Törke

Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.

---

De Törke (Törks: Türkler) zeen 'n etnische groep inheims aan Törkieje mit 't Törks es modertaal. Ze zeen de grótste etnische groep in Törkieje en ouch de grótste etnische groep ónger de Törkse völker. 't Geuf nag Törkse minderheje in lenj die vreuger bie 't Ottomaans Riek heurde (zowie op de Balkan). Boetedet besjteit 'nen Törkse diaspora door modern migratie, veural in Wès-Europese lenjer.

De oorsjprónk van de Törke mót wersjienlik waere gezoch in Centraal-Azië. Pas vanaaf d'n èlfden eeuw kome de Törke terech in Anatolië.

De versjpreijing van de Törke haet in 't begin gepaard gegange mit de oetbreijing van 't Ottomaans Riek. Daodoor vestigde zie zich op de Balkan, in 't Midde-Ooste en in Naord-Afrika. Es gevolg van det besjtaon nag Törkse minderheje in Bölgarieje, Griekelandj, Irak, Cyprus, Syrië en Roemenië. Wie 't Ottomaans Riek begós aaf te kalve en zelfs gans opheel mit besjtaon nao d'n Eerste Waereldoorlog kome väöl van dees minderheje weer truuk te wone in Törkieje.

Wie 't in de jaore fieftig en sèstig in Wès-Duitslandj economisch good ging, neudigde de regering Törke oet veur dao te kómme wone en wèrke. Saortgelieke situaties golje ouch veur Belsj, Frankriek, Nederlandj, Oosteriek en Zjwede.

Bekinde Törke

• Cahit Arf - wiskundige
• Kemal Atatürk - sjtaotsman
• Emre Belözoğlu - voetballer
• Recep Tayyip Erdoğan - sjtaotsman
• Fethullah Gülen - islamitischen dinker en geleerde
• Nâzım Hikmet - dichter
• Mehmet Okur - basketballer
• Rüştü Reçber - voetballer
• Hakan Şükür - voetballer
• Naim Süleymanoğlu - gewichshöffer
• Hidayet Türkoğlu - basketballer