1

ESHTA LAIKA
Ga Hpaw
Eshta gaw Persi (Persia) kaw nga ai Yuda num kasha rai nna , Persi hkaw hkam Ahasuru (486-
465 BC) (Xerxes I ngu nna mung mying gum hkawng ai wa re. Xerxes gaw Greek mying re.) a madu jan
tai wa ai re. Eshta laika gaw Eshta a majaw Yuda ni si htum mat hkyen ai kaw na lawt lu ai lam ka da ai
laika re.
Mying Hte Dinghku labau
Eshta a ngu ai mying gaw Persi (Persian) mying rai nna lachyum gaw Shagan (sh) Venus shagan (star
Venus) ngu ai re. Chyum ninghkring n kau mi chyawm gaw Babylon ni a grai mying gumhkawng ai
num hpara Ishtar a mying hpe shamying da ai mying she re ngu hkam la ma ai. Eshta a Yuda mying
gaw Hadassah rai nna lachyum gaw kabrim tu ala ai namlap ni prut ai sumwum (myrtle) ngu ai re.
Bejamin a myu lakung na Abihal a kasha rai n htawm, shi a lawu lahta kahpu daw ai Mordehkai mying
ai wa kasha hku yin la bau maka ai hta kaba wa ai num sha re. Shi a kaji kawa ni gaw Babylon
hkawhkam Nebuchadnezzar a lak htak hta Yerusalem kawn Babylon de bawng hku woi mat wa ai kaw
lawm ai ni rai ma ai.
Lak Lai Ai Lam
Ahasuru a shawng na hkawhkam ni Yuda amyu sha ni hpe tinang a dai lup dai hpang ga de
bai nhtan wa lu na ahkang jaw ma ai. Rai tim Yuda masha law law wa n kam nhtang wa ma ai.
Yerusalem mare hte nawku htingnu gaw gap na lam hta ru yak jam jau hki ba lit li na hpe n kam ai hta
sha n-ga, ya shanhte nga ai shara hta matut nga ai lam gaw grau hkrak ai ngu hkam la ma ai. Shanhte
a sut lu nga mai lam ni law htam wa tim, wenyi lam hte seng ai Yuda nawku htung hpe bai shagreng
na matu gaw myit nau n lawm ma ai.
Eshta laika gaw Yuda ni a dai zawn re ai myit jasat hpe htawng madun da ai re. Eshta laika a
lak lai ai lam gaw Isralea amyu sha ni Persi mung hta atsai awai sat shamyit kau ai hkrum hkyen ai
kaw nna, Yehowa Karai Kasang hkye shalawt la ai lam re. Eshta laika hta Karai Kasang hkye shalawt la
ai ngu nna ka da ai lam n rawng tim, mabyin mahkra hta Karai Kasang lam woi bau sin makawp maga
nga ai lam hpe chye na la lu shangun nga ai.
Shingdu Labau
Eshta a lam gaw, Persi ni mungkan hpe up ai aten hta byin ai labau mabyin re {BC 539 (Dan.
5:30,31) kawn BC 331 (Dan 8:1-27)}. Hkaw hkam Ahasuru gaw Persi mungkan hpe 486-465 BC hta up
ai wa re. Eshta laika na mabyin gaw Yuda ni Babylon kawn bawng dung ai 70 ning na ai hpang,
shawng nnan lang Yerusalem de Zerubbabel (538 B.C (Ezra 1-6) woi awn ai hte bai nhtang wa ai aten
hte, Ezra woi awn ai hte BC 458 (Ezra 7-10) lahkawng lang ngu na Yuda ni Yerusalem de nhtang wa ai
aten laman hkan Persi mung a mare daju Susa e byin ai mabyin re.
Eshta hte Pru Mat Wa ai Laika ni gaw tara maigan ni a mungdan hta Israela ni zingri zingrat
hte amyu shamyit masing kata nni nkri myit htum myit si hkrum hkra ai lam ni hpe ka matsing da ai
laika ni re. Abraham hte ga shaka tawn nna Israela hpe amyu shatai la ai Yehowa Karai Kasang a
chyeju jaw hkrang shaw la ai mau hpa labau mabyin ni hpe sakse hkam ka matsing da ai laika ni mung
rai nga mali ai. Eshta laika na mabyin a laklai ai lam gaw, Israela labau hta Purim poi ngu ai hpe
shagrin da lu nna, dai ni du hkra shaning shagu galaw ai lam rai nga ai. Hpyen ni a lata na lawt wa lu
ai majaw, yawn hkyen ai kaw nna kabu gara ai de, sharung shayawt ai kaw nna mai kaja ai de, gale ai
nhtoi) ngu ai Adara shata shi mali ya hte shi manga ya (Feb- Mar lappran hkan ang ai shani re) hpe
shaning shagu hkan matsing da nna, dai shani lahkawng hpe kabu gara nga let poi sha ai hte shada da
kumhpa karan jaw gam ya ai shani shatai ma ai (9:20).
Laika Ka Ai Wa Hte Laika Ka Ai Shaning
 2

Mordehkai (sh) Ezra (Sh) Nehemiah langai ngai ka ai rai na re ngu sawn la ai ni nga tim, dai
gaw ngang kang ai lam n nga ai majaw, dai ni du hkra Eshta Laika hpe kadai ka ai ngu ai hkrak tup n
chye lu ga ai.
Hkawhkam Ahasuru (486-465 BC) gaw Xerxes I re ngu hkam la ai ni hkam la ai gaw Eshta
Laika hpe Ahasuru (486-465 BC) si ai hpang she ka ai re ngu sawn la ai majaw ka ai shaning hpe BC
465 hpang daw de ka ai re ngu sawn la ma ai. Daw Kaba 10:2 hta hkawhkam Ahasuru (486-465 BC)
up ngut ai aten du hkra na lam rawng ai re majaw Eshta Laika ka ai aten gaw jau dik BC 5 a lapran
daw hte, hpang hkrat dik gaw BC 331 a shawng daw, Greek ni Persi (Persian) hpe rai n gasat dang la
shi aten rai na re ngu ai hku sha chyum ning hkring ni law malawng hkam la ma ai.
Eshta Laika a yaw shada ai lam
(1) Karai Kasang a amyu rai nga ai Israela amyu hpe ninghkap ai lam n galaw na matu sadi jaw ai re.
Isreala amyu gaw Karai Kasang lak san lata la ai amyu rai nna, Karai a hpung shingkang hte yu bau
maka la hkrum ai amyu re. Eshta laika gaw Isreala ni a lak lai ai labau mabyin langai hpe madi madun
mayu ai lam rai nga ai.
(2) Karai Kasang gaw shi lata la ai Israela amyu ni a byin da masa ni hta jum tek reng hkang bau maka
nga ai ngu ai hpe tsun dan ai lam re.
(3) Israela amyu ni hte Purim poi gara hku byin pru wa ai ngu ai hpe sang lang dan ai lam re (9:20-32).
Malawm Ni (Contents)
I. Hkawhkam a madu jan Washti aya jahkrat hkrum ai lam (1:1-22)
A. Hkawhkam Ahasuru shi a hkawhkam htungnu na sun wing kata e sanit ya tup poi galaw ai lam (1:1-
9).
B. Hkawhkam a madu jan Washti hkawhkam wa shaga ai hpe nainghkap ai lam (1:10-12).
C. Hkawhkam a madu jan aya kaw na Washti jahkrat kau hkrum ai lam (1:13-22).
II. Eshta hkawhkam a madu jan tai wa ai lam (2:1-18)
A. Hkawhkam wa hkawhkam jan nnan tam ai lam (2:1-4).
B. Eshta hkawhkam a madu jan tai wa ai lam (2:5-18).
III. Hkawhkam wa lagyim gyam sat maw ai ni a lata na lawt lu mat wa ai lam ( 2:19-23).
IV. Haman Wa Yuda ni hpe sat shamyit na ginjang tam ai lam (3:1-15)
A. Haman wa aya sharawt hkrum ai hte Yuda ni hpe sat shamyit na hkyen lajang ai lam (3:1-6).
B. Haman wa Yuda ni a lam hkawhkam wa hpe shi shawk ai hte Yuda amyu sha ma hkra hpe atsai
awai sat shamyit na laika shabra ai lam (3:7-15).
V. Eshta Haman a lam hpe chye nna ladat shaw ai lam (4:1-5:8)
A. Hkawhkam wa hpe hpyi thing lu thing lai na matu Eshta hpe Mordehkai shadut ai lam (4:1-17).
B. Eshta Hkawhkam wa hte Haman hpe lu sha poi saw shaga ai lam ( 5:1-8).
C. Haman Mordehkai shi hpe hkrit hkungga ai lam n galaw ai majaw pawt sindawng nna wudang hta
shadau sat na matu, wudang hkyen lajang shangun ai lam (5:9-14).
VI. Mordehkai hpe hkawhkam wa shagrau shatsaw la ai lam (6:1-14)
A. Mordehkai a lam hkawhkam wa myit dum ai hte shagrau shatsaw ai lam (6:1-11).
B. Haman yawn kaya hkrum ai lam (6:12-14).
VII. Tengman ai mabyin dawng pru wa ai lam (7:1-8:17)
A. Eshta lahkawng lang ngu na lu sha poi hkyen nna, dai poi hta Haman yuda ni hpe sat shamyit na
matu n hkru n hkra bungli galaw ai lam hkawhkam wa hpe tsun dan wu ai (7:1-6).
B. Hkawhkam wa Haman hpe pawt nna, Mordehkai hpe shadau sat na matu Haman hkyen da ai
wudang hta Haman hpe noi sat kau shangun ai lam (7:7-10).
 3

VIII. Haman a amyu shamyit masing kaw na Yuda ni lawt lu ai lam (8:1-10:3).
A. Haman wa a maw lanyet hte hpaji daw ai majaw ndau kau sai, hkawhkam wa shawng a mying hpe
hkawhkam wa n mai shaprai ai majaw, Yuda ni hpe tinang amyu hpe makawp maga let tinang hpe
hpyen ai ni nlang hte hpe atsai awai sat shagrawm lu na ahkang n dau ai lam ( 8:1-17).
B. Yuda ni tinang hpe hpyen ai ni hpe sat shamyit lu ai ahkang lu la ai lam ( 9:1-19).
C. Haman a maw lanyet kaw na Karai Kasang shalawt la ai hpe myit dum ai Purim poi nhtoi byin pru
wa ai lam (9:20-32).
IX. Mordehkai Shagrau shatsaw la hkrum ai lam (10:1-3)
A. Mordehkai gaw hkawhkam wa a malai tai lu ai du hkra re ai, arawng aya sharawt la hkrum ai lam
( 10:1-3).
Eshta Laika A Mabyin ginchyum
Hkawhkam Ahasuru shi a madu jan ga n madat ai majaw aya jahkrat kau ngut ai hpang,
hkawhkam jan nnan bai lata na daw dan ai re. Dai lata poi hta hkawhkam wa a asak hpe hkye la ga ai
(1:1-2:23) Mordehkai a kasha (kasha hku bau maka da ai) Eshta lata la hkrum ai re.
Dai hpang gumrawng ai hte myit kaba ai Haman gaw hkringmang daju tai wa ai re, Haman
gaw Yuda ni hpe n ju n dawng ai wa rai nna, Mordehkai shi hpe gum dagup naw ku ai lam n galaw ai
majaw pawt sindawng nna, Mordehkai hpe wudang hta shadau sat na hte Persi mungkan ting na
Yuda amyu ni hpe sat shamyit na matu maw da wu ai (3:1-15). Haman nhtoi lata nna Yuda ni hpe sat
shamyit na hkyen ai hpe chye ai shaloi, Mordehkai gaw Yuda ni lawt lu lam lu la na matu Eshta hpe
hkawhkawm wa kaw sit shang let hpyi nem na matu shadut wu ai (4:1-5:14). Eshta hkawhkam wa
hpe shi mung Yuda re ai lam tsun dan let Haman a maw lanyet lam hpe tsun dan wu ai. Hkawhkam
wa mung shi a madu jan hkawhkawm jan hpe du hkra sat shamyit na gyam ai maw lanyet hpe na
pawt nna Haman hpe, shi Mordehkai hpe shadau sat na hkyen da ai wudang hta shadau sat kau
shangun wu ai (6:1-7:10).
Dai hpang Mordehkai Persian mungkan a hkringmang daju tai wa nna, Yuda ni hpe sat
shamyit na nhtoi hpe, Yuda ni lawt lu ai n htoi hku mast nna Purim poi galaw shangun wu ai.
Mordehkai a marang e Yuda ni galu kaba ai hte ngwi pyaw simsa lam lu la ma ai( 10:1-3).
Ahkyak Ai Ga Lami Ni
1. Wenyi Lam Hta Kung hpan jat wa ai lam (4:8): Eshta laika hta Eshta a wenyi makam masham lam
kung hpan galu kaba jat ai wa ai lam hpe ka shaleng da ai re. Eshta laika npawt daw hta shanhte a
wenyi lam gaw lak lai ai kum la n mu lu ai. Yerusalem mare de bai wa nna a mare hte amyu hpe bai
gaw gap na hta mung n lawm ai ni re. Shawng daw de Eshta gaw shi hkum shi Karai Kasang lata la ai
amyu hta na amyu shayi sha re ngu ai hpe makoi magap ip da wu ai (2;10). Da hku tinang a amyu
majing hpe makoi magap da let, hkawhkam jan tai lu na ra lata poi hta shang lawm wu ai. Dai hku nna
hpara sumla ni hpe nawku ai tara maigan hkawhkam a madu jan tai wa wu ai. Dai gaw Yehowa Karai
Kasang Isralea ni hpe hkang da ai ‘Nanhte gaw shanhte hte n mai kanawn, shanhte mung nanhte hta
n lawm u ga’ ngu (Pru 34:16; I Hkaw HKam 11:2) tara maigan ni hte dinghku n mai de ai lam hkang da
ai ga hpe lale ai lam rai nga ai. Isreala ni hpe atsai sat shamyit na Haman a maw lanyet hta hkawhkam
wa kadawng bang mat ai shaloi mung, hkawhkam wa hpang de sit shang na matu hkrit tsang ai kum
la hpe mung mu lu nga ai.
Mordehkai gaw Yehowa Karai Kasang hta lai nna kadai hpe mung gum dagup naw ku ai lam n
galaw ai re. Hkawhkam Ahasuru hkang da ai, Haman hpe gum dagup naw ku ra ai ngu ai hpe lale ai
hku nna mung, tinang a makam masham hta tinang kade manoi manat, tinang a myu hpe kade
daram tsaw ra manu shadan ai ngu ai hpe madun wu ai re. Mordehkai a shadum jahprang ai hte
maren, hpang daw de Eshta gaw tinang a tinggyeng matu sha myit mang sak hkrung ai jan n rai mat
sai sha, Karai Kasang lata la ai tianng a amyu sha ai yawng, hten byak n hkrum na matu, asak dan nna
ap nawng daw jau sai re. Anhte yawng a wenyi lam mung, tinang a tinggyeng akyu matu sha myit
 4

mang sak hkrung ai ni n rai, manang wa a matu, shawa a matu, tinang a amyu a matu ap nawng daw
jau na hpe sharin ya nga ai.
(i) Wenyi lam hta kung hpan wa ai lam (4:8).
(ii) Tinang a matu myit tsang ai Eshta (2:10, 12-17, 20; 4:10-11).
(iii) Karai Kasang a matu myit shatawng ai lam (4:15-16; 5:1-8).
(iv) Karai lata la ai amyu a matu myit da ting shakut ai Mordehkai (2:10,11,19-23; 3:2).
(v) Yehowa Karai a ntsa Mordehkai tsawn ai makam (3:3-4; 4:8, 12-14,17).
2. Yehowa Karai Kasang chyeju jaw ai lam 6: Eshta laika hta Yehowa Karai Kasang hte seng nna tup
hkrak ka sang lang da ai lam n rawng tim, mabyin masa yawng gaw Yehowa Karai Kasang a bau sin
makawp maga lam woi nga ai lam hpe hkai dan ai lam ni rai nga hpe mu lu ga ai. HKawhkam jan
Washti hpe aya jahkrat kau nna Eshta hkawhkam jan byin wa ai lam, hkawhkam wa a myit hta num
kasha ni yawng hta Eshta hpe grau tsaw ra ai myit byin pru wa shangun nna, hkawhkam jan shatai ai
lam, Hkawhkam wa yup n pyaw nna jahpan labau lai ka ni hpe hpaw hti shangun ai lam, Hkawhkam
Ahasuru Mordehkai hpe shagrau shatsaw na daw dan ai aten hte Haman wa Mordehkai hpe noi jen
sat lu na latu hkawhkam wa hpang de sit shang ai aten gaw langai sha rai nga ai mabyin lam,Haman
shagrit kau hkrum ai ten Eshta hkamhkam wa hpe hpyi shawn na matu aten lata ai mabyin lam,
hkawhkam wa gawk de shang wa ai aten Haman hkawhkam jan Eshta dung ai makau kaw gum dagup
nga ai mabyin lam ni gaw, shingdu kaw nna Yehowa Karai Kasang yu reng nga ai lam hpe madi madun
ai lam ni rai nga ai. Dai ni anhte a matu mung, Kam sham ai hpung masha ni yawng a sak hkrung lam
hta mung Karai Kasang yu reng bau maka lam madun la nga ai lam hpe chye na la lu shangun ai lam
rai nga ai.
(i) Karai Kasang chyeju jaw nga ai lam (6).
(ii) Ndai aten e ning re ai amu gun hpai lu na matu, nang hkawhkam jan tai lu ai, nawn shara nga ai n
rai ni? (4:14).
(iii) Karai Kasang reng hkang lam woi nga ai sakse ni ( 5:1-2; 6:1-10; 7:6-8).
3. Lawt Lu shangun ai lam (8:11-12): Mordehkai gaw, Karai Kasang kaw na shalawt la ai lam teng sha
du wa na ra ai lam tup hkrak kam sham wu ai. Yehowa Karai Kasang a chyeju majaw Israela amyu sha
ni hten bya hkrum na malai, shanhte hpe hpyen ai ni mahtang she hten bya hkrum ma ai. Yuda ni
gaw shanhte hpe hpyen ai ni hpe dang sha lu na matu ahkaw ahkang lu tim dip ka-up roi rip dang sha
ai lam n galaw ma ai. Shanhte hpe hpyen ai ni hten bya hkrum ai majaw n re ai sha, Yehowa Karai
Kasang shanhte hpe chyeju hte shalawt la ai lam hpe shakawn kungdawn ai Purim ngu ai nhtoi hpe
galoi n hprai ai sha galaw hpang wa lu ma ai. Eshta gaw, Yuda masha ni hkye shalawt la hkrum na
matu tiang a asak hpe dan nna shakut shaja ai lam gaw, Ga Shaka Ningnan hta Yesu Hkristu yubak lu
ai shinggyim amsha ni hten bya n hkrum u ga tinang hkum hpe hkungga shatai si hkam ai hpe htawng
madun dan ai lam a npawt rai nga mali ai.
(i) Lawt Lu shangun ai lam (8:11-12).
(ii) Hkawhkam wa daw dan ai lam (8).
(iii) Purim poi. (9:18-32).
(iv) Hpyen wa a arung rai ni hpe zingla ai lam n galaw ai (8:11-12; 9:10,15-16).
4. Lu Sha Gam Ai Lam (4:15): Lu sha gam ai lam hte seng nna chyum laika hta yaw shada ai lam law
law hku galaw ma ai hpe mu mada lu ga ai. (i) Yubak mara raw dat ya ai nhtoi hpe myit dum ai hku
nna lu sha gam ai lam (ii) myi hki lit li ai hte yawn hkyen ai hpe madun ai hku nna lu sha gam ai lam
(iii) Shut hpyit tawt lai ai yubak mara a matu myit malai lu ai hpe madun ai hku nna lu sha gam ai
lam, (iv) Bawng dung hkrum ai mahkrum madup hpe myit dum ai hku nna lu sha gam ai lam, (v)
amyu sha yawng ahkyak di ai lam pru wa ai aten Karai Kasang hpe nawku daw jau ai hku nna lu sha
gam ai lam (vi) Dinghkrai akyu hpyi ai lam hte wenyi n-gun lu la na matu lu sha gam ai lam (vii)
ahkyak ai lam ni daw dan hparan ra ai lam ni a matu lu sha gam akyu hpyi sit shang ai lam ni hku lu
sha gam ma ai re. Eshta laika hta gaw amyu sha ni hten bya hkrum na lam kaw nna Karai Kasang
shalawt la ai chyeju hkam la lu na matu lu sha gam ai lam rai ma ai.
 5

Karai Masa Mungga

(1) Karai a bau sin makawp maga ai lam: Haman a shingni maka gaw tara maigan ngu ai hpe
shaleng dan ai lam rai nna, Eshta hte Yuda ni Karai Kasang hpe ninghkap ai tara maigan wuhpawng
hta nga ra ai hpe htawng madun dan ai lam rai nga ai. Haman gaw tinang hkum grai hkrak dum, hkik
hkam dum ai hte myit shadang ai wa re (3:5-6; 6:6).Bai nna ahkaw ahkang hpe la let Yuda amyu sha
ni hpe atsai awai sat shamyit lu na nhtoi kaja hpe gyam nga ai wa re (3:7). Rai tim yawng mayawng
gaw Yehowa Karai Kasang a yu lahku bau sin ai n pu e rai nga ai hte maren, Karai sharawng awng ai
lam hte nhtan shai ai lam ni gaw jahtum e hkrat sum mat ai hkrai re.
Persi kaw nga ai Yuda ni Haman wa maw lanyet shaw ai shaloi, hkrit tsang ai lam kaba hte
hkrum katut ma ai. Rai tim Yehowa Karai Kasang gaw shi a amyu sha ni hpe tut nawng myit dum nga
ai hte maren, hkye shalawt ai chyeju jaw wu ai. Mau hpa lamik kum la ni hte n re ai sha, shinggyim
masha shada a kanawn mazum, gaw gap nga pra ai mabyin lam ni hku nna hkye shalawt ai bungli hpe
galaw ai Karai re. Jahtum e Yuda amyu sha ni mung, Karai Kasang gaw shanhte a mai kaja lam a matu
bungli galaw nga ai Karai, yu lahku bau maka nga ai Karai re ngu ai hpe chye na hkam la lu ma ai.
(2) Karai Kasang a amyu sha ni: Eshta laika hta Yuda amyu sha ni hpe Karai Kasang a amyu sha ni re
ngu ai a lak lai lam hpe htawng madun da ai re. Rai tim, Karai Kasang a amyu ni gaw Karai Kasang hta
manoi manat ai hte, Karai hte tawn da ai ga shaka hta manoi manat ai shaloi she shim lum lam, ngwi
pyaw simsa lam lu ai hpe lachyum shaleng dan da nga ai. Mordehkai a Karai Kasang n tsa sadi dung
kang ka ai hte amu bungli hta kangka ai lam, Eshta a n den marai hte shi nan yuda re lam hkawhkam
wa hpe tsun dan let Yuda amyu sha ni a matu gwi gwi tsap ai lam ni gaw Yuda amyu sha yawng hpyen
wa a lata kaw na lawt lu ai chyeju lu la shangun ai lam madung tai wa ai re. Jahtum hta gaw Karai
Kasang a amyu ni gaw hti hkum hku n law tim, mau hpa amu bungli shadan lu ai amyu hku mungkan
hta pra nga lu ai hpe htawng madun dan ai mungga rai nga mali ai.
Sharin La Na Lam Ni
(1) Karai Kasang yu lahku bau maka nga ai lam hpe kam hpa nga ra ai.
(2) Karai Kasang a timing ngu ai nga ai hpe kam sham ra ai.
(3) Mai kaja ai magam bungli galaw nna, hpang na lam yawng hpe Karai hta ap da ra ai.
(4) Ra ahkyak dik ai aten ni hta lu sha gam hpyi nem sit shang ra ai.
(5) Karai a amyu ni gaw hti hkum hku mi n law dam tim, mungkan hta Karai Kasang a mau hpa hpung
shingkang hpe shadan shadawng lu ai hpe myit dum nga ra ai.