Shanxi
Shanxi es un provinse de Xina, locida en la rejion de Xina norde. La nom sinifia "ueste de la montes", un refere a la loca de la provinse a ueste de la Montes Taihang. Shanxi bordas Hebei a la este, Henan a la sude, Shaanxi a la ueste, e Mongol Interna a la norde. La site capital es Taiyuan.
Lo es xef un plato ensircada par cadenas de montes. A la este es la Montes Taihang e a la ueste es la Montes Lüliang, e un serie de vales es en la sentra tra cual la Rio Fen core. La monte la plu alta es Monte Wutai en Shanxi norde-este, con un altia de 3058 metres. La Mur Grande de Xina formis la plu parte de la borda con Mongol Interna a la norde. La Montes Zhongtiao core longo un parte de la borda sude e separa Shanxi de la parte este-ueste de la Rio Jala. Monte Hua es a la sude-ueste.
La Rio Jala formi la borda ueste de Shanxi con Shaanxi. La Rio Fen e Rio Qin, enflues de la Rio Jala, core norde a sude tra la provinse, e dreni multe de la area. Norde de la provinse es drenida par enflues de la Rio Hai, como la Rio Sanggan e Rio Hutuo. La lago natural la plu grande en Shanxi es Lago Xiechi, un lago salin prosima a Yuncheng en Shanxi sude-ueste.
En la Periodo de Primavera e Autono (722 a 403 aec), la stato de Jin ia es locida en cual es aora la provinse de Shanxi. Lo ia es divideda en tre partes, la statos de Han, Zhao, e Wei en 403 aec, la dato tradisional cual marca la comensa de la Periodo de Statos Gerante (403 a 221 aec). Ante 221 aec, tota de esta statos ia cade a la stato de Qin, cual fundi la Dinastia Qin (221 a 206 aec).