格呂克斯堡王朝
格呂克斯堡王朝（英文：House of Glücksburg），全名士叻斯域－荷斯地因－森訥堡－格呂克斯堡王朝（德文：Schleswig-Holstein-Sonderburg-Glücksburg；丹麥文：Slesvig-Holsten-Sønderborg-Lyksborg），係一個現存嘅王朝，奧登堡王朝嘅分支。目前家族成員依然掌控住丹麥同埋挪威，歷史上曾經統治過希臘同冰島；而由於愛丁堡公爵菲臘親王都係佢哋嘅成員，所以英國王室都擁有格呂克斯堡王朝血統。
簡史
[編輯]呢個家族嘅名係嚟自德國一個鎮格呂克斯堡（Glücksburg）。格呂克斯堡王朝嘅祖先係奧登堡王朝嘅基斯頓三世。
1564年，國王費特力二世響重申分配士叻斯域－荷斯地因嘅領土嗰陣，決定將一部份分畀王室成員，最後佢畀咗細佬年輕者約翰。約翰嘅後人後嚟開始分家產，其中一個分支係士叻斯域－荷斯地因－森訥堡－碧克家族。
1825年，費特力六世將士叻斯域－荷斯地因－森訥堡－格呂克斯堡家族（年輕者約翰嘅後人之一，響1779年絕家）嘅銜頭分畀士叻斯域－荷斯地因－森訥堡－碧克公爵腓特烈·威廉，腓特烈·威廉因而將家族名統一為士叻斯域－荷斯地因－森訥堡－格呂克斯堡。
1851年，當時丹麥王室淨低兩位男性成員：國王費特力七世、同佢阿叔費迪南王子。由於兩個人都冇仔女，所以當佢哋響無仔女嘅情況下走咗，就根據費特力三世頒發嘅繼承法，畀同時任國王血緣最近嘅女人繼位。本身黑森嘅腓特烈·威廉係最有望嘅繼承人，但因為身份同種族問題，最後響同年放棄繼承權；而丹麥國會就響一年後，宣佈擁立第五順位繼承人露易絲公主個老公、士叻斯域－荷斯地因－森訥堡－碧克公爵腓特烈·威廉個仔基斯頓做丹麥王儲。1863年基斯頓登基做丹麥國王，係基斯頓九世，亦係格呂克斯堡第一位做國王嘅成員。
1863年，基斯頓九世個二仔威廉王子畀人擁立做希臘國王，係佐治一世。去到1973年，上校團宣佈廢咗君主制，希臘格呂克斯堡王朝玩完；最後一任國王係康士坦丁二世。
1905年，費特力八世二仔卡爾王子畀人擁立做挪威國王，稱號係哈康七世，開啟挪威格呂克斯堡王朝。
丹麥國王基斯頓十世響1918年冰島王國成立後曾經畀人擁立做國王，響1944年冰島共和國成立之後就唔再係國王。
1947年希臘王子菲臘同當時英國王儲伊利沙伯結婚，本身佢個姓係士叻斯域－荷斯地因－森訥堡－格呂克斯堡，但佢響入籍英國嗰時決定改用阿媽個姓──「蒙巴頓」；而佢哋後人個姓係「蒙巴頓ー溫莎」。
士叻斯域－荷斯地因－森訥堡－格呂克斯堡公爵
[編輯]
士叻斯域－荷斯地因－森訥堡－格呂克斯堡公爵一開頭其實係格呂克斯堡家族嘅嫡流，因為丹麥國王基斯頓九世就係士叻斯域－荷斯地因－森訥堡－碧克公爵腓特烈·威廉個仔。
1863年，士叻斯域－荷斯地因畀奧地利同埋普魯士佔領，所以佢哋嘅公爵銜頭係名義上嘅。
另外，由於奧登堡王朝響1931年絕家（阿頭亞厘畢走咗，冇仔），要搵個同奧登堡王朝血緣最近嘅男性做奧登堡王朝家族阿頭，所以佢哋搵咗腓特烈·費迪南兼任佢哋阿頭。
現任公爵係基斯托夫；而儲君就係腓特烈·費迪南。
| 樣 | 名 | 在位時期 | 生死 |
|---|---|---|---|
| 腓特烈·威廉 | 1825年ー1831年 | 1785年ー1831年 | |
|
卡爾 | 1831年ー1878年 | 1813年ー1878年 |
|
腓特烈 | 1878年ー1885年 | 1814年ー1885年 |
| 腓特烈·費迪南 | 1885年ー1934年 | 1855年ー1934年 | |
|
威廉·腓特烈 | 1934年ー1965年 | 1891年ー1965年 |
| 彼得 | 1965年ー1980年 | 1922年ー1980年 | |
|
基斯托夫 | 1980年ー | 1949年ー |
丹麥王位
[編輯]
1853年基斯頓成為丹麥王儲；十年後登基做國王，係基斯頓九世，開始丹麥格呂克斯堡王朝。依家嘅君主係瑪嘉烈二世；王儲就係費特力。
| 樣 | 名 | 統治時期 | 生死 |
|---|---|---|---|
|
基斯頓九世 | 1863年ー1906年 | 1818年ー1906年 |
|
費特力八世 | 1906年ー1912年 | 1843年ー1912年 |
|
基斯頓十世 | 1912年ー1947年 | 1870年ー1947年 |
|
費特力九世 | 1947年ー1972年 | 1899年ー1972年 |
|
瑪嘉烈二世 | 1972年ー | 1940年ー |
希臘王位
[編輯]
1863年，基斯頓九世個二仔威廉王子畀希臘國會擁立做希臘國王，係佐治一世，開啟希臘格呂克斯堡王朝。1967年軍方發動政變，希臘王室名存實亡；1973年，上校團宣佈廢咗君主制，再冇希臘國王呢回事。
最後一任希臘國王係康士坦丁二世；而最後一任王儲就係帕夫羅斯。
| 樣 | 名 | 統治時期 | 生死 |
|---|---|---|---|
|
佐治一世 | 1863年ー1913年 | 1845年ー1913年 |
|
康士坦丁一世 | 1913年ー1917年 1920年ー1922年 |
1868年ー1923年 |
|
亞歷山大 | 1917年ー1920年 | 1893年ー1920年 |
|
佐治二世 | 1922年ー1924年 1935年ー1947年 |
1890年ー1947年 |
|
保羅一世 | 1947年ー1964年 | 1901年ー1964年 |
|
康士坦丁二世 | 1964年ー1973年 | 1940年ー2023年 |
挪威王位
[編輯]
1905年，費特力八世二仔卡爾王子畀人擁立做挪威國王，稱號係哈康七世，開啟挪威格呂克斯堡王朝。現任國王係哈拉爾五世；王儲就係哈康。
| 樣 | 名 | 統治時期 | 生死 |
|---|---|---|---|
|
哈康七世 | 1905年ー1957年 | 1872年ー1957年 |
|
奧拉夫五世 | 1957年ー1991年 | 1903年ー1991年 |
|
哈拉爾五世 | 1991年ー | 1937年ー |
冰島王位
[編輯]
1918年冰島王國成立，冰島國會擁立丹麥國王基斯頓十世兼任佢哋嘅國王。去到1944年，冰島共和國成立，所以唔再有冰島國王呢回事。
| 樣 | 名 | 統治時期 | 生死 |
|---|---|---|---|
|
|
基斯頓十世 | 1918年ー1944年 | 1870年ー1947年 |