Pé (anatomía)

Para outras páxinas con títulos homónimos véxase: Pé.

En anatomía, o pé é unha estrutura biolóxica utilizada para a locomoción que se atopa en moitos animais. As súas características varían dun animal a outro.

Nos animais vertebrados, o pé é unha das estruturas máis complexas do corpo, con numerosos ósos, músculos e outros tecidos conectivos.

O pé humano

O pé está dividido en tres partes:

• Tarso, con 7 ósos.
  • Calcáneo
  • Astrágalo
  • Escafoide ou Navicular
  • Cuboide
  • Cuñas (x3)
• Metatarso, con 5 ósos.
• Falanxes, con 14 ósos.

• Falanxe proximal ou falanxe (x5)
• Falanxe media ou falanxina (x5)
• Falanxe distal ou falanxeta (x4; o dedo gordo só ten 2 falanxes)

O podólogo é o especialista do pé e ocúpase das patoloxías desta zona do corpo.

Tipos de pé no ser humano

Vista lateral interna do pé humano nunha reconstrución 3D.

Un pé humano - 1 Noelo
2 Calcañar
3 Tarso
4 Metatarso
5 Dedas

Distínguense tres tipos:

• Pé grego: así chamado porque se observa nas estatuas da época clásica: a segunda deda é a máis longa despois da deda gorda, e a terceira practicamente mide o mesmo, e a cuarta e a quinta dedas son máis pequenas. Neste tipo de pé as cargas distribúense mellor sobre a parte dianteira do pé.
• Pé polinesio ou cadrado: como o que se observa nos cadros de Gauguin: as dedas son case todas iguais e están á mesma altura.
• Pé exipcio: visible nas estatuas dos faraóns: a deda gorda é a máis longa e as outras séguenlle por tamaño e orde decrecentes. É o tipo de pé máis exposto, xa que se sobrecarga máis co calzado e predispón a xoanetes (hallux valgus) e á artrose metatarsofalánxicas (hallux rígidus).

Pés nos animais

Pezuños de cabalo

As características dos pés varían dun animal a outro. Moitos vertebrados que teñen pernas tamén posúen pés situados no seu extremo inferior. Para estes animais, o pé é unha complexa estrutura de ósos, músculos e outros tecidos conectivos.

O pé que máis se acerca ao do pé humano na escala animal é o dos mamíferos, pero é menos ancho e menos longo e forma máis saliente por detrás (excepto os cuadrúmanos e os mamíferos mariños). Entre os carnívoros, os osos e outros animais semellantes teñen a planta do pé particularmente desenvolvida, que é de onde vén a antiga distinción entre animais plantígrados e dixitígrados

Nos animais esencialmente andadores ou que deben soportar unha masa considerábel, os dedos diminúen en número e lonxitude. Así vemos que:

• os pés do cabalo están formados por un único dedo chamado pezuño
• os ruminantes posúen catro dedos pero só apoian dos no chan
• o elefante ten cinco pero moi curtos

Nas aves, a metade do tarso está soldada coa tibia e a outra co metatarso. Estes animais soamente apoian no chan as falanxes.

Véxase tamén

Outros artigos

• Podólogo.
• Podoloxía.

Ligazóns externas

• Colexio Oficial de Podólogos de Galicia
• Facultade de enfermaría e podoloxía. UDC
• Coidados básicos do pé