Natalie Wood
| Natalie Wood | |
| |
Wood in 1979.
| |
| Geboortenaam | Natalia Nicholevna Zacharenko[1] |
|---|---|
| Geboorte | 20 Julie 1938 |
| Sterfte | 29 November 1981 (op 43) |
| Nasionaliteit | Amerikaans |
| Beroep(e) | Aktrise |
| Aktiewe jare | 1943–1981 |
| Rolprente | Rebel Without a Cause, West Side Story, Splendor in the Grass |
| Internet-rolprentdatabasis-profiel | |
Natalie Wood (gebore as Natalia Nicholevna Zacharenko;[1][2] 20 Julie 1938 – 29 November 1981) was ’n Amerikaanse aktrise wat veral bekend was vir haar rolle in Miracle on 34th Street, Splendor in the Grass, Rebel Without a Cause en West Side Story.
Sy het in 1981 tydens die maak van die prent Brainstorm onder onbepaalde omstandighede verdrink.
Loopbaan
[wysig | wysig bron]Wood het as kind in rolprente gespeel en as jong volwassene ’n suksesvolle aktrise geword; sy het drie benoemings vir ’n Oscar gekry voordat sy 25 jaar oud was.
Sy was op vierjarige ouderdom in haar eerste prent, en op agt was sy in die klassieke Kersprent Miracle on 34th Street.[3] As tiener het haar spel in Rebel Without a Cause (1955) haar ’n Oscar-benoeming in die sak gebring. Sy was ook in die musiekprente West Side Story (1961) en Gypsy (1962), en het Oscar-benoemings gekry vir haar spel in Splendor in the Grass (1961) en Love with the Proper Stranger (1963).
Sy het hierna vir ’n ruk nie toneelgespeel nie en het haar kinders in dié tyd grootgemaak. Sy is twee keer met die akteur Robert Wagner getroud en een keer met die vervaardiger Richard Gregson. Sy het by elk ’n dogter gehad.[4]
Wood het in verskeie televisieproduksies gespeel, onder meer die minireeks From Here to Eternity (1979), waarvoor sy ’n Golden Globe gewen het.
Verdrinking
[wysig | wysig bron]
Tydens die maak van haar laaste rolprent, Brainstorm, het Wood verdrink terwyl sy saam met Wagner en haar medester in Brainstorm Christopher Walken op ’n naweekvaart na Santa Catalina-eiland, Kalifornië, was. Baie feite oor haar dood is onbekend omdat niemand erken het dat hulle haar net voor haar dood gesien het nie. Wood se lyk is op die oggend van 29 November 1981 ’n ent van die boot af gekry. Volgens Wagner was Wood nie in hul bed toe hy gaan slaap het nie.[5] Die lykskouingsverslag het gemeld Wood het kneusmerke aan haar lyf en arms gehad, sowel as ’n skaafwond aan haar linkerwang.[6]
Later, in sy boek Pieces of My Heart, het Wagner erken hulle het ’n rusie gehad voor sy verdwyn het.[6] Volgens die lykskouingsverslag was Wood se alkoholinhoud 0,14% en spore van twee soorte medikasie is in haar bloed gevind: ’n pil teen bewegingsiekte en ’n pynpil wat die uitwerking van alkohol verhoog.[7] Daar is bevind haar dood was ’n ongeluk;[8] sy het waarskynlik gegly en in die water geval.[6]
Die saak is in November 2011 heropen nadat die kaptein van die boot, Dennis Davern, in die openbaar gesê het hy het tydens die nadoodse ondersoek vir die polisie gejok en dat die paartjie die aand baklei het; hy het beweer Wagner was vir haar dood verantwoordelik.[6][9][10]
Ná ’n ondersoek van nege maande het die mediese hoofondersoeker van Los Angeles die doodsertifikaat aangepas van "verdrinking deur ’n ongeluk" tot "verdrinking en ander onbepaalde faktore".[11] Die aangepaste dokument sluit ’n verklaring in dat die omstandighede waaronder Wood in die water beland het, "nie duidelik vasgestel is nie". Speuders het die lykskouerskantoor opdrag gegee om nie die saak te bespreek of kommentaar te lewer nie.[11]
Wagner het enige aandeel in Wood se dood ontken.[12]
Verwysings
[wysig | wysig bron]- ↑ 1,0 1,1 Natalie Wood se geboortenaam, californiabirthindex.org; besoek op 24 Junie 2015.
- ↑ Wrathall, John; Molloy, Mick (2006). Movie Idols. New York, New York: Sterling Publishing. ISBN 978-1-4027-3674-2. Besoek op 11 Maart 2014.
{{cite book}}: AS1-onderhoud: url-status (link) - ↑ Wilkins, Barbara (13 Desember 1976). "Second Time's the Charm – Marriage, Natalie Wood, Robert Wagner". People. 6 (24). Geargiveer vanaf die oorspronklike op 21 April 2016. Besoek op 11 Maart 2010.
- ↑ "Lana Wood Filmography" (in Engels). Internet Movie Database. Geargiveer vanaf die oorspronklike op 15 Maart 2016. Besoek op 22 Julie 2015.
- ↑ Winton, Richard (9 Julie 2012). "Natalie Wood death probe yields more unanswered questions" (in Engels). Los Angeles Times. Geargiveer vanaf die oorspronklike op 20 Mei 2020.
- ↑ 6,0 6,1 6,2 6,3 "Natalie Wood's death certificate amended". BBC News (in Engels). 22 Augustus 2012. Geargiveer vanaf die oorspronklike op 22 Mei 2019. Besoek op 22 Augustus 2012.
- ↑ Finstad 2001, p. 433.
- ↑ Noguchi & DiMona 1983.
- ↑ "Captain: Wagner responsible for Natalie Wood death" (in Engels). TODAY.com. 18 November 2011. Geargiveer vanaf die oorspronklike op 29 November 2014. Besoek op 23 Mei 2014.
- ↑ "Natalie Wood Death: New Audio Recordings Indicate Robert Wagner's Involvement". The Huffington Post. 14 September 2012. Besoek op 17 September 2012.
- ↑ 11,0 11,1 McCartney, Anthony (21 Augustus 2012). "Authorities amend Natalie Wood's death certificate". Associated Press (in Engels). Geargiveer vanaf die oorspronklike op 25 Mei 2019. Besoek op 22 Augustus 2012.
- ↑ "Shocking New Theory In Natalie Wood Death -- Who REALLY Killed Her". Radar Online (in Engels). Radar Online, LLC. Geargiveer vanaf die oorspronklike op 23 November 2017. Besoek op 3 Januarie 2016.
Eksterne skakels
[wysig | wysig bron]- Natalie Wood in die Internet-rolprentdatabasis
- Natalie Wood by Who2
Wikimedia Commons het meer media in die kategorie Natalie Wood.
Hierdie artikel is vertaal uit die Engelse Wikipedia
Normdata  |
|
|---|