fla,ui,us.klaudius.iulianus

*Ioulianou autokratoros ta sozomena*, 1696

ni'o ni'o no mo'o la fla,ui,us. klaudius. .iulianus. goi ko'a nolraitru lo latmo sosygugje'a de'i li no ci xa pa bi'o 363 i ko'a selme'e zoi ly Iulianus Apostata ly to lu la poi jdali'a iulianus li'u toi ji'a i ko'a jbena fi li no ci ci pa la konstantinupolis gi'e mrobi'o de'i li 363 pi'e xa pi'e re xa bu'u la marangas pe re'o la didjlet no'u va'i la'o zoi Tigris zoi

ni'o ni'o ni'o li'i jmive

ni'o ni'o nu citno

ni'o ko'a bersa la iulius konstantius e lo re moi speni be ri be'o no'u la basilinas i ko'a se pafrirni la konstantius xlorus poi pu latmo nolraitru ku'o e lo re moi speni be ri be'o no'u la fla,uias maksimianas teodoras i ko'a se mampa'u la kai,ionius iulianus kamenius i la iulius konstantius bruna la poi banli konstantinus poi latmo nolraitru ku'o lo pa po'o rirni

ni'o ko'a ca lo nu verba cu zgana lo nu lo lanzu be vo'a cu se zercatra la poi re moi konstantius poi tamne vo'a gi'e xriso i la'e di'u cu'u ko'a krasi lo nu vo'a senpi se ra'a lo xi'ojda i ko'a jo'u la konstantius galus poi bruna ko'a lo pa po'o rirni cu pinfu bu'u la makelum poi jecta badydi'u se di'o la kapadokias

ni'o ni'o nu binxo lo vlipa

ni'o la galus cu binxo lo viptru be lo stuna pagbu gau la poi re moi konstantius de'i li no ci mu pa gi'e se catra gau ky de'i li no ci mu vo i ba bo ko'a de'i li no ci mu mu cu se klacpe fi ky ne bu'u la medioluanum no'u va'i la miluanom gi'e binxo lo viptru be lo stici pagbu gau ky gi'e spebi'o la elenas poi mensi ky ku'o gau ky

ni'o ko'a ca so'o bavlamna'a cu jamna loi dotco natmi poi troci lo nu gunta lo latmo sosygugje'a i ko'a za'u re'u jinga la kolonias agripinas no'u va'i la keln de'i li no ci mu xa gi'e jinga fi loi natmrlalamana bu'u la argentoratum to nunda'a bu'u la ctrazburg toi gi'e nurgau la rain noi korbi ku'o ze'u lo bavlamna'a be li mu no

ni'o ky de'i li no ci xa no cu minde ko'a lo nu benji lo fraso sonci lo ky stuna jenmi i la'e di'u rinka lo nu flapro poi mukti lo nu loi ko'a sonci bu'u la lutetias no'u va'i la paris cu xusra lo du'u ko'a nolraitru i lo nu loi latmo cu jamna simxu cu se rivbi lo nu la konstantius cu mrobi'o kei po'o i ki'u bo ky ve cu'u lo cedyxu'a flaselci'a pe vo'a cu xusra lo du'u ei la iulianus ba nolraitru co bavla'i vo'a

ni'o ni'o srana lo lijda

ni'o la iulianus cu selme'e lu lo jdali'a li'u a va'i zoi ly apostata ly pe bau lo la'orbau loi xriso i ki'u bo lo te go'i cu krici lo du'u ko'a ba lo za'i xriso cu binxo lo nalje'o i da'i nai lo nu ko'a xriso kei ve cu'u loi sivni xatra be la libanius poi gubyskucre bei ko'a cu se bapli ca lo nu ko'a verba i je ko'a pu stace seljda no da pu lo nu tcidu loi pemci be fi la omeros be'o poi cmima lo'i vajnyrai selci'a pe lo xelso lijda i ko'a ba lo bi'u nai nunbi'o be fi lo seljda be lo xelso cu nupre lo nu badgau fi ri e si'a lo drata lijda be mu'u lo brojda lo nu loi xriso cu nandygau fi ra i ji'a ko'a nupre lo nu loi bi'u nai nalje'ojda gau vo'a cu za'u re'u misno je snura

ni'o ko'a ta'i lo nu sfasa cu sisti lo zu'o loi nalje'o cu se gunta e lo zu'o loi ra malsi cu se daspo i lo se go'i pu selyli'e lo nu la poi banli konstantinus cu jecta sarji lo xi'ojda be ci'e lo kamni pe la nikaias i ta'o ko'a ca'o lo nu ci'ormau je tadni be bu'u la atinas cu pu co'a selsau re nanmu poi ba zu catlu bo jdaca'i je cesyvu'e ku'o zi'e po'u la gregorius pe ra'i la nazianz joi la poi banli basileios i ta'o nai lo xi'ojda to'e ki'u nai lo nu la konstantinus pu flaxaugau xy cu na jecta ke terca'i lijda pu lo nu la poi banli teodosius de'i li no ci bi no bi'o no ci so re cu xusra lo du'u xy ja'a co'e i la konstantinus joi so'o selyli'e be ri cu fanta lo zu'o loi nalje'o malsi cu se cikre i ji'a so'i malsi fa'u nalje'opre ca lo nu lo go'i cu ca'o turni cu se daspo fa'u se catra i lo bi'u nai nolraitru cu zanru ja minde ju'o cu'i je na'e fanta ju'o la'e di'u

ni'o lo terjda selkri be ko'a cu mutce ve toltu'i i ko'a seljda ge nai lo jecta lijda poi ca lo purci po lo latmo sosygugje'a pu tcaci lo'i latmo gi lo terctu be fi la pluaton bei fi'o jimpe la iamblixos i ko'a cu'u la sokrates sxoluastikos cu krici lo du'u lo ruxse'i be la poi banli aleksandros pu zvati lo xadni be vo'a ta'i lo terctu be la pluaton e la piutagoras

ni'o ko'a so'i roi zukte troci lo nu fanza loi xriso kei e lo nu jdikygau lo ni xy kakne lo nu ganzu fapro lo nu loi so'e latmo cu di'a jinvi lo du'u lo nalje'o cu xamgu

ni'o ko'a xelfla lo nu fanta lo nu lo xriso ctuca cu pilno loi nalje'o cukta be mu'u la iliad be'o noi jicmu lo latmo terctu i la'e di'u noi nu seirgau loi xriso tadni lo latmo jikca bo cecmu cu tertoi lo nu jdikygau loi xriso ckule lo ni vlipa kei li pi so'o i ji'a lo go'i cu nungunta fi da poi ko'a jinvi lo du'u ke'a tolstace i sa'u nai te go'i fa lo du'u loi xriso ckule cu ctuca fi lo du'u la biblion po'o cu sabji loi selju'o kei gi'e ca bo ctuca fi loi nalje'o selci'a ji'a noi lo za'i ke'a slabu de cu selnitcu de lo nu snada se pa'u lo latmo cecmu

ni'o ko'a de'i li no ci xa re cu xelfla fu lo ka jdazifcru fe lo nu loi nalje'o malsi cu di'a se kalgau kei ku ce lo nu loi malsi selpo'e cu se xruti kei ku ce lo nu xruklacpe loi xriso jatna poi pu se livmi'e se ja'e loi seljdice be lo xriso trukamni i lo bi'u nai nu xruklacpe cu nu jdazifcru kei gi'e bo ju'o cu'i nuntoi ko'a lo nu zenbygau lo ni loi xriso selkrigri cu ficysi'u kei te zu'e lo nu jdika lo ka lo xi'ojda cu tsali

ni'o lo malsi po la apolon ba lo nu ko'a ba'o tolcliva la antioxei,as te zu'e lo nu brebi'o lo nu jamna loi natmrfarsi cu jelca selspo i lo ralju xi'ormalsi ki'u lo nu ko'a jinvi lo du'u loi xriso cu fuzme cu selga'o fi loi seljda

ni'o ni'o nu mrobi'o

ni'o ko'a de'i li no ci xa re cu cfagau lo nu klama loi natmrfarsi la konstantinupolis te zu'e lo nu gunta vo'e i ko'a cu se xlali gidva lo pa natmrfarsi za'e bradycmibi'o lo nu gidva lo jenmi lo nu nerkla lo sudytu'a i ko'a ba lo nu ba'o facki la'e di'u cu troci lo nu gidva lo jenmi lo nu klama lo latmo korbi poi jy bu'u ke'a cu snura da'i i ko'a ca lo nu ca'o xrukla kei de'i li no ci xa ci pi'e xa pi'e re xa cu mrobi'o ca lo nunda'a be bu'u la ktesipon be'o noi loi latmo cu jinga fo ke'a zi'e ku'i noi ba bapli lo nu ly jinga fo lo nunjamna i ko'a na pu dasni lo za'e badgauta'u se ja'e lo nu birti lo nu ba jinga kei a lo nu sojypa'a je tolmo'i i ja'e bo se xrani lo selrenro balre gi'e mrobi'o i la iulianus cu bavla'i selyli'e la poi nolraitru io,ui,anus poi ba zi mrobi'o

ni'o ni'o ni'o krasi

ni'o ni'o krasi fa lo pe la uikipedias ge'u glico velfarvi be de'i li re no no xa pi'e pa pi'e bi