathian thu lamah rilru a hruai duh bik deuh.

3. Textual Sermon hlauhawmna te: Textual sermon hlauhawmna te hi hman dik lohna
avang a ni deuh ber.
i. Changthlan kha a hmalam leh hnulam nena inzawmna nei lo (out of context) ang maia
sawi chiam hian zirtirna him lo a tichhuak duh khawp (Part III-ah entirna tar chhuah ka
tum ang).

ii. Kan tawnhriat nemngheh nan hman hi a awl viau mai a. Chu chuan Bible thu aiin kan
tawnhriat kha a dah pawimawh zawk duh khawp mai a. Chu chuan zirtirna him tawk lovah
mi a hruai duh khawp mai.

iii. No ii ang deuh, danglam deuh si chu kan rilru putsa, thutlukna kan lo neihsa tarmitin
kan changthlan kha kan chhiar duh viau a ni. Entir nan; ṭhenkhat chuan Bible hi dik lo thei
lo, tihsual awm miah lo mitin an chhiar a, ṭhenkhat erawh chuan lehkhabu dang ang bawka
diklo awm ve nual nia pawmin an chhiar thung a. Bible chang engemaw zat an hrilhfiah
dan pawh he an thu tihtluksa hian a kaihruai lo thei lo a ni. Ṭhenkhat chuan Pathian hi
chuan mihringte natna hi a thlen ngai lova, natna zawng zawng hi Setana tih vek nia pawm
sain Bible an chhiar thei thung a. Chung mite Bible hriat thiam dan chuan a kaihruai ta ṭhin
a ni. Hetianga tih hi zirtirna hrisel lo leh himlo lo chhuahna bul a ni thei a ni.

4. Textual Sermon buatsaih dan :

Example tarlan tawh aṭang khian inbuatsaih dan tur chu a lang ruai tawh a. Zau deuh
zawkin sawi tum ta ila.

i. Bible chang sawi tur hi ngun taka chhutin kohhran leh mimal kristian nun tana ṭangkai
tur ngaihtuah hram hram tur a ni.

ii. Bible chang engemawzat, entir nan Thufing ang te hi, a chhehvela thute nena zirkawp
ngai em em lo an awm a. Bible chang tam zawk erawh chu a chhehvela thu te nen zirkawp
ngei ngei tur a ni. Topical sermona sawi tawh ang khian, a chhehvel thu nena inmil lo (out
of context) lutuka sawifiah hi zirtirna hrisello leh himlo lo chhuahna bul a ni fo va, fimkhur
tur a ni, Setana tihdan (method) a ni. Kan changthlanin enge a sawichiah, engtinnge a sawi,
a hma lam chang leh hnulam chang nen enge an inzawmna, tihte ngun takin zir tur a ni.

iii. Changthlan aṭangin thupui, a zirtir pui ber, a zirtir laimu aṭangin thupui chher leh tur a
ni.

iv. Thupui chu changthlan aṭang bawkin ṭhensawm leh tur a ni a. Hetah hian hmun danga
Bible chang pawh hman awm a awm chuan hman hreh vak a ṭul lem lovang.

v. Kan sermon thupui ber chu khanglai huna chhiartute tana ziak a nih avangin, an
hriatthiam dan tur kha chhut ngun fo tur a ni a. Chumi hnuah chuan tunlai hun atana a
awmzia ni thei awm kan chhut leh ang. Entir nan, 1 Thess. 5:26 "Unau zawng zawng te
kha fawh thianghlimin chibai mi buk sak rawh u" Paulan a ti a. Thessalonika mite khan
engtinnge an hriatthiam dan ni ang? Infawh hi chibai an inbukna a ni a. Tunlaiah Bible-in a
sawi avang ringawtin chibai buk nan kan infawp ve kher tur a ni lovang. Hetiang lam hi
Bible-ah a awm nual a. Ngun taka zir a ngai.

vi. Tunlaihun atan enge a awmzia tih chhut a ṭul leh a. Hei hi tunlai nuna lakluhna in a
chhunzawm a ni.

vii. Tlangkawmna fel tak siam a ṭha. Tawifel taka kan thusawi khaikhawmin, a tul dan
anga Pathian hnena inhlanna hun siam pawh a ṭha.

PART III.

EXPOSITORY SERMON

1. Expository sermon chu enge ni? :

Textual sermon nen inang tak a ni. Bible chang hmun hrang hrang aṭanga lakkhawm
behchhana sermon ni lo, hmun khat hlawm deuh emaw bung khat pum emaw aṭanga
thupui leh thupui ṭhen sawm siama thusawi hi a ni. Entir nan Sam 150 aṭang hian i han en
teh ang.

i. Thupui: Pathian chawimawi leh fakna.

a. Thuhmahruai

b. Fakna hmun ch. 1.

c. Fakna chhan ch. 2.

d. Fak dan tur ch. 3-5.

e. Tunge fak ang. ch. 6.

f. Tlangkawmna.

Sermon puitu atan Bible chang hmun hrang ami pawh hman ṭangkai theih a ni.
Thuhmahruaiah hian kan thusawi tur sawihawnna leh rilru lo inbuatsaih lawk nana thu
bengverh takte pawh telh theih a ni ang a. Tlangkawmnaah hian tawi fel takin kan sermon
kha khaikhawmin, inhlan tura sawmna siam hi a pawimawh khawp mai.
2. Expository sermon thatna :

i. Bible thu leh a thuchah hriatthiamna ṭangkai tak a ni.

ii. Bible ngaihnatnaa hruaitu ṭha tak a ni. Hman nia sermon ka ngaihthlak chang thlan chu
Mika 6:8 a ni a. A sermonah erawh Pathian nena thuhnuairawlh taka len dun a ni.
Ṭhahnem a ngai bawk a, a sawi ngaihnawm bawk a. Ngaithlatute pawhin an hlawkna an
sawi liam liam a ni. Kum tam zirtirtu ka lo nih tawhna hian ka thil ngaihthlak dante pawh
min hruaina chin a nei. Zirlaite tiṭhatna leh ṭha lehzuala an tih theihna tur hi kan hnapui
berte zinga mi a ni a. Heti hian ka rilruah a lo awm a. A thusawi hlawk lehzualna tur chu
Mika hunlai thil awmzia tawite talin sawi sela. Bung 6:6 aṭanga sawi tanin sakhaw thiltih
(ritual) tih tam ringawta, nunin a zawm si loh hi Pathian chuan a duh tawk lohziaa
chhunzawmin, Pathianin ṭha a tih leh Lalpan amite a phut chu dik taka tih te, khawngaihna
ngainat leh Pathian nen thuhnuairawlh taka len dun hi a ni a. Chumi zingah chuan a tawp
ber hi tunṭumah chuan sawi uar ka tum a ni, han tidap sela tih kha ka lo rilruk a. Chutianga
a sawi dap kha, miten ngaihnawm an tih loh phah a hnekin a awmzia an hriatthiamna a
tizauvin Bible thu hriatna leh ngainatnaah a hruai zawkin a rinawm.

iii. Thuhriltu tan pawh Bible ngun tak leh chipchiar taka zirna a nih avangin a nun leh
rawngbawl zelnaah a tlo phah ngei a beisei awm. Bible chhiar tam leh zir tam
pawimawhna leh ṭangkaina chu kan hriat ṭheuh kha.

iv. Sermon tur a tlakchham tak tak theih loh. Tihtakzeta ṭawngṭaina leh Bible zirna hian
thuchah thar min pe reng thei a ni. Kut dinglama Bible kenga, kut veilama news paper
kengtu chuan thusawi tur ṭangkai leh ṭha a tlachham ngai lo an ti alawm. Tihtakmeuhva
ṭawngṭaina in chhum hmin bawk ila.

3. Expository sermon ṭhat lohna:

Ṭhat lohna han tihbawng mai pawh nuam ka ti chiah lo, a harsatna tih zawk awm tak a ni e.

i. Ngaithlatute tana ṭangkai, awmze nei (relevance) taka sawifiah a awl lo fo ṭhin.

ii. Inbuatsaih ngun a ngaih avangin hun tam tawk pek a harsa ṭhin.

iii. Mizoram kohhran inenkawl kalhmangah hian expository sermon hman ṭangkai hi thil
awlai a ni lo. Pastor pakhatin kohhran pakhat enkawla, Sunday apianga thusawi ṭhin tan
chuan expository sermon hi a ṭha ber leh ṭangkai bera ngaih a ni. (Sapṭawng thiam tan
Expository sermon ngaihthlak tur tamtak a awm. Kumin Lockdown chhunga expository
sermon ngaithla duh tan youtube-ah kcf newtown tihah hian a tam mai).
4. Expository sermon inbuatsaih dan :

Thusawi tur inbuatsaih hi thlarau lo riauva ngai deuh tlat hi Zofate zingah kan awm nual
ang em? Pathian thu zirna college pakhata sermon sawina, practice preaching tih class-ah
intithlarau mi deuh zirlai pakhat hun a lo thlenga. Zirtirtu leh zirlai dangte chuan an lo
ngaithla ṭhap mai a. A sawi zawh chuan, intithei fahran hian, "Pulpita ka lawn dawn thleng
khan enge ka sawi tur pawh ka la hre lo" a han ti a. Zirtirtu chuan, "A ni tak ang. Pulpit
aṭanga i lo chhuk pawh khan enge sawi i tum tih kha ka man fuh hlei thei lo a ni" a ti e an
tia lawm. Chawplehchilha thuchah Pathianin min pek chang hi a awm ngei mai a.
Amaherawh chu, John R. Motta sawi hi a dik viau ang. "Kan theihtawp kan chhuah
hian Thlarau Thianghlim pawh hian a ṭha berin a thawk ṭhin a ni" (When we do our
best, the Holy Spirit also does His best) a ti a. Kan Pathian hi fel taka thil ti ṭhin a nih
avangin fel taka thil kan tih hi a phut ve a ni (1 Kor. 14:33). Chuvangin thuhriltu te chuan
kan theihtawpa kan thusawi tur inbuatsaih hi kan bat a ni. Engtinnge kan inbuatsaih ang?

i. A zawna hmun khata vawi engemawzat sawi tur kan nih chuan a bu pumpui, entir nan,
Galatia mite hnena Puala lehkhathawn, thlan hi a ṭha berin ka hria. Chuti a nih loh chuan
ṭawngṭaina nen kohhran leh mimal ten an mamawh thlir chunga thlan tur a ni.

ii. Kan changthlan kha ngun taka zir tur a ni. A theite tan vawn hial pawh a ṭha. Mahni
changthlan tak ngial pawh chhiar nal hlei thei lo khawpa an zir bel loh hian ngaithlatute
thinlung a tihnual thei a ni. Kan changthlan chauh ni lo, a bung pumpui leh a hmalam leh
hnulam te pawh ngun taka zir vek a ṭha. A ziak hunlai dinhmun te, a ziaktuin a tum te
pawh a theih chin chin hriat a ṭha. A ziak hunlai chanchin zir nan Bible Dictionary leh
Hrilhfiahna (commentary) te hi rawn fo tur a ni. Mizo ṭawng pawhin kan nei nual tawh a.
Internet aṭangte hian zirtur tam tak a awm.

iii. Kan changthlan ngei aṭang khan thupui kan chher tur a ni a, thupui ṭhendarh pawh kan
changthlan aṭang ngeiin a ni tur a ni.

B. D. ka zirlai khan, kan subject pakhat chu Biblical Preaching tih a ni a. Sermonte lo sawi
ve teuh tawh ka nih avang khan zir vak ngai tawh lo turah ka inngai deuh a ni. Sermon
outline siam turin Bible chang engemaw zat hmun khat ami min han pe a. Phur takin tiṭha
inti viauvin ka han thehlut a. C grade min han pe chu ka lung a awi lo kher mai. A dawt
lehah pawh chuan ka tiṭha chuang lo. C- min pe a. Ka mangang chuan kan zirtirtu chu ka
luh chilh ta tawp mai a. Ka outline chu ka han entir a. "exellent outline" a ti a. "Excellent a
nih te chuan engatinge mark min va pe chhe em em ve" ka han ti a. Ka theihnghilh ngai
tawh loh tur lesson ka zir ta. A ni chuan, "Kan subject hi Biblical preaching a ni a. Bible
chang ka pek aṭang khan thupui i siam ang a. Kha bible chang aṭang vek khan a outline i
siam tur a ni. I outline siam hi bible chang hrang hrang aṭanga i thupui ṭanpuitu tur nia i
ngaihte an ni a. Topical sermon a ni. Biblical preaching kan tih, expository sermon a tling
lo a ni" tiin min hrilhfiah ta a ni.

1 Petera 2:1-10 aṭang hian expository sermon i lo buatsaih dawn teh ang.

Chutichuan tia ṭan a ni. A sawi leh tur hian a hmaa a sawi tawh avanga thiltih tur a sawi a
ni. Bung 1-na ngun taka kan chhiar chuan chhiartute hi chhandamna changa lo lawm em
em tawh, thutaka piangthar tawh an nih a tilang chiang hle a ni (1:3-9, 19, 23). In pianthar
tawh avangin bansan tur leh tih tur in nei - sualna zawng zawng bansan ula, thlarau lam
hnute engmah pawlh loh chu chak rawh u, chu chu in ṭhanna tur a ni (2:1-3). Heihi ringtu
mimal tana sawi niawm tak a ni. Chang 4 aṭang hian ringtu Lal Isua hnena kal khawm tura
sawmna kan hmu a, Chuta lo kal khawmte chu thlarau lam ina rem chhoh an lo ni ta a. Chu
thlarau lam inah chuan thlarau lam inthawina hlan turin puithiam thianghlim an ni theuh
dawn a ni. Chang 8 thleng hian Lal Isua pawimawh em em zia a sawi a. Chang 9-10 ah
hian Isuaa kalkhawmte nihna leh tihtur a sawi a ni.

Ngun taka kan zir hnuah, kan changthlan thupui chu a chiang thei tawh ang. Kohhran indin
dan leh, nihna leh tih tur hi a thupui atana inhmeh ber niin a lang ta a ni.

Thupui kan tihfel hnuah, kan changthlan aṭang vek hian thupui tifiah lehzual turin kan
ṭhensawm leh ang.

1. Kohhran member te ṭhanlenna ch. 1-3.

2. kohhran dinna ch. 4-5.

3. Lal Isua pawimawh ber a ni ch. 6-8.

4. Kohhran nihna ch. 9b-10.

5. Kohhran din chhan/tum ch 9a.

6. Tlangkawmna.

Kan changthlan hnulam hian eng angin nge a chhunzawm, kohhran tihtur a tih hi eng anga
tihpuitlin tur nge tih lam hawi em? tihte pawh zir tel tur a ni a. Ngaithlatu ten chhiar leh zel
an chakna tura tlem azawng han belh hlek kha a pawimawh viau a ni.

Ngun taka inbuatsaih hi kan chanvo, tihtur a ni. Amaherawh chu ṭawngṭaina in a chiah
hneh hle tur a ni a. Thlarau Thianghlim thiltihtheihna lo chuan sermon nung a sawi theih
loh tih hi theihnghilh miah loh tur a ni.