Tetuan
| ||||||||||||||||||||||||
Tetuan (en arabo تطوان, Titwan, ke es la diformasyon del biervo Tittawen en tamazight del Rif o Tarifit, ke signifika "los ojos" o "los manadéros") es una sivdad del Nord de Marroko i esta konsiderada la kapitala i sentro kulturalo de la rejion de Tanjer-Tetuan (Tanja), endemas de ser el uniko porto de Marroko en la Mar Mediterraneo, unos kilometros al sud de Jibraltar. A prinsipios del syeklo XX, una sinkena parte de la povlasion iva ser djudia. La sivdad es konsiderada la sivdad ma andalusa del Reyno, una de las ma fermozas i endemas la su medina (sivdad vieja) es patrimonio kultural de la umanidad de la UNESCO
Ekonomiya
[trocar | trocar el manadero]La sivdad esta ubikada en una rejion agrikola, lo ke la va konvertir en el sentro komersial de los produktosde la rejion, komo sereales, sítrikos, frutas i ortalisas; el resto de la aktivita esta repartido entre gado i artesaniya. La sivdad endemas tyene kon chikas endustrias ke van estar espesialisadas en la manufaktura de produktos de tabako, sabon, farina, tekstiles i materiales de fraguádo, anke la industria ma emportante es la de las konservas (pishkado) i la de la produksiyon de muebles.
Istorya
[trocar | trocar el manadero]La su priméra mension es en el syéklo XI. La sivdad iva ser fondada por el meriní Tábit sobre de una povlasion bereber egzistente, para servir de retaguardia para el atako a la kolonia portugeza de Seuta. Enel anyo 1399 la sivdad iva ser atakada por Enrique III el Doliente de Kastiya para protejer las sus barkas de los piratas ke habian fesho de eya el su refujio. Enel anyo 1437 las tropas de Portugal arrasan la sivdad.
Enel anyo 1483-1484 yegan los priméros refujiados andalusies, provenientes de la fortalesa de Pinyar i al mando del kapitan y alkalde de Granada Sidi Al-Mandari. Se iva refraguar i fortifikar la sivdad i se empiesa un periodo de gran esplendor. La sivdad se iva konvertir tambien en refujio de djudios ekspulsados de Espanya. De esta epoka es la medina (la sivdad vieja), la máale a la ke los tetuanis yaman Bled, es dizir, «el puevlo» por ekselensya. Sidi Mandri es uno de los gobernantes má famosos de Tetuan, ke fue asistido en el govierno i susedido tras la su muerte por la su esposa, Sayyida al-Hurra (la Sinyora Libre), poderosa mujer de orijen andalus ke iva yegar a kazarse dempues kon el entonses Sultan de Marroko.
En el syeklo XVI ay munshas peleas por el poder, en una de eyas Sayyida al-Hurra iva ser amortada. Dempues, en el syeklo XVII, Tetuan pasa a ser uno de los prinsipales destinos del eksilio de los moros (ultimos musulmanos espanyoles, ekspulsados por Felipe III de Espanya). Los moros fondan una grande máale al nor del Bled, konosida komo Al-Ayun («los manadéros»), donde hasta oy endia se konservan munshas kozas del espanyol favlado por akeyos eksiliados: la popular kaleja Tranqat («de las trankas») o la meskita i eskuela Luqash (Lukas) son dos egzemplos bien konosidos, endemas de munshos apelyidos kastilyanos arabisados en munshas familias tetuanis.
El 6 fevrero del anyo 1860 el jeneral Leopoldo O´Donnell iva derrotar las tropas del sultan de Marroko i konkista la sivdad. Enel anyo 1862 la sivdad iva ser retornada a Marroko. En Tetuan, komo konsekuensa de esta gerra, ivan tener lugar los priméros kontaktos entre espanyoles i los ijos de espanyoles ekspulsados, dempues de katro syéklos de aislamiento, sobre todo con la grande keila sefaradí, ke avlava djudeoespanyol. Munsha parte de la povlasyon musulmana era de orijen peninsular i ainda konservava biva la nosyon del su orijen. Tetuan iva ser la kapital del Protektorado Espanyol de Marroko del Nord entre 1913 i 1956. La administrasyon espanyola iva fraguar bairros afuera de las murayas de la medina. La influensya de la epoka del Protektorado a sigido emportando afilu dempués de la independénsya.
Personajes ilustres
[trocar | trocar el manadero]- Alí Lmrabet, djornalista
- Alberto Aza Arias, diplomatiko i Shefe de la Kaza de Su Majestad el Rey
- María Teresa Campos, djornalista
- Margarita Lozano, aktrisa
- Zouhair El Hairan, fotografo/direktor de sinema
Tetuan oy
[trocar | trocar el manadero]Munshos abitantes tienen el kastilyano komo sigunda lingua, lo ke se puede ver en los titolos de munchas kalejas i butikas en la sivdad. El govierno de Marroko, ve esta diferensia kon respekto al resto del paez (donde la sigunda lingua es el franses komo un alisiente para las reivinidikasiones de otonomiya ke siempre a tinido el Nord de Marroko, por lo kualo aze todo lo posivle para eliminar el uzo del kastilyano en la rejion. Munchos tetuanis de orijin moro lo uzan para reivindikar los sus orijines i sus linkes kon Espanya. Oy endia, la lingua no es muy avlada por los mansevos, ma un poko mas entre los de mediana edad i muncho entre los mas aedados. En esto tambien va influir la yegada de inmigrantes ke arrivan de otros lugares de Marroko. Endemas, egzisten varios sentros de ensenyansa Espanyoles en Tetuan, komo el Colegio Español Jacinto Benavente, el Instituto Español Extranjero Nuestra Señora del Pilar i el Instituto Español Extranjero Juan de la Cierva, de ensenyansa primaria, sekundaria i formasyon profesionala, respektivamente.
Tetuan i la provinsia de la kuala es kapitala se ivan ver dentro de un blokeo ekonomiko durante el reynado de Hassan II en kastigo por la su demanda de otonomiya. Permetyo pokas inversyones privadas i kaji dingúna en el mantenimyento de la sivdad, ke el rey nuka yego a vijitar. En los anyos 80, Hassan II parese ke pedronó a los Tetuanis, i anunsio la su intension de vijitar la sivdad. Para eyo, iva dar ordenes de ke se fraguase un palasio, komo los ke el ya tinía en otras sivdades de Marroko. El palasio fue fraguádo al vasiar la antika sede de la Alta Komisaria Espanyola, ke para entonses iva ser El Konsulado Jeneral de Espanya, i frente de el se fraguó una grande plasa en la ke se iva esperar la djente ke iva a resivir al Rey kon alegriyas i vitores. Ma para fraguár la plasa, se destruyó la plasa del Feddán, ke era el sentro istoriko de la sivdad. La siudad antika o Medina, ke tambien iva ser afektada por el fraguamiento del palasio, a sido deklarada Patrimonio de la Umanidad por la UNESCO i dempues de eyo se an empesado emportantes lavores de restaurasyon, en las ke iva partisipar i kolaborar la Junta de Andaluziya, ya ke el orijen de grande parte de la medina es andalusí.
Komunita djudia de Tetuan
[trocar | trocar el manadero]La komunita djudia de la sivdad, anke oy endiya solo biven 5 djudios, bivió una storya de grandeza. Enel anyo 1967[1] fue aperturada la esnoga Yagdil Torá o Rebí Shmuel Israel, yamada jeneralmente la "Esnoga del Ensanche", por estar en la sivdad mueva.
Espor
[trocar | trocar el manadero]En Tetuan djuega el ekipo de futbol Maghreb Atletiko de Tetuan, ke iva ser el uniko ekipo de fubol de Afrika ke iva djugar en la Priméra divisyon de la Liga de Espanya.
Festivales
[trocar | trocar el manadero]- Festival Internasyonal del Sinema Mediterraneo de Tetuan
- Festival Internasyonal de Laud (Oud) de Tetuan
- Festival Internasyonal del Comic
Sivdades Ermanadas
[trocar | trocar el manadero]Tetuan es ermana de:
