Nadir Schah
| Nadir Schah | |
|---|---|
Schahanschah vo Persie
| |
 Bordret vom Nadir Schah | |
| Regierigsziit | 1736–1747 |
| Chrönig | 1736 |
| Uf d Wält cho | 1688[1] oder 1698 |
| Geburtsort | Dastgerd,[2] (Chorasan, Iran) |
| Gstorbe | 19. Juni 1747 |
| Dodesort | Kutschan (Chorasan, Iran) |
| Begrabe | Maschhad, Iran |
| Vorgänger | Abbas III. |
| Nochfolger | Adil Schah |
| Verhürotet mit | Brinzässin Alamiyan Razia Begum Safavi |
Dr Nādir Schāh Afschār (persisch نادر شاه افشار; * 22. Oktober 1688; † 20. Juni 1747), äigentlig Nadr Qulī (نادر قلی), mit em Ditel (bevor er dr Droon bestiige het[3]) Tahmāsp Qulī (تهماسپ قلی, dütsch historisch Thamas Kulikan gschriibe,[4] = „Sklav vom Tahmāsp“), het as Schah vo Persie vo 1736 bis 1747 regiert. Er het d Dünastii vo de Afschariide gründet. Wil er e milidäärischs Schenii gsi isch, häi en e baar Historiker as „e zwäite Alexander“ oder as dr „Napoleon vo Persie“ bezäichnet. In sinere Zit isch s Gebiet vo Persie vom Kaukasus bis zum Indus und ans Südufer vom Persische Golf gange.
Si Vorgänger Tahmasp II. het e Chrieg gege d Osmane aagfange, und d Browinze Georgie und Armenie verloore. Wo dr Nadir denn uf Isfahan cho isch, het er dr Tahmasp as Schah abgsetzt und in s Exil uf Chorasan gschiggt. An sim Blatz het dr Nadir dr achtmönetalti Soon vom Tahmasp as Abbas III. uf e Droon gsetzt, bis dr Nadir sich sälber am 8. Merz 1736 zum Köönig kröönt het. Er het denn d Osmane in meerere Schlacht gschlaage und eso alli verlorene Gebiet zrugggwunne.
1738 het er d Stadt Kandahar erooberet und Ghazni, Kabul und Lahore bsetzt. Am Ändi vo 1738 isch er über e Indus und het d Mogule am 27. Februar 1739 in dr Schlacht vo Karnal besigt. Bi dr Blünderig vo dr Hauptstadt Delhi si öbbe 30'000 Lüt umbrocht und Duusigi vo junge Lüt si versklavt worde.
1740 het dr Nadir Schah d Usbeke in Dransoxanie aagriffe. Er het e groossi Flotte lo baue, und mit ere Bahrain erooberet und 1743 dr Oman. 1746 het er die häiligi Stadt Nadschaf übernoo.
E Joor spööter – 1747 – isch dr Nadir Schah vo sine Generääl z Chorasan ermordet worde.
Fuessnoote
[ändere | Quälltäxt bearbeite]- ↑ [1]
- ↑ [2]
- ↑ Gottlob-Nathan Fischer, Friedrich von Gentz (Hg.), Deutsche Monatsschrift, Band 24, 1797, S. 244
- ↑ Abraham Hyacinth Anquetil-Du-Perron, Historische und chronologische Abhandlungen von Indien, 1788, S. 35, Journal der Chirurgie und Augenheilkunde, Band 32, 1843, S. 277
Litratuur und Weblingg
[ändere | Quälltäxt bearbeite]
Commons: Nadir Schah – Sammlig vo Multimediadateie- Nadir Schah. In: Ehsan Yarshater (Hrsg.): Encyclopædia Iranica (änglisch, inkl. Literaturaagabe)
- Nadir Schah von Persien
| Vorgänger Abbas III. (Safawide) |
Schah vo Persie 1736–1747 |
Nochfolger Adil Schah (Afscharide) |
|
Dä Artikel basiert uff ere fräie Übersetzig vum Artikel „Nadir_Schah“ vu de dütsche Wikipedia. E Liste vu de Autore un Versione isch do z finde. |