約櫃
約櫃（希伯來文：אָרוֹן הָבְּרִית）係古代以色列民族嘅聖物，「約」係指上帝同以色列人所訂立嘅契約，而約櫃就係放置咗上帝同以色列人所立嘅契約嘅櫃。呢份契約，就係由先知摩西喺西乃山上從上帝得嚟嘅兩塊十誡石板。
聖經記載
[編輯]關於約櫃嘅尺寸、樣式同裝飾，聖經《出埃及記》裏面有詳細嘅記載：
| 「 | 佢哋要用金合歡木做一個櫃，長二肘半，寬一肘半，高一肘半。你要將裏面外面都包上純金，四圍要鑲上金邊。要鑄造四個金環，安喺櫃嘅四隻腳度；一邊兩個環，另一邊兩個環。要用金合歡木做兩條槓，包上金。要將槓穿過櫃兩邊嘅環，用嚟抬櫃。呢兩條槓要留喺櫃嘅環裏面，唔可以抽出嚟。要將我所要賜畀你嘅法版放喺櫃裏面。要用純金做一個櫃蓋，長二肘半，寬一肘半。要造兩個用金鎚出嘅基路伯，呢邊鎚出一個基路伯，另一邊鎚出一個基路伯；蓋嘅兩邊各有一個。兩個基路伯嘅翼要向上張開，用翼遮住櫃蓋，兩個要面對面；基路伯嘅面要向住櫃蓋。要將櫃蓋安喺櫃嘅上邊，又要將我所要賜畀你嘅法版放喺櫃裏面。我要喺嗰度同你相會，並要從法版嘅櫃嘅櫃蓋上，兩個基路伯嘅中間，將我要吩咐以色列人嘅一切事傳畀你。
|
」 |
——《出埃及記》25章10至22節 | ||
有關約櫃嘅律法
[編輯]當以色列人喺曠野度流浪嘅時候，約櫃一直都放喺會幕嘅至聖所度，直至所羅門王喺耶路撒冷興建聖殿為止。
約櫃係以色列人嘅聖物，象徵著耶和華嘅臨在，根據摩西律法規定，只有作為祭司嘅利未人先至可以抬摃約櫃，但係任何人都唔可以觸碰約櫃。根據《聖經》記載，烏撒喺運送約櫃期間違反上帝嘅律法，擅自觸碰約櫃而被擊殺。
離開聖幕
[編輯]喺撒母耳先知嘅日子，示羅嘅遭遇令到以色列人嘅宗教感情大受打擊。佢哋誤以為神聖嘅約櫃可以拯救佢哋，保護佢哋唔會俾非利士人擊敗。因此佢哋將約櫃從放置喺示羅帳幕嘅至聖所度攞出嚟，由大祭司以利兩個作惡祭司嘅仔，將約櫃帶到戰場上。非利士人同以色列人打仗，但係約櫃唔單止冇保護佢哋，而且因為違反耶和華嘅律法，以色列人被擊敗，有三萬以色列士兵被殺，更加唔好彩嘅係，約櫃落入信奉異教嘅非利士人手中，以利兩個做祭司嘅仔，何弗尼同非尼哈，都係戰場上被殺。當大祭司以利知道上帝嘅約櫃俾人搶走呢個不幸嘅消息之後，佢即刻暈倒頭落地，結果折斷頸骨而死。以色列人繼續受非利士人所壓迫。但係崇拜偶像嘅非利士人後嚟因為飽受災禍打擊，而將約櫃送返以色列嘅境界伯示麥，因此約櫃被送往基列耶琳，象徵耶和華上帝同在嘅約櫃，停喺基列耶琳有二十年咁耐，冇立刻返到示羅嘅神聖帳幕之中。
返到耶路撒冷
[編輯]大概70年以後，大衛嘗試從基列耶琳運送約櫃去耶路撒冷。當時約櫃放喺牛車上，烏撒同佢兄弟帶路。根據聖經記載：「到咗拿艮嘅禾場，因為牛失前蹄，烏撒就伸手扶住上帝嘅約櫃。耶和華嘅怒氣向烏撒發作；上帝因為呢個冒犯喺嗰度擊打佢，佢就死喺約櫃嘅旁邊。」幾個月之後，大衛按照上帝指定嘅方式運送約櫃，由利未族哥轄人扛抬住送到耶路撒冷，呢次一路都順順利利。
約櫃消失
[編輯]耶和華透過耶利米發出警告，佢會對待耶路撒冷好似佢對待一度得享殊榮嘅示羅一樣。因此巴比倫人喺公元前587年將耶路撒冷摧毀。甚至所羅門王所建造有約櫃設喺其中嘅聖殿亦都夷為平地。約櫃本身就消失蹤影。災難臨到示羅之後，非利士人容許以色列人留喺當地。但係喺新巴比倫帝國毀滅咗耶路撒冷同當中嘅聖殿之後，佢哋將大部分劫後餘生嘅猶太人放逐到遙遠嘅巴比倫成為巴比倫之囚。剩低嘅少數猶太人亦最後發生恐慌而逃往埃及。呢件事令到整個猶大地區淪為無人居住。
約櫃嘅下落
[編輯]損毀講法
[編輯]聖經冇提到約櫃嘅去向，好可能喺新巴比倫王國攻佔耶路撒冷之後將佢破壞。但係，公元1世紀嘅猶太歷史學家約瑟夫認為，約櫃喺公元70年猶太戰爭嗰陣，連同聖殿一齊俾羅馬帝國軍隊毀滅。
埃塞俄比亞擁有講法
[編輯]有傳說指有人將約櫃偷運出耶路撒冷，據講而家存放喺埃塞俄比亞阿克蘇姆市嘅聖瑪利教堂。
發現頻道曾經派攝製隊前往埃塞俄比亞，追尋消失咗嘅約櫃，不過當地嘅教士一直都唔肯畀攝製人員去睇。因此，約櫃係咪仍然存在，到今日依然係一個謎。