Janaul

Janaul
Янаул (ven.)
Яңауыл (bašk.)
Lidnanznam;	Flag;
Valdkund	Venäma
Eläjiden lugu (2021)	25,908 ristitud
Pind	26 km²
Pämez'	Firdaves Mindijarov; (kül'mku 2016—)
Telefonkod	+7−34 760-xx-xxx
Avtokod	02, 102
Aigvö	UTC+5 (MSK+2)

Janaul (ven.: Янау́л, bašk.: Яңауыл «uz' külä», tot.: Яңавыл) om Venäman lidn da lidnankund Baškortostanan Tazovaldkundan lodehes. Se om Janaulan rajonan administrativine keskuz.

Istorii

Eländpunktan aluz om pandud Janaul-raudtestancijaks «Kazan' — Jekaterinburg»-raudtekeskustan sauvomižen aigan vl 1914. Nimitihe lähižen külän mödhe (mainitase vspäi 1750). Vl 1991 žilo sai lidnan statusad.

Janaulan pätehmižed oma kivivoin da gazan «Arlanneft'»-samižohjanduz, maidtegim i heitmatomiden sauvusenkonoriden tegim. Villänpurnud i tipografii oma mugažo.

Geografijan andmused

Lidn sijadase Bui-jogen (ven.: Буй, bašk.: Беүә быуа-sanaspäi «padosein», Kaman hura ližajogi) randpolel, 100 m ü.m.t. keskmäižel korktusel. Pen' 22-kilometrine Janaul-jogi i Buin mödvedhe pen' 27-kilometrine Šudek-jogi (bašk.: Шүдек) lanktas sihe ani pohjoižhe lidnaspäi.

Matkad Permin randan röunhasai om kuz' kilometrad pohjoižpäivnouzmha, Ufahasai — 183 km suvhe orhal vai 210 km avtotedme. Lähembaine lidn om Neftekamsk 47 km suvipäivlaskmha avtotedme.

Tobmuz

Janaul om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline lidnan pämez' om Ilsur Bagauv, radoi vn 2016 kül'mkuhusai. Lidnan Nevondkundan ezimez' om Ruslan Jusupov vn 2023 tal'vkuspäi. Edeližed Nevondkundan ezimehed oma Svetlana Muhametšina (sulaku 2022 — kül'mku 2023), Farit Harisov (Фарит Харисов, uhoku 2019 — sulaku 2022), Roman Sahratov (tal'vku 2016 — uhoku 2019).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 26 924 ristitud, rajonan viž ühesandest, vn 2021 — 25 908 ristitud. Kaik 25 747 eläjad oli lidnas vl 2017. Kaikiš suremb lidnan ristitišt oli 29 300 eläjad vl 2001.

Rahvahad (enamba 1 % vl 2010, ozutadud rahvahudenke): baškiralaižed — 39,4 %, totarlaižed — 29,9 %, venälaižed — 16,5 %, udmurtalaižed — 9,0 %, marilaižed — 3,9 %, toižed rahvahad — 1,3 %.

Islaman Iman-päpühäpert' om avaitud lidnas. Ortodoksižen hristanuskondan Iverijan Jumalanmaman jumalaižen jumalanpert'^[1] om letud vl 1993.

Lapsiden opendusen aluzkundad oma kahesa päivkodid (nomer 6..10, 14..16), gimnazii, licei, koume keskškolad (nomer 1, 4 i R.G. Garejevan nimed), pioneroiden da školnikoiden pert', čomamahtoiden škol, noriden tehnikanradajiden stancii, Junost' -sportškol («Nor'aig»). Ufan politehnižen tehnikuman Janaulan filial om lidnan professionaližen opendusen aluzkundaks.

Transport

Avtobusad da ezilidnelektrojonused ühtenzoittas lidnad lähižidenke järedoidenke lidnoidenke.

Galerei

Puruvedim muštnikaks vl 2018
Janaulan rajonan keskuzline läžundkodi (2011)
Janaul-päraudtestancijan sauvuz vl 2018

Homaičendad

↑ Janaulan pühäpertid sobory.ru-saital. (ven.)

Irdkosketused

Janaul Vikiaitas

	Baškortostanan Tazovaldkundan lidnad
	Agidel' \| Baimak \| Belebei \| Beloreck \| Birsk \| Blagoveščensk \| Davlekanovo \| Dürtüli \| Išimbai \| Janaul \| Kumertau \| Meleuz \| Mežgor'je \| Neftekamsk \| Oktäbr'skii \| Salavat \| Sibai \| Sterlitamak \| Tuimazi \| Učali \| Uf

[1] Janaulan pühäpertid sobory.ru-saital. (ven.)

[1]