Slavänsk Kubanil

Slavänsk Kubanil
Славянск-на-Кубани

Lidnanznam	Flag
Valdkund	Venäma
Eläjiden lugu (2023)	61,449 ristitud
Pind	43,5 km²
Pämez'	Aleksandr Bersenöv (kül'mku 2017—)
Telefonkod	+7−86 146-xx-xxx
Avtokod	23, 93, 123
Aigvö	UTC+3 (MSK+0)

Slavänsk Kubanil (ven.: Славя́нск-на-Кубани) om Venäman lidn da lidnankund Krasnodaran randan päivlaskmas. Se om Slavänskan rajonan administrativine keskuz.

Istorii

Nügüdläižen eländpunktan aluz om pandud vl 1865 kuti Slavänskai-stanic (ven.: станица Славянская), nimitihe gusariden polkan mödhe (1776−1783) Suvorovan ohjandusen al. Vspäi 1913 Protok-raudtestancii (ven.: Протока «jogen hijam») om saudud «Krimsk — Timašovsk»-keskustal. Vll 1942−1943 stanic oli okkupiruidud nacistižen Germanijan sodavägil. Eländpunkt sai lidnan statusad vn 1958 28. päiväl semendkud udenke nimenke erištamha Ukrainan lidnaspäi.

Slavänsk Kubanil šingotase kivivoin ümbriradmižen, sauvondmaterialiden tehmižen (savič, katuzmaterialad, raudbetontegesed) i sömtegimišton keskuseks sijaližel torhudel (konserv-, vin-, argvoin da saguden, risan surimen tegimed, lindkombinat), mugažo omblendfabrik i kurortkompleks ratas lidnas. Slavižen kul'turan rahvahidenkeskeine festival' oleleb lidnas uhokun augul, vedadas vspäi 2004. Lidn om ümbärtud maižandusen järedoil edheotandoil: risan, ploduiden da marjoiden kazvatuz.

Geografijan andmused

Lidn sijadase Kuban-jogen suhišton Protok-hijaman hural randal, kahesa metrad ü.m.t. keskmäižel korktusel.

Matkad Kuban'-jogehesai om kuz' kilometrad suvhe, Krasnodarhasai om 70 km päivnouzmha orhal vai 80 km avtotedme. Lähembaine lidn om Krimsk 40 km suvhe orhal, raudtedme vai avtotedme.

Tobmuz

Slavänsk Kubanil om lidnankundan üks'jäižeks eländpunktaks. Lidnankundan pind om 43,5 nellikkilometrad. Trudobelikovskii-futor (9393 rist. vl 2010) röunatab lidnanke, no levitase toižes Krasnoarmeiskajan rajonas.

Lidnankundan tobmuden pämez' om sen Administracijan pämez'. Edeline Administracijan pämez' om Aleksandr Konovalov, radoi vn 2017 kül'mkuhusai. Lidnankundan nevondkundan ezimez' om Andrei Rakulenko vn 2005 tal'vkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 63 842 ristitud, rajonan ristitišton pol', vn 2021 — 62 985 ristitud. Vl 2017 lidnan ristitišt oli 66 014 eläjad. Kaikiš suremb lidnan ristitišt oli 67 919 eläjad vl 2020.

Rahvahad (enamba 0,4 % vl 2010): venälaižed — 92,0 %, armenijalaižed — 3,5 %, ukrainalaižed — 1,6 %, toižed rahvahad — 2,4 %, rahvahuden ozutandata — 0,5 %.

Ortodoksižen hristanuskondan kuz' pühäpertid oma kaičenus i saudud lidnas: Pühän Emäganpäivän päjumalanpert' i viž jumalanpertid. Armenižen jumalankodikundan Ph. Sarkisan jumalanpert' om avaitud. Protestantizman kuz' pühäpertid oma saudud, niiden kesken baptizman kaks' jumalanpertid.

Lapsiden opendusen aluzkundad oma nell'toštkümne päivkodid (nomer 1..5, 7, 9, 10, 12..15, 17, 24), kuz' keskškolad (nomer 3, 5, 12, 16..18), kaks' liceid (nomer 1 i 4), ližaopendusen keskuz, koume lapsiden da norišton sportškolad. Slavänskan maižandusen, elektrotehnologine i privatine ekonomikan da oiktusen tehnikumad oma lidnan professionaližen opendusen aluzkundoikš.

Galerei

• 
  Vladimir Leninan muštnik (2014)
• 
  Pühän Emäganpäivän päjumalanpert', vn 2007 nägu
• 
  Slavänskan valdkundaline pedagogine institut vl 2011 (nüg. Kubanin valdkundaližen universitetan filial)
• 
  Lidnan kul'turkeskuz (2009)
• 
  Lidnan istorijan kodirandantedištandmuzei vl 2018

Irdkosketused

• Lidnankundan tobmuden sait (cityslav.ru). (ven.)