ალფრედ ნორთ უაიტჰედი

ალფრედ ნორთ უაიტჰედი
ინგლ. Alfred North Whitehead
დაბადებაშ თარიღი:	15 ფურთუთა, 1861
დაბადებაშ აბანი:	რამსგეიტი, ინგლისი
ღურაშ თარიღი:	ქირსეთუთა 30, 1947 (86 წანერი)
ღურაშ აბანი:	კემბრიჯი, მასაჩუსეტსი, ააშ
მენოღალობა:	გოართოიანაფილი ომაფე
ომენცარე სფერო:	მათემატიკა, ფილოსოფია
სამუშაშ აბანი :	ლონდონიშ იმპერიული კოლეჯი ჰარვარდიშ უნივერსიტეტი
ალმა-მატერი:	ტრინიტი-კოლეჯი (კემბრიჯი)
ომენცარე ხემანჯღვერი:	ედვარდ რაუსი
ჯოხოშინელი მოგურაფეეფი:	ჩარლზ ჰარტსჰორნი სიუზენ ლანგერი უილარდ ვან ორმან კუაინი ბერტრან რასელი გრეგორი ვლასტოსი
ჯილდოეფი დო პრემიეფი:	ლონდონიშ ომაფე ჯარალუაშ მაკათური (1903)
ხეშმოჭარუა:

ალფრედ ნორთ უაიტჰედი (ინგლ. Alfred North Whitehead; დ. 15 ფურთუთა, 1861, რამსგეიტი, ინგლისი — ღ. 30 ქირსეთუთა, 1947, კემბრიჯი, მასაჩუსეტსი, ააშ) — ინგლისარი მათემატიკოსი დო ფილოსოფოსი, ფილოსოფიური სკოლაშ, პროცესიშ ფილოსოფიაშ ართ-ართი თარი ფიგურა. კარიერაშ დაჭყაფუს, ალფრედ ნორთ უაიტჰედი მოღალენდჷ მათემატიკაშ, ლოგიკაშ დო ფიზიკაშ დარგეფს. უაიტჰედიშ არძაშე უმოსო შინელი მენცარული ნახანდი რე მათემატიკაშ პრინციპეფი (1910–1913), ნამუთ უაიტჰედიქ ჭარუ მუში სტუდენტი ბერტრან რასელიწკჷმა ართო. Principia Mathematica იკოროცხუ XX ოშწანურაშ უდიდაშ დო მონომენტურ ნახანდო მათემატიკური ლოგიკაშ დარგის. 1910-1920-იან წანეფს უაიტჰედიქ მუში ომენცარე ინტერესეფიშ სფერო დოთირუ დო დიჭყჷ მენცარობაშ ფილოსოფიაშ დო მეტაფიზიკაშ რკვიება.

ალფრედ ნორთ უაიტჰედი გურაფულენდჷ მათემატიკას კემბრიჯიშ ტრინიტი-კოლეჯის, სოდეთ თიში ომენცარე ხემანჯღვერი რდჷ ედვარდ რაუსი. გურაფაშ თებაშ უკულ მუშენდჷ ტრინიტი-კოლეჯის, სოდეთ მათემატიკას დო ფიზიკას ოგურუანდჷ. 1910 წანას ტრინიტი-კოლეჯი ქიდიტუ დო ლონდონშა მიდართჷ. 1914 წანაშე უაიტჰედი რდჷ ლონდონიშ იმპერიული კოლეჯიშ პროფესორი. 1918 წანაშე უაიტჰედი რდჷ ლონდონიშ უნივერსიტეტიშ მენცარობაშ ფაკულტეტიშ დეკანი. 1924 წანას 63 წანერ უაიტჰედიქ ოცხოვრებშა დო ომუშებუშა ამერიკაშა გეგნორთჷ. ამერიკას იმუშუ ჰარვარდიშ უნივერსიტეტის, ფილოსოფიაშ პროფესორო. ჰარვარდიშ უნივერსიტეტის მუშობაშ ბორჯის ჭარუ ფილოსოფიური ნახანდი "Science and the Modern World", ნამუთ ფილოსოფოსეფქ კარტეზიანული დუალიზმიშ ალტერნატივათ მირჩქინეს. ალფრედ ნორთ უაიტჰედიქ ჰარვარდიშ უნივერსიტეტის იმუშუ 1937 წანაშა. უკულიან წანეფს მასაჩუსეტსიშ ნოღა კემბრიჯის ცხოვრენდჷ, სოდეთ დოღურჷ 1947 წანაშ 30 ქირსეთუთას, 86 წანერქ. უაიტჰედი რდჷ ლონდონიშ ომაფე ჯარალუაშ მაკათური დო შხვადოშხვა პრემიეფიშ ლაურეატი.

ლიტერატურა

• Victor Lowe, Alfred North Whitehead: The Man and his Work, Vol I (Baltimore: The Johns Hopkins Press, 1985)
• Victor Lowe, Alfred North Whitehead: The Man and his Work, Vol II (Baltimore: The Johns Hopkins Press, 1990)

რესურსეფი ინტერნეტის

• ბიოგრაფიული ფაქტეფი ენციკლოპედია ბრიტანიკას
• ალფრედ ნორთ უაიტჰედი - ნახანდეფი პროექტ „გუტენბერგის“