三皇五帝
三皇五帝[1][2][3][4][5][6]係中國傳說入面，夏朝之前出現嘅八位最出名嘅領袖人物。三皇五帝嘅皇同帝，係講皇天上帝[7][8]，即係話呢啲三皇五帝其實唔係人，而係神，喺古時直情係一個宗教，有儀式去拜。所以史學家都唔會將三皇五帝嘅當係堅嘅歷史，而只當係神話，最多只反映古人嘅文化。
近年對三皇五帝嘅睇法，𩑭向指三皇五帝查實原身係上古方國，唔同部族之關嘅聯盟。有關地點亦逐步有新發現嘅考古遺蹟所支持。三皇五帝可能係將各方國拼合成神話故事。
來源
[編輯]三皇五帝最早嘅文獻記載係《呂氏春秋》，總共出過四次，包括用眾篇：「夫取於眾，此三皇、五帝之所以大立功名也。」貴公篇：「天地大矣，生而弗子，成而弗有，萬物皆被其澤、得其利，而莫知其所由始，此三皇、五帝之德也。」[9]。不過《呂氏春秋》就無講三皇五帝到底係邊三皇五帝。
而喺《孟子》、《荀子》就叫「三王五霸」。例如《孟子》告子下篇：「五霸，三王之罪人也」，《荀子》大略篇：「誥誓不及五帝，盟詛不及三王，交質子不及五伯。 」
不過無論係三皇五帝、三王五霸定五伯，講緊都唔係話真係歷史上嘅人，而係歷史上嘅神話，或者係一啲領袖，因為功績太犀利，而畀人當神。西周之前，皇係講皇天上帝，即係天王、天君，即係天上面嘅神，西周金文《宗周鐘》：「隹皇上帝百神，保余小子。」《尚書‧召誥》：「皇天上帝，改厥元子[10]。」而帝，就係人王嘅稱呼，即係天神喺人間嘅代表，古時有祭祀意義，《春秋緯‧元命包》：「帝者，諦也」，所以喺殷商之後都有以祖先做帝，祖先死咗之後，會入廟奉為帝畀人拜。換句話講帝即係指創立朝代嘅人，或者係一個民族嘅老祖宗。
後來皇同帝都變咗做人間聖王嘅稱呼，好似喺《春秋緯‧運斗樞》就咁講：「皇者，天，天不言，四時行焉，百物生焉，三皇垂拱無為，設言而民不違，道德玄泊，有似皇天，故稱曰皇。」即係話喺人之中，做最大話事嗰個，同皇天做嘅性質好似，所以叫皇，所以喺古人嚟講，皇帝就即係人間聖王，係皇天喺人間嘅代表。
內涵
[編輯]《呂氏春秋》、《孟子》、《荀子》都有提過三皇五帝，但就無話畀人知係邊三皇五帝。對於中國古時好多神話傳說，一直都無話好有系統咁有人寫低，直到漢代先有人寫《緯書》將啲神話傳說編輯好一套，但係《緯書》都無記晒，只係根據嗰陣政治需要，揀啲可以配合儒學冶國理念嘅去記，所以喺之後亦有其他唔同嘅文獻，因為時勢同文化差異，而有其他三皇五帝名單嘅唔同版本。五帝之中以《史記·五帝本紀》版本最多人認同，而三皇就仲未有共識[11]。
三皇
[編輯]關於三皇[12]，有唔同嘅講法：
- 天皇、地皇、泰皇(泰皇即人皇)(《春秋緯》、《史記‧秦始皇本紀》)
- 伏羲、神農、燧人（《尚書大傳》、《禮緯·含文嘉》）
- 伏羲、神農、女媧（《運鬥樞》、《元命苞》）
- 伏羲、神農、祝融（《白虎通義》）
- 伏羲、神農、共工（《通鑒外紀》）
- 伏羲、神農、軒轅（《帝王世紀》）
五帝
[編輯]關於五帝[13]，亦都有各種版本：
- 黃帝、顓頊、帝嚳、堯、舜（《史記·五帝本紀》、《世本》、《大戴記》、《易傳》、《禮記》、《春秋國語》）
- 少昊、顓頊、帝嚳、堯、舜（《白虎通號》、《尚書序》）
- 庖犧（伏羲）、神農、黃帝、堯、舜（《戰國策》）
- 太昊（伏羲）、炎帝、黃帝、少昊、顓頊（《禮記·月令》、《呂氏春秋》、《淮南子》）
- 黃帝、少昊、顓頊、嚳、堯（《資治通鑒外紀》）
始皇帝
[編輯]過咗千幾年後，秦國嘅嬴政統一中原。坊間一直傳言話，佢覺得自己「功過三皇，德兼五帝」，功績好過三皇五帝，所以就同時攞個「皇」字同「帝」字夾埋[14][15]，創造「皇帝」呢個詞，叫自己做「秦始皇帝」（後世簡稱「秦始皇」）[16]，然而咁係錯解。按史記秦始皇本紀，所記如後：
秦王初并天下、令丞相御史曰⋯⋯寡人以眇眇之身、興兵誅暴亂、賴宗廟之靈、六王咸伏其辜、天下大定。今名號不更、無以稱成功、傳後世。其議帝號。 丞相綰、御史大夫劫、廷尉斯等皆曰、昔者五帝地方千里、其外侯服夷服諸侯或朝或否、天子不能制。今陛下興義兵、誅殘賊、平定天下、海內為郡縣、法令由一統、自上古以來未嘗有、五帝所不及。臣等謹與博士議曰、古有天皇、有地皇、有泰皇、泰皇最貴。臣等昧死上尊號、王為泰皇。命為制、令為詔、天子自稱曰朕。王曰、去泰、著皇、采上古帝位號、號曰皇帝。他如議。制曰、可。追尊莊襄王為太上皇。制曰、朕聞太古有號毋謚、中古有號、死而以行為謐。如此、則子議父、臣議君也、甚無謂、朕弗取焉。自今已來、除謚法。朕為始皇帝。後世以計數、二世三世至于萬世、傳之無窮。
由此可知，古有天皇、地皇同泰皇，泰皇至貴。嬴政臣下話尊號泰皇。嬴政話唔要泰字，留皇字，用上古帝號，故此叫皇帝。 故此錯傳「功過三皇 德兼五帝」，皆因唔多清楚秦始皇本紀，以訛傳訛。
史實
[編輯]關於三皇五帝史實問題，多數都認為三皇五帝係神話，其中研究得最詳細係顧頡剛代表嘅古史辯歷史學派，呢派研究過之後認為，三皇五帝喺禹之前，都係宗教神話。嗰陣時古史嘅性質係屬於宗教性，主題都係關於神蹟。一路到春秋戰國嗰陣，發生咗西方歷史學所講嘅神話歷史化運動，嗰陣時因為政治需要而推動天子、天命觀念，原始宗教入面嘅神都變咗做古代帝王，之後再發展成古史傳說。
亦有其他歷史學派認為神話總唔係百份百老作，所以三皇五帝可能真有其人，只係呢啲人因為做過啲好犀利嘅功績，畀人當咗係神咁拜。
另外仲有一派認為，喺無根據之下嘅唯一根據都無辦法要當住係歷史先，所以根據返文獻講嗰套神話嘅時代背景推敲，計出三皇五帝係喺大約10000年前到5000年前嘅事，先係三皇開天時代，之後係五帝闢地時代，當住係中國古代歷史咁睇。
參考
[編輯]- ↑ 三皇五帝 互聯網檔案館嘅歸檔，歸檔日期2005年5月1號，.台灣教育部國語辭典
- ↑ 〈何為三皇五帝〉。原著喺2010年1月31號歸檔。喺2018年12月3號搵到。
- ↑ 三皇五帝CCTV
- ↑ 〈三皇五帝時代斷代研究〉。原著喺2008年4月4號歸檔。喺2007年11月21號搵到。
- ↑ 《中國歷史常識》 P.8 王愷編 ISBN 962-8746-47-2
- ↑ 試析炎黃文化的發祥地 互聯網檔案館嘅歸檔，歸檔日期2016年3月5號，.王先謙《集解》：『黃原作皇，《釋文》本作黃。黃、皇通用，今本作黃。』
- ↑ 詞語「皇天上帝」的解釋 互聯網檔案館嘅歸檔，歸檔日期2008年10月15號，.漢典
- ↑ 〈東方人文主義論——孔子仁學思想新探（二）（塗宗流 劉丹）〉。原著喺2007年8月6號歸檔。喺2018年12月3號搵到。
- ↑ 〈呂氏春秋〉。原著喺2009年3月31號歸檔。喺2018年12月3號搵到。
- ↑ 《尚書·召誥》Wikisource
- ↑ 〈三皇五帝究竟是誰〉。原著喺2007年11月11號歸檔。喺2007年11月21號搵到。
- ↑ 詞語「三皇」的解釋 互聯網檔案館嘅歸檔，歸檔日期2008年12月8號，.漢典
- ↑ 詞語「五帝」的解釋 互聯網檔案館嘅歸檔，歸檔日期2009年5月4號，.漢典]
- ↑ 《中國古代神話》P.108 袁珂著 華夏出版社 ISBN 7-5080-3874-6
- ↑ 秦帝系表[失咗效嘅鏈]
- ↑ 皇帝制度的成立 互聯網檔案館嘅歸檔，歸檔日期2006年4月15號，.(doc file)台北市復興高中八十七學年度鄉土教材常識測驗