Fokom-pianakaviana
Ny fokom-pianakaviana dia vondrom-pianakaviana milaza ho iray fiaviana sy iray razambe. Mety ho ny fitambara' ny taranaka mivantana ny fokom-pianakaviana, na amin' ny lafin-dray (fokom-pianakavian-dray) na amin' ny lafin-dreny (fokom-pianakavian-dreny), avy amin' ny razambe iraisana mety ho tena ara-tantara na araka ny lovantsofina na araka ny fedrà. Raha biby araka ny fedrà na ara-tandindona ny razamben' ny fokom-pianakaviana iray, dia izany no atao hoe tôtemisma.
Matetika ny andian-teny malagasy hoe "fokom-pianakaviana" sy ny hoe "fokom-pirenena" dia samy tsorina amin' ny teny tokana hoe "foko".
Mampiavaka ny fokom-pianakaviana ny fananany fomba amam-panao iraisana (izay miampita amin' ny alalan' ny fomban-drazana) sy ny firaisankinany matanjaka ary ny fananana fitsipika (mamaritra ny zo, ny adidy, ny valisoa, ny sazy, ny valifaty, sns) ifampifehezan' ny mpikambana ao aminy. Matetika ny fokom-pianakaviana no ahitana fizaràna madinika (zana-pokom-pianakaviana, izay vondrom-pianakaviana kely kokoa na fianakaviana) sy taranaka avy amin' ny fifanambadiana amin' ny olon' ny fokom-pianakaviana hafa.
Arakaraka ny firenena, ny fokom-pianakaviana dia mety ho fivondronana tena manaka fenitra, manana ny satany araka ny lalàna, ny vakokany sy ny andrim-panjakana ara-pôlitika izay miovaova arakaraka ny sivilizasiôna, ary mankatò fitsipika manokana: filoha, filankevitra, fivoriambe, lanonana, fomba amam-panao, tandindona, sazy, sns.
Ny fokom-pianakaviana iray dia azo raisina ho toy ny zana-bondron' ny fokom-pirenena iray, ka ity indray dia zana-bondron' ny foko iray, izay mamorona (miaraka na tsia amin' ny foko hafa) na tsia vahoaka iray, izay toy ny firenena iray na tsia, manana ny firafitry ny fanjakana na tsia.
Nahitana fiarahamonina manana firafitra misy antanan-tohatra toy io (fianakaviana, fokom-pianakaviana, fokom-pirenena) ny tao amin' ny Tontolo Mediteraneana, ny tao Afrika Avaratra (Berbera), ny tao Atsinanana Afovoany (Iemenita, Baktiary), ny tao amin' ny Tandrok' i Afrika (Kosita), ny tao Eorôpa (Kôrsa, Grika), ny tao Afrika atsimon' i Sahara (Noera, Tivo), ny tao Azia Atsimo-Atsinanana, sns.