Primorsko-Ahtarsk

Primorsko-Ahtarsk
Приморско-Ахтарск
Lidnanznam;	Flag;
Valdkund	Venäma
Eläjiden lugu (2023)	30,465 ristitud
Pind	18,69 km²
Pämez'	Pavel Buräk; (heinku 2023—)
Telefonkod	+7−86 143-xx-xxx
Avtokod	23, 93, 123
Aigvö	UTC+3 (MSK+0)

Primorsko-Ahtarsk (ven.: Примо́рско-Ахта́рск) om Venäman lidn Krasnodaran randan lodehes. Se om Primorsko-Ahtarskan rajonan administrativine keskuz da lidnankund.

Istorii

Eländpunkt mainitase ezmäižen kerdan vl 1774 kuti anastadud turkil Ahtar-Bahtar-lidnuz (känduz: «mererandaline vauged kall'»). Vl 1854 ühtištadihe Ahtarskii-žilod kozakoiden futorišpäi. Vl 1900 žilo kändihe Primorsko-Ahtarskai-stanicaks (ven.: станица Приморско-Ахтарская). Stanic oli lidnan statusanke vll 1922−1926, sai lidnan statusad tošti vn 1949 11. päiväl vilukud.

Primorsko-Ahtarskan meriport om saudud kalanpüdusen täht, mugažo kazvatadas da ümrbiratas kalad. Om severz'-se sömtegimišton toižid edheotandoid: jauhkombinat, maidtegim. Sötmižmerikoren samižen da ümbriradmižen tegim^[1] om üks'jäine mugoine valdkundas. Lotosan plantacijad kazdas lidnan ümbrištos. Lidn om klimatine lebutaho, tervehtajad veded rikvezinikanke.

Geografijan andmused

Lidn sijadase Azovmeren päivnouzmaižel randal, läz Ahtarskan i Jasenin lahtid, Azovveren da Kubanin tazangištol, kaks' metrad ü.m.t. keskmäižel korktusel.

Matkad Krasnodarhasai om 150 km suvipäivnouzmha avtotedme vai raudtedme. Raudtestancijan nimi om Ahtari (ven.: Ахтари). Sodalendimport sijadase lidnan pohjoižpäivnouzmaiženno röunanno. Lähembaine lidn om Timašovsk 70 km suvipäivnouzmha orhal, raudtedme vai avtotedme.

Klimat om ven läm' kuivahk, ei olele lumikatet. Heinku om kaikiš lämhemb — +24,6 C°, vilukun keskmäine lämuz om −0,8 C°. Ekstremumad oma −27,8 C° (viluku, uhoku) i +40,7 C° (heinku, eloku). Paneb sadegid 587 mm vodes, läz tazomäras kuidme, enamba kezakus-elokus (52..60 mm kus) i kül'mkus-vilukus (51..62 mm kus), vähemba sulakus (39 mm) i redukus (40 mm).

Tobmuz

Kaik nell' eländpunktad om lidnankundas, ned oma kaks' pen't žilod (Primorskii, Ogorodnii) i Sadki-futor lidnan ližaks.

Lidnankundan tobmuden pämez' om sen Administracijan pämez'. Edeližed Administracijan pämehed oma Ivan Nečaev (eloku 2022 — heinku 2023), Artöm Sošin (keväz'ku 2020 — heinku 2022), Väčeslav Belik (reduku 2018 — keväz'ku 2020) i Vladislav Mavreško (2014 — reduku 2018).

Eläjad

Vn 2010 Venäman rahvahanlugemižen mödhe lidnan eläjiden lugu oli 32 257 ristitud, vn 2021 — 31 087 ristitud. Vl 2017 kaik 31 925 ristitud elihe lidnas i 34 596 ristitud kaikes lidnankundas. Kaikiš suremb lidnan ristitišt oli 34 tuhad eläjid vozil 1996−2001 (34 100 rist. vll 1998 i 2000).

Rahvahad (enamba 0,4 % vl 2010)^[2]: venälaižed — 93,0 %, ukrainalaižed — 2,5 %, vaugedvenälaižed — 0,5 %, armenijalaižed — 0,4 %, toižed rahvahad — 2,9 %, rahvahuden ozutandata — 0,7 %.

Ortodoksižen hristanuskondan kaks' jumalanpertid oma avaitud lidnas: Nimitadud Eläbzdusen^[3] i Venäman Uden moknikoiden da pühäpaginan kundlijoiden.

Lapsiden opendusen aluzkundad oma severz'-se päivkodid, keskškolad. Primorsko-Ahtarskan industrijan da servisan tehnikum^[4] om lidnan professionaližen opendusen aluzkundaks.

Galerei

Lidnan tobmuden sauvusen tulend (2020)
Jumalanpert' sauvomižes, vn 2020 nägu
Ekstraordinarižiden situacijoiden ministrusen stancii vl 2020
Vladimir Leninan muštnik randirdal (2011)
Lendim muštnikaks vl 2013

Homaičendad

Irdkosketused

Primorsko-Ahtarskan lidnankundan tobmuden sait (prim-ahtarsk.ru). (ven.)

Primorsko-Ahtarsk Vikiaitas

	Krasnodaran randan lidnad
	Abinsk \| Anap \| Apšeronsk \| Armavir \| Belorečensk \| Gelendžik \| Gul'keviči \| Hadižensk \| Hul Purde \| Jeisk \| Korenovsk \| Krasnodar \| Krimsk \| Kropotkin \| Kurganinsk \| Labinsk \| Novokubansk \| Novorossiisk \| Primorsko-Ahtarsk \| Slavänsk Kubanil \| Soči \| Temrük \| Tihoreck \| Timašovsk \| Tuapse \| Ust'-Labinsk

[1] Sötmižmerikoren «Ahtarskii»-tegimen sait (zavodaht.ru). (ven.)

[2] Итоги переписи 2010 Краснодарского края: Население по национальности и владению русским языком (Vn 2010 Krasnodaran randan rahvahanlugemižen lopmižed: Ristitišt rahvahuden i venäkelen mahtoiden mödhe, krsdstat.gks.ru). — 52 lp. — Lpp. 39−40. (ven.)

[3] Nimitadud Eläbzdusen jumalanpertin tulendan sait (primorsko-1.cerkov.ru). (ven.)

[4] Primorsko-Ahtarskan industrijan da servisan tehnikuman sait (патис.рф). (ven.)

[1]

[2]

[3]

[4]