Cartuli (lingua)
Cartuli (ქართული ენა, kartuli ena), ance nomida "jorjian", es un de la linguas caucasian sude parlada par la plu de popla de Sacartvelo (o Jorjia), do lo es la lingua ofisial. Lo es scriveda en sua propre sistem de scrive, la alfabeta cartuli.
Cartuli es la lingua de leteratur per tota sugrupos rejional de Sacartvelo, incluinte los ce parla la otra linguas relatada cual inclui svan e magrali (parlada xef en Sacartvelo norde-ueste), e laz (parlada longo la costa turces de la mar Negra, prosima a Sacartvelo).
Cartuli como un lingua unica ia comensa en la milenio prima aec en la area nomida alora la Rena de Iberia. La refere prima a la lingua es posible un nota par la linguiste roman Marco Cornelio Fronto e la sentenio du. Fronto ia imajina la iberianes parlante a la imperor Marco Aurelio en sua "lingua noncomprendable".
La evolui de cartuli a un lingua scriveda ia es un resulta de la converti de la elite de Sacartvelo a cristianisme en la sentenio cuatro media. La lingua de leteratur ia es construida sur un strutur cultural bon fundida par arami, la lingua de leteratur de Sacartvelo pagan, e la relijion nasional nova. La testos prima en cartuli ia es enscrives e suprascrives de la sentenio sinco. La obra la plu vea es "la martiria de la rena santa Shushanik" (წამებაჲ წმიდისა შუშანიკისი დედოფლისაჲ) par Iakob Tsurtaveli.
Cartuli ia es scriveda en sistemes de scrive variosa tra sua istoria. Aora, la Mkhedruli o scrive militar es cuasi tota dominante. Otras es usada xef en testos relijiosa e en arciteta. Lo ave 33 leteras comun usada, e sirca ses plu cual es desusada, ma ancora usada en svan, mangrali, e laz.
Cartuli es un lingua cual rami a sinistra, pd ajetivos presede nomes, posesores presede poseseda, ojetos tipal presede verbos, e posponedas es usada en loca de preposadas. El es ance un lingua aglutinante, pd un lingua cual pote ajunta multe prefisas e sufisas a un radis per dona detalias de sinifia.
Un esemplo de aglutina es en la verbos. En alga casos, on pote ave an oto morfemes diferente en un verbo a la mesma ves. Un esemplo es ageshenebinat ("vos ia construi ja"), cual pote es divideda entre oto partes: a-g-e-shen-eb-in-a-t. Cada morfem asi contribui a la sinifia de la tempo, modo, o aspeta o de la persones ci ia ata o la cosa cual es afetada (un forma nomida "polipersonalisme").
Cartuli ave sete casos de nomes: nominativa, ergativa, dativa, jenitiva, strumental, averbial, e vocativa. En la tempo pasada de verbos transitiva, e en la tempo presente de la verbo "sabe", la sujeto es en la caso ergativa en loca de la nominativa.
Cartuli usa un sistem de numeros fundida sur 20, como en euscara o franses. Per espresa 93, per esemplo, on dise ოთხმოცდაცამეტი - otkh-m-ots-da-tsamet'i, leteral, 4∙20+13.