Grupo Wagner

Grupo Wagner
Tipo	Empreiteira militar, organización paramilitar, organización armada, organización criminal e organización terrorista
Data de fundación	1 de maio de 2014
Fundador(es)	Yevgeny Prigozhin e Dmitry Utkin
Nomeado en referencia a	Dmitry Utkin
Presidente/a	Pavel Prigozhin (pt) (2023-) |link=https://www.wikidata.org/wiki/Q20850503?uselang=gl]] (2014-) Andrey Troshev (pt) (-) Dmitry Utkin (pt) (-)
Eventos/Actividades	murder of Yevgeny Nuzhin, Wagnergate e rebelião do Grupo Wagner
Sede	San Petersburgo e Molkin
País	Rusia
[ editar datos en Wikidata ]

O Grupo Wagner (en ruso: Группа Вагнера, romanizado como: Gruppa Vagnera), tamén denominado PMC Wagner, ChVK Wagner (ChVK correspóndese coas siglas, en ruso, de Compañía Militar Privada), ou CHVK Vagner (ЧВК Вагнера ChVK Vagnera, Частная Военная Компания Вагнера) é unha organización paramilitar de orixe rusa. Hai quen^[quen?] o describen como unha empresa militar privada que actúa en varias rexións do mundo, principalmente no leste de Ucraína e en Siria. Outras fontes catalógano como un escuadrón secreto das Forzas Armadas de Rusia, quen o empregan como brazo de apoio en conflitos nos que Rusia está comprometida ou involucrada.

Trátase dunha das organizacións máis secretas de Rusia. O feito de ser mercenario, de feito, viola as leis rusas. Crese que até 10.000 persoas foron contratadas polo Wagner nos últimos dez anos.

O Grupo non controla o seu persoal de maneira directa. Fanse contratos por traballos de curta duración para funcións especializadas. Tamén se selecciona persoal de seguridade en compañías creadas para o efecto, que serán as que executen o traballo. As persoas candidatas pasan exames físicos e revisións das súas habilidades e experiencia. A continuación, comezan un período de adestramento nunhas instalacións nas proximidades de Krasnodar. Pasada esa fase envíase o persoal ao estranxeiro. De alguén morrer en acción, é pouco probábel que o seu cadáver sexa repatriado.

Historia

Segundo os informes, o fundador da compañía é Dmitri Valérievich Utkin, nado en 1970 no óblast de Kirovogrado, daquela, parte da RSS de Ucraína. Segundo a declaración do Servizo de Seguridade de Ucraína en setembro de 2017, Utkin aparentaba ser un leal cidadán ucraíno. Até 2013 foi tenente coronel e comandante de brigada da unidade das forzas especiais Spetsnaz GRU (o 700º destacamento independente Spetsnaz da 2ª brigada independente) do Departamento Central de Intelixencia (GRU) de Rusia.

Tras retirarse ese ano, comezou a traballar para a empresa privada Moran Security Group, fundada por veteranos militares rusos. A compañía, que realizou misións de seguridade e capacitación en todo o mundo, especializouse en seguridade contra a pirataría. O mesmo ano, altos xerentes da empresa crearon unha organización con sede en San Petersburgo, Corpo Eslavo, que encabezou os contratistas para "protexer os campos petrolíferos e os oleodutos" en Siria. Utkin logrou sobrevivir a esa desastrosa misión.

O Grupo Wagner presentouse en 2014, xunto con Utkin, no óblast de Lugansk (Ucraína). O nome provén do propio distintivo de chamada de Utkin, "Wagner", que seica elixiu debido á súa paixón polos dramas musicais deste compositor alemán. Radio Liberty citou os informantes dicindo que a fe nativa eslava (un culto pagán moderno) era favorecida polo liderado do grupo Wagner. En agosto de 2017 o turco Yeni Şafak especulou con que Utkin fose só un home de palla da compañía, tras quen se agocharía o verdadeiro líder.

O 9 de decembro de 2016, Dmitri Utkin foi fotografado co presidente Vladimir Putin nun acto de condecoracións. Dicíase que Aleksandr Kuznetsov "Ratibor" era o comandante da primeira compañía de recoñecemento e asalto de Wagner; Bogátov, o comandante da cuarta; e Tróshev, o "director executivo" da compañía. Días despois, o voceiro do Kremlin confirmou a presenza na recepción do Kremlin de Dmitri Utkin en representación da rexión de Nóvgorod. Disque a recepción organizouse para quen recibiran o galardón da Orde de Coraxe e o título de Heroe de Rusia, sen dar máis detalles.

Hogano, o grupo é considerado unha das maiores organizacións militares privadas do mundo. Porén, moitas análises afirman que o grupo é, en realidade, un escuadrón secreto do goberno ruso, designado para intervir en conflitos onde Rusia non quere involucrarse oficialmente. Hai constancia de que nas súas filas figuran tamén membros ucraínos e serbios, estes últimos en menor número. Trátase dunha organización extremadamente xenófoba, mesmo con vínculos confirmados con organizacións neonazis.

Segundo varios medios rusos, o Grupo Wagner está financiado polo Estado ruso e por empresarios próximos ao mesmo. Un deles é Evgueni Prigozhin, un adiñeirado asociado do presidente Putin, quen tamén controla a Axencia de Investigación de Internet.

Lugares de acción

O grupo actuou na Guerra do Donbás, o conflito interno do Sudán, a Segunda guerra civil centroafricana e a guerra civil siria. Centenares de membros morreron o 7 de febreiro de 2018 nun ataque da chamada Coalición Internacional contra o Estado Islámico e o Levante, liderada polos EUA, na provincia siria de Dayr az-Zawr na batalla de Khasham.

Crese que o grupo actúa tamén en Libia dando apoio ao xeneral Khalifa Haftar, o home forte no leste do país africano, xa que Moscova busca aumentar a súa influencia no país. De feito, crese que xa hai dúas bases rusas secretas no lugar.

Unha exclusiva da axencia Reuters desvelou que un grupo de aproximadamente 400 paramilitares do Grupo Wagner podería atoparse en Venezuela para protexer o presidente Nicolás Maduro, tras o agravamento da crise venezolana.

Desde 2019 reportouse a presenza do grupo en Mozambique, en combate contra grupos xihadistas na provincia de Cabo Delgado.

Sancións da Unión Europea

O 13 de decembro de 2021, o Consello da Unión Europea ditou sancións contra o Grupo Wagner e os seus responsábeis, incluídos Utkin e Prigozhin, pola violación de dereitos humanos en Siria, Libia, a República Centroafricana, Sudán e Mozambique, así como pola súa actuación armada contra a integridade territorial, a soberanía e a independencia de Ucraína.

Véxase tamén

Ligazóns externas

• Nota de ABC.es
• Nota de Infobae