Bulgaria

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Republica de Bulgaria Република България Republika Balgariya
(En detalle) (En detalle)
Lema nacional: Съединението прави силата (bulgaro; «A unión fa la fuerza»)
Himno nacional: Mila Rodino
Situación de Bulgaria
Capital  • Población  • Coordenatas	Sofiya 1.328.790 (2020) 42°42' N 23°20' E
Mayor ciudat	Sofiya
Idiomas oficials	Bulgaro
Forma de gubierno President Primer ministro	Republica Rumen Radev (Румен Радев) Dimitar Glavchev (Димитър Главчев)
Independencia  • Declarada  • Reconoixida	de l'Imperio Otomano 3 de marzo de 1878 22 de setiembre de 1908
Superficie  • Total  • % augua Mugas Costas	Posición 102º 110.910 km² 0,3 1.808 km 354 km
Población  • Total  • Densidat	Posición 89º 7.112.154 (2020) 67.9 hab/km²
PIB (PPA)  • Total (2019)  • PIB per capita	Posición 65º EUR€ 61.239.423.600 EUR€ 8.748
Moneda	Lev (BGN)
Chentilicio	Bulgaro/a
Zona horaria  • en Verano	EET (UTC+2) EEST (UTC+3)
Dominio d'Internet	.bg
Codigo telefonico	+359
Prefixo radiofonico	LZA-LZZ
Codigo ISO	100 / BGR / BG
Miembro de: UE, OTAN, ONU, OSCE

A Republica de Bulgaria ye un país europeu situau en os Balcans, muga a lo norte con Rumanía, a lo sud con Grecia y Turquía y a l'ueste con Serbia y Montenegro y con Macedonya d'o Norte. A suya capital ye Sofiya.

Población

A suya población ye de 7.537.929 habitants (2003) en una superficie de 110.910 km², con una densidat de población de 67,9 hab/km².

Población por etnias y nacionalidaz

En 1991 s'estimaba que de 8.989.000 habitants de Bulgaria 8.200.000 yeran bulgaros etnicos, (pero os zingaros no se censaban a parte y en podeban estar-ne uns 150.000), y 700.000 turcos rumelís. Entre 100.000 y 200.000 son bulgaros musulmans u pomacos.

Cheografía

Provincias y municipios

Dende 1987 dica 1999 Bulgaria yera formada por 9 provincias (oblasti, en singular oblast); dende 1999, tien 28 provincias. Istas provincias son:

Vidina Blagoevgrad Burgas Dobrich Gabrovo Haskovo Kardzhali Kyustendil Lovech Montana Pazardzhik Pernik Pleven Plovdiv Razgrad

Rousse Shumen Silistra Sliven Smolyan Sofiya Sofiya (provincia) Stara Zagora Targovishte Varna Veliko Tarnovo Vratsa Yambol

Istas provincias tienen 264 municipios.

Prencipals localidaz

Posición	Ciudat	Población	Posición	Ciudat	Población
1.	Sofiya	1.393.565	9.	Dobrich	103.309
2.	Plovdiv	379.119	10.	Shumen	89.613
3.	Varna	352.211	11.	Pernik	81.191
4.	Burgas	203.797	12.	Haskovo	76.397
5.	Russe	167.715	13.	Yambol	74.132
6.	Stara Zagora	152.619	14.	Pazardzhik	71.979
7.	Pleven	122.989	15.	Blagoevgrad	70.881
8.	Sliven	104.304	16.	Veliko Tarnovo	68.783

Historia

Encara que en o territorio de l'actual Bulgaria ya se i troban chacimientos arqueolochicos en o Paleolitico Meyo y en o Neolitico, no ye so que arredol d'o 3000 aC que i plegoron os primers pobladors indoeuropeus, los tracios, reconoixius por a suya habilidat con a metalurchia y en estar expertos chinetz. Tanimientres, no formoron garra unidat politica organizada dica que entroron en contacto con os griegos que heban prencipiau a establir colonias con finalidaz comercials en as costas d'a mar Negra y que plegó en a rechión l'Imperio Aquemenida. Alavez establioron en o sieglo V aC lo Reino odrysio, que en o dende 320 aC teneba la suya capital en Seutopolis.

Dende lo sieglo IV aC, con Filipo II de Macedonya lo Reino de Macedonya s'expandió enta lo norte, en apropiando-se d'os territorios tracios, dica lo punto que parte substancial d'as tropas con as que Aleixandre lo Gran redotó a l'Imperio Aquemenida y plegó dica la India estioron tracios.

Dende lo sieglo III aC a Republica romana prencipió a suya expansión por os Balcans, rematando la suya conquiesta total en o sieglo I dC, encara que mantenioron bel tiempo un chicot reino tracio. La luenga d'os tracios, lo tracio, encara sobrevivió dica lo sieglo V en bels puestos. En dividir-se l'Imperio Romano entre Honorio (qui recibió l'Imperio Romano d'Occident) y Arcadio (qui recibió l'Imperio Romano d'Orient, clamau Imperio Bizantín), os territorios de l'actual Bulgaria quedoron incorporaus a iste zaguero.

Etnochenesi d'os bulgaros

Os protobulgaros d'o baixo Danubio yeran un pueblo de luenga turquica que as fuents contemporanias denominaban "bulgaros". Os protobulgaros yeran aliaus d'unas tribus eslavas y s'heban feito con o control de territorios de l'Imperio Romano d'Orient entre a Cordelera d'os Balcans y o Danubio. Ixe territorio, a lo norte d'a linia Jirecek yera habitau por poblacions romanizadas de luenga latina, que ya en l'alta Edat Meya serán conoixius como vlacos, que tamién irán eslavizando-se y serán cada vegada mes ixemenaus por os balcans.

En Tracia os chacimientos eslaus mes antigos se pareixen a los d'a cultura de Hlincea I (cultura documentada en l'actual territorio de Rumanía entre a segunda metat d'o sieglo VII y lo sieglo IX), y pareix coincidir con o naiximiento d'o primer estau bulgaro en a segunda metat d'o sieglo VII.

Os protobulgaros encomenzoron a eslavizar-se y fusionar-sen con os eslaus cuan arredol de l'anyo 865 o rei Boris I se convirtió a lo cristianismo. A lo principio os bulgaros cristianos yeran aliniaus con Roma, pero Boris decidió aliniar-se con Costantinoble porque o papa de Roma no permitiba que hi hese en Bulgaria una seu metropolitana. Climent y Nahún, disciplos de Cirilo y Metodio, introducioron a liturchia en eslau eclesiastico y l'alfabeto glacolitico, y d'esta traza prenió importancia a luenga y cultura d'os eslaus, mes lumerosos en a zona, debant d'a luenga y cultura d'os bulgaros de luenga turquica. En o sieglo vinient se constituyó una ilesia autonoma con o suyo patriarca.

Primer Imperio Bulgaro

Ta más detalles, veyer l'articlo Primer Imperio Bulgaroveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

O fillo de Boris I, Simeón, fue coronau Basileus en l'anyo 913, prenendo o títol de zar, y en 926 traslada a capital ta Preslav, no guaire luent de Pliska. Este imperio bulgaro plegaba dica as actuals Serbia, Macedonya y Albania y ye conoixiu por os historiadors como primer Imperio Bulgaro. Bi habió un gran desembolique artistico y literario, y a cultura bizantina s'ixemenaba por o mundo eslau.

D'alcuerdo con bella fuent l'emperador bizantín León VI o Sabio, en guerra contra a poderosa Bulgaria de Simeón clamó a los hongaros pa creyar-lis a los bulgaros un frent a la suya espalda. Os bulgaros reaccionoron clamando a los pazinacos pa que atacasen por a espalda a los hongaros. O resultau estió que os hongaros habioron d'abandonar as tierras que alavez ocupaban en Ucraína occidental y Moldavia y establir-sen en Panonia. Os pazinacos ocuporon o puesto d'os hongaros en Ucraína y Moldavia. O Imperio Bulgaro perdió o control d'os países vlacos y eslaus d'o norte d'o Danubio, (d'alto u baixo l'actual Rumanía), remató firmando a paz con Costantinoble en l'anyo 897, en pagas por cobrar un tributo anyal a l'Imperio Bizantín. En o "libro de los emperadors" lo contan asinas:

De la cual cosa l'emperador ha havido grant desplazer e ha enviado tantost embaixadores con grandes donos e presentes a los de Hongría que estavan cerca del río de Istro pregandolos que.l fuesen contra los búrgaros por dapnificar su tierra

Dimpués de Simeón l'Imperio s'enfeblix.

A cultura bizantina s'heba ixemenau tanto por o primer Imperio Bulgaro que tamién plegoron ideyas heterdoxas, y d'esta traza o asceta bulgaro Chuan Bogomil desembolicó en o monesterio de Ryla (Macedonya) o bogomilismo.

Decadencia d'o primer Imperio y ocupación Bizantina

O rei Samuel preba de reaccionar centrando o suyo Estau en Ohrid (Macedonya d'o Norte), pero l'emperador bizantín Basilio II invade os zaguers territorios orientals que controlan os bulgaros y en 1014 lis infliche una gran derrota en a que os bizantins prenen como brutal represalia vuedar os uellos de 14.000 presioners bulgaros, que son ninviaus a lo rei por un tuerto. En o "Libro de los Emperadors" lo describen asinas:

E fueron presoneros búrgaros XV mil, a los cuales ha feito levar la vista sino a cada centenar uno, e aquel con un ojo, por manera que guidás los otros, e aprés los soltó francos e les mandó que fuessen a su senyor

Samuel muere dos días dimpués. Cuatre anyadas dimpués o zaguer rei de Bulgaria muere en una batalla.

Basilio II concedió a chestión a l'aristocracia nativa y confirmó a posición d'a ilesia. Os bizantins preboron d'helenizar a los bulgaros, como a atros eslaus de territorios que tornaban a controlar. As planas d'o norte yeran zona de paso pa pueblos turquicos d'as estepas que s'escapaban a lo poder de l'Imperio Bizantín: pazinacos, usios y cumans, probables antipasaus d'os gagauzes. Bulgaria tamién estió zona de paso pa os cruzaus.

Segundo Imperio Bulgaro

Ta más detalles, veyer l'articlo Segundo Imperio Bulgaroveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

A fins d'o sieglo XII os campesins bulgaros y os vlacos de rebelan y se constituye un nuevo estau Bulgaro, que por estar tamién prou extenso ye conoixiu como "segundo Imperio Bulgaro" por os historiadors, y tamién conoixiu como "Imperio Bulgaro-Vlaco" por historiadors rumanos, por ser gobernau por una dinastía vlaca, os Asán. A capital yera Tarnovo, a ilesia recuperó a suya autocefalia y bi ha una recuperación cultural.

En a "Cronica de Morea" parlan de Caloynni Assan, emperador de Bulgaria, que invadió l'Imperio Latino de Costantinoble en ixas envueltas de Balduín I. Tamién nombran a un Andronico Assani en relación con os almogávars:

Et el emperador, huyendo aquesto, tantost enuió vn su nieto, fillo de su hermana, el cual se nombraua micer Andronico Assani con buena companya

En o "Libro del Trasoro" denominan barbaros a los bulgaros, considerando-los como ocupants ilechitimos de Tracia, considerada part de Grecia:

Et depues es la tierra de Tracia, en do los barbaros son, e Romanya e Constantinoble

A invasión mongola de 1242, cuan tornaban d'Hongría fació que os bulgaros entrasen en decadencia. O estau s'esminglanaba y se succedeban diferents dinastías, belunas d'orichen cumán. A costa d'a Mar Negra y a boquera d'o Danubio se poblaban por pueblos turquicos de diferents orichens, talment antipasaus d'os actuals gagauzes. A fins d'o sieglo XIV hi heba dos reinos bulgaros principals, un con capital en Tirnovo y atro con capital en Vidina. En 1382 os otomans prenioron Sofía, en 1393 o reino de Tirnovo, y en 1396 o reino de Bidina. En 1396 os hongaros y franceses organizan una cruzada anti-otomana, plegan a ocupar Vidina, pero son vencius en Nikopol. En 1444 atra cruzada antiotomana ye redotada en 1444 en a batalla de Varna, en a que muere o rei Vladislau de Polonia y Hongría.

Dominación otomana

Dende fins d'o sieglo XIV dica fins d'o sieglo XVIII Bulgaria fació part de l'Imperio Otomán. Talment por deseyo d'os griegos o patriarcau bulgaro fue suprimiu en 1393, y a ilesia bulgara dependeba dreitament d'o patriarca de Costantinoble. A ilesia s'heleniza y a luenga eslava ye abandonada por o griego. A nobleza bulgara, muito diezmada por as guerras, ye deportada t'Anatolia u se converte a lo islam. A mayoría d'os campesins bulgaros siguen estando ortodoxos, pero en o sudueste bi ha bulgaros que se converten a la relichion musulmana convertindo-se en os pomacos. Os turcos s'estableixen en diferents parz de Bulgaria como Dobrucha, pero tamién i habrá bulgaros islamizaus que se convertirá en turcos por prener a luenga turca. Cualques poblacions de Bulgaria se fan multietnicas. Os mercaders griegos, armenios y chodigos (sefarditas) ocuporon o puesto d'a clase meya. Os chodigos yeran admesos en os vicos turcos d'as ciudaz. A lo norte d'os Balcans as ciudaz solas que i heba yeran dominadas por ciudadans griegos y guarnicions turcas. As viellas ciudaz de Rumelia fuoron helenizadas. As tradicions bulgaras se mantenioron vivas en secreto en os monesterios, gracias a Paisij, un monche de Athos que en l'anyo 1762 escribió una historia d'o suyo pueblo bulgaro.

A presión rusa

L'aislamiento d'os bulgaros se crebará dende a segunda metat d'o sieglo XVIII por contacto con os rusos, que abanzaban enta o sud desgastando l'Imperio Otomán. En a guerra de 1768 entre l'Imperio Otomán y l'Imperio Ruso, as tropas rusas plegarán dica Bulgaria y en 1774 vencerán a los otomans en a batalla de Chumla. Por o tractau de Küçük-Kaynarca Rusia s'adchudica o poder de protección d'os cristianos ortodoxos de l'Imperio Otomán.

En 1829 os griegos se rebelan y as tropas rusas ocupan una gran parte d'as tierras bulgaras, prenendo Adrianopoli. Por o tractau de paz Vlaquia y Moldavia se converten en un protectorau ruso y Bulgaria permaneixe en l'Imperio Otomán, pero muitos bulgaros emigran enta Vlaquia y Moldavia (especialment ta Besarabia).

O separatismo bulgaro

En a decada de 1830 os misioners europeus occidentals y norteamericans s'intresan por os bulgaros. En ixa epoca amaneix o nacionalismo bulgaro, amaneix una burguesía bulgara comerciant y artesana, s'ubren escuelas y s'imprimen obras en luenga eslava. A primera biblia bulgara fue publicada en 1940 por Eli Riggs. Os mesmos otomans fomentaban este nacionalismo pa desgastar o emerchent nacionalismo griego. A presión popular consigue que a liturchia torne a estar en luenga eslava, y en 1870 o soldán creya un exarcau bulgaro independient, en contra d'a voluntat d'o patriarca de Costantinoble. A pesar d'o refirme otomán a lo nacionalismo bulgaro y las concesions bi ha descontento por a plegada de refuchiaus musulmans de l'Imperio Ruso como circasians, nogais y tartaros de Crimea, (venius dimpués d'a guerra de Crimea). Os nacionalistas bulgaros emigraus en Bucarest s'organizan.

L'autonomía

En 1875 esclata una insurrección en Bosnia y arriba en Bulgaria en 1876. Os turcos reaccionan con una represión brutal con os bachibozuks, que fan mortaleras y devastan lo país. A opinión publica europea ye escandalizada por as noticias de Bulgaria (o panfleto de Gladstone denunciaba o que escayeixeba) y os países europeus, en especial Gran Bretanya y Rusia, presionan pa que den l'autonomía a Bulgaria. Rusia declara a guerra a l'Imperio Otomán en 1877 y invade Bulgaria con o refirme de l'exercito rumano y d'una lechión bulgara. En chinero de 1878 l'exercito ruso ye muito a man de Costantinoble. O 3 de marzo de 1878 Rusia imposa a lo soldán o tractau de Sant Estefano. D'alcuerdo con este tractau se creyaría un estau pan-bulgaro con os territorios de l'actual Bulgaria, as tierras eslavas de Macedonya, una francha de l'actual Serbia y lo norte de Tracia Oriental. Como esto suposaba un desmantelamiento de l'Imperio Otomán en Europa y un desequilibrio de fuerzas en os Balcans, Austria y Gran Bretanya presionoron a Rusia pa que firmase o congreso de Berlín en chulio de 1878 por que se manteneba o status quo. O prencipau autonomo de Bulgaria se reduciba a la rechión de Sofía y las tierras a lo norte d'os Balcans. A cuenca d'o río Maritsa seguiba estando una provincia otomana, dita Rumelia Oriental, encara que con cierta autonomía, con un gobernador cristiano y baixo a supervisión d'as grans potencias. Macedonya no heba cambiau de situación.

En 1878 una Asamblea constituyent aplegada en Tarnovo prenió una Constitución y esleye a Aleixandre de Battemberg como prencipe. En Rumelia Oriental os representants d'as potencias europeas elaboran estatutos organicos.

Bulgaria independient

En 1885 l'exercito bulgaro ocupa Rumelia Oriental. Os serbios reaccionan pero son derrotaus. Aleixandre cesa a los ros rusos sin consultar a Rusia y lo zar organiza un complot militar en contra d'éll. Aleixandre ha d'abdicar y prene o control Stepan Stambolov. Stambolov consigue que o exarca nombre bispes bulgaros en Agrida y Veles, alavez territorio otomán. L'Asamblea de 1887 esleye como prencipe a Ferrando de Saxonia-Coburgo, que en 1894 se desfa d'o dictador Stambolov. En 1908 Ferrando proclama en Tirnovo a independencia de Bulgaria y prene o títol de zar con l'aprobación d'Austria-Hongría, y o reconoiximiento internacional. Bulgaria no teneba una clase meya, pero a suya aristocracia teneba una mentalidat civil y laica, (os tiempos de control griego en a ilesia facioron que os bulgaros estasen bella cosa allenaus d'a ilesia). En 1903 bi ha una prebatina d'insurrección bulgara en Macedonya y Tracia, pero fracasa dimpués de 3 meses, esclafada por os otomans.

As guerras balcanicas

En 1912 Bulgaria declaró a guerra a l'Imperio Otomán chunto con Serbia y Grecia, encomienza a Primera Guerra Balcanica. Adrianopoli caye en marzo de 1913 y los otomans se rinden. Por o tractau de Londres d'o 30 de mayo de 1913 l'Imperio Otomán abandona os territorios a l'este d'a linia Enos-Midia. Os tres estaus vencedors no se posan d'alcuerdo con o reparto. Os bulgaros, que han combatiu en l'este se consideran os autenticos vencedors d'os turcos, pero han estau os serbios qui han ocupau o centro y norte de Macedonya. Os griegos han ocupau tierras d'o sud de Macedonya pobladas por eslaus. O 23 de chunio Ferrando ordena atacar a los serbios y griegos sin declaración de guerra, encomenzando a Segunda Guerra Balcanica. En a Segunda Guerra Balcanica os bulgaros son atacaus tamién por os otomans y os rumanos, y pierden a guerra. Por o tractau de Bucarest o 10 d'agosto de 1913 Bulgaria obtién una extensión territorial en o sud, con una parte de Tracia que li da acceso a la mar Echea, pero ha de ceder o sud de Dobrucha a Rumanía, y Adrianopoli y Tracia Oriental a Turquía. Serbia conserva a suya part de Macedonya, actual Macedonya d'o Norte.

As guerras mundials

En setiembre de 1915 Bulgaria fa liga con l'Imperio Austrohongaro y declara a guerra a Serbia o 15 d'octubre. L'exercito serbio ye un una pinza y se retira enta la mar a traviés d'Albania. As tropas bulgaras ocupan a parte serbia de Macedonya d'o Norte y fan frent a las tropas aliadas que han desembarcau en Tesalonica o 15 d'octubre (se creya o frent d'Orient). Cuan Rumanía entra en guerra en agosto de 1916 Bulgaria s'asocia a la contraofensiva d'as potencias centrals y ocupa Dobrucha d'o sud, que heba perdiu en a segunda Guerra Balcanica.

O 18 de setiembre de 1918 se creba o frent d'Orient y Bulgaria ye obligada a firmar un armisticio o día 29. O 3 d'octubre Ferrando abdica en Boris III. O tractau de Neully d'o 27 de noviembre de 1919 imposa perdugas territorials: Rumanía recupera o sud de Dobrucha, Serbia s'anexiona bel districto buegant de Bulgaria, Grecia ocupa Tracia Occidental, por o que Bulgaria pierde o acceso a la mar Echea y s'empobrix o antepaís d'ixa costa. En 1923 os griegos forachitoron a 250.000 bulgaros de Tracia y Macedonya, y son substituyius por refuchiaus griegos de Turquía.

Encomienza a dictadura campesina de Alexandre Stambolijski, que ye asasinau en 1923. Dimpués bi ha una insurrección comunista, seguida d'una represión. Dimpués un periodo d'inestabilidat con desembolique d'o terrorismo. Se creya un movimiento d'inspiración musoliniana pareixiu a los ustaixas, os komitadjis, salius d'o ORIM, (Organización Revolucionaria Interior de Macedonya, de fins d'o sieglo XIX). A fins d'ixe mesmo anyo os oficials fomentan un golpe d'Estau. A l'anyada vinient se proclama una dictadura exercida por o mesmo rei Boris III, que manifiesta simpatía por l'Alemanya nazi.

O 7 de setiembre por l'alcuerde de Craiova Bulgaria recupera Dobrucha d'o sud, en un tiempo que Rumanía ye obligada a ceder territorios. En marzo de 1941 Bulgaria s'adhiere a lo Pacto Tripartito y ye recompensada con l'anexión d'una gran parte de Macedonya, d'o districto de Pirot de Serbia, y con a recuperación de Tracia. Os griegos de Tracia, uns 100.000, son forachitaus en respuesta por a expulsión d'os bulgaros en 1923. O gubierno bulgaro preba de ganar-se a simpatía d'os macedonyos eslaus y integrar-los.

Boris III se negó a entregar a los chodigos de Bulgaria a los nazis y a participar en a guerra contra a URSS. En agosto de 1943 Boris III muere.

A bulgaria comunista

Os dirichents bulgaros miran en 1944 un alcuerde con as potencias occidentals, pero en agosto os sovieticos ya son prou cerca, y penetran en Rumanía. O 5 de setiembre a URSS declara a guerra a Bulgaria, que se rinde y ye presionada pa que declare a guerra a Alemanya. As tropas bulgaras se retiran de Grecia y Yugoslavia. O 16 de setiembre os sovieticos ocupan Sofía y ocuparán Bulgaria dica fins de 1947. O 28 d'octubre se firma un armisticio en Moscú y o poder pasa a los comunistas.

O 9 de setiembre un golpe d'estau posa en o gubierno a lo Frent d'a Patria. O Partiu Comunista ye a fuerza organizada sola, organización que depende de Moscú, y prene tot o poder con l'aduya de l'exercito d'ocupación. Dimpués de l'abolición d'a monarquía por referendum se proclama a republica popular o 15 de setiembre de 1946. L'aduya sovietica permite que por o tractau de París de 1947 Bulgaria conserve Dobrucha d'o Sud. En 1947 unos cuantos procesos eliminan a los dirichents politicos no comunistas, como Nikolai Petkov, capitoste d'os campesins. En 1949 o partiu comunista sufre una purga estalinista por parte d'os cuadros d'o partiu formaus en a URSS que permite apartar a parte d'os comunistas, acusaus de titismo. O estalinista Valko Chervenkov se posa a la cabeza d'o partiu y dimpués ye succediu por Todo Jirkov, qui seguirá os dictaus d'a URSS.

A bulgaria postcomunista

En noviembre de 1989 Todo Jirkov ye cesau en as suyas funcions y acusau de corrupción. Tres anyadas dimpués será condenau a siet anyadas de prisión. Con o suyo succesor Petar Mladenov o partiu comunista se torna socialista, y en as eleccions libres de chunio de 1990 obtién 211 d'os 400 escanyos de l'Asamblea nacional. Os excomunistas comparten o poder con a oposición (Unión d'as Fuerzas Democraticas). En chulio de 1991, o Parlamento adopta una nueva constitución. As eleccions lechislativas d'octubre de 1991 dan 110 escanyos a la UFD, 106 a lo Partiu Socialista y 24 a lo Movimiento d'os dreitos y libertaz d'os turcos y pomacos. Jeliou Gelev, lider d'a UFD, ye esleito president d'a Republica por sufrachio universal en chinero de 1992.

Bulgaria será o primer Estau en reconoixer a independencia d'a Republica de Macedonya, encara que no haiga reconoixiu a lo pueblo macedonyo como diferent d'o pueblo bulgaro.

Vinclos externos

• Se veigan as imáchens de Commons sobre Bulgaria.
• Essential History of Bulgaria in Seven Pages

• Datos: Q219
• Multimedia: Bulgaria / Q219