九州

  呢篇文講日本四大島之中嘅九州。想搵中國嘅九州嘅話，請睇九州 (中國)。

九州的數據
本島7縣（琉球群島除外）合計
面積	39,807.72km²
總人口	13,231,276人 （2005年3月31日）
人口密度	332.38人／km² （2005年3月31日）

九州

九州地方行政區域圖
（唔包含部分離島同沖繩縣）

九州gau2 zau1（日文：九州／きゅうしゅう ^Kyūshū）係喺日本西南面嘅島，包括九州本島上嘅大分縣、宮崎縣、福岡縣、佐賀縣、長崎縣（含五島列島同埋對馬島）、熊本縣同鹿兒島縣（包含大隅諸島同奄美群島）等 7 個縣同埋外島嘅沖繩縣，人口大概有 1478 萬人（2003年），面積約 44400 平方公里，係日本目前高科技產業嘅主要集散地。

九州本島係日本第三大島，面積 36636 平方公里（2004年），同 35980 平方公里嘅台灣差唔多大，僅次於本州同北海道，比四國大。

地理

位置同範圍

九州位處北緯 30° 至 35° 之間嘅日本群島西南面，九州島北面嘅關門海峽將九州同本州分隔開，而東北面就俾豐予海峽將佢同四國所分隔。

地質面貌

由於成個日本群島位處歐亞大陸板塊同菲律賓板塊之間，呢兩個活躍板塊嘅活動令九州以至全日本嘅地形顯得破碎。九州嘅海岸線曲折多彎，聚集咗唔少零碎嘅島，成個島嘅河大都比較短、多山而少平地；而中部嘅熊本縣更係世界上最大嘅火山口阿蘇火山所在地。

天氣

由於受到海洋嘅氣候調節，除咗九州本島南部嘅鹿兒島縣同屬於外島嘅沖繩縣因緯度較低而形成季風型亞熱帶森林氣候之外，其餘大部分地方都係屬於季風型溫帶闊葉林氣候。全年四季分明，好似鹿兒島縣全年最低溫度係（1月）平均7℃，而最高温度就係（7月）平均27℃。雨量充足，全年平均降雨大約1000 至 2000 毫米。每年8月至10月期間比較容易受到西北太平洋嘅熱帶氣旋侵襲。

史

古代日本人叫九州做「筑紫島」（つくししま）。古代嘅九州可以劃分為9 國，九州呢個名就係咁嚟；呢啲古代嘅省份係：

• 筑前國（即福岡縣）
• 筑後國（即福岡縣）
• 肥前國（即佐賀縣，長崎縣）
• 肥後國（即熊本縣）
• 豐前國（即福岡縣，大分縣）
• 豐後國（即大分縣）
• 日向國（即宫崎縣）
• 大隅國（即鹿兒島縣東部）
• 薩摩國（即鹿兒島縣西部）

1871年明治天皇廢晒呢嘅舊政區，並設立新嘅縣份（睇廢藩置縣）。

經濟

主要嘅農產品有稻米、茶、煙草、甘薯同大豆；絲亦都被廣泛生產。另外九州以種類繁多嘅日本瓷器聞名。重工業主要集中喺北部嘅北九州同大分一帶，主要係化學同金屬加工。

九州最大城市係福岡市，佢係一個港口兼主要嘅重工業中心。北九州市亦係一個工業中心。長崎係島上主要嘅港口。

教育

九州嘅大學包括：久留米大學、九州大學、長崎大學、熊本大學、鹿兒島大學、大分大學、宮崎大學等等。

運動

棒球隊 - 福岡軟銀鷹隊

睇埋

• 屋久島