Colexio de San Xerome
| Colexio de San Xerome | |
|---|---|
 Colexio de San Xerome | |
| Edificio | |
| Tipo | Colexio residencial |
| Estilo | barroco galego, románico |
| Enderezo | Praza do Obradoiro |
| Localización | Santiago de Compostela |
| Coordenadas | 42°52′48″N 8°32′44″O / 42.88, -8.54555556 |
| Construción | |
| Construción | século XVII, con pórtico medieval |
| Remate | 1652 |
| Dimensións | |
| Plantas | planta terrea e sobrado |
| Equipo | |
| Arquitecto(s) | Descoñecido |
| [ editar datos en Wikidata ] | |
O Colexio de San Xerome, dito tamén Colexio de Artistas, é un edificio civil de Santiago de Compostela, sito no lado meridional da praza do Obradoiro, cerrándoa por ese lado.
Historia
[editar | editar a fonte]Este colexio menor[1] era, en orixe, unha fundación do arcebispo compostelán Alonso de Fonseca, terceiro dese nome, con intención de dedicalo a colexio de estudantes pobres e artistas, que se localizaba no denominado Hospicio da Acibecharía. Dependía do Colexio de Fonseca.
Durante o século XVII, en 1651, decidiuse trasladalo desa localización.[2] Para iso edificouse un novo edificio, na entón chamada praza do Hospital (por situarse nela o Hospital dos Reis Católicos), a actual praza do Obradoiro. Até hai poucos anos atribuíanse os planos ao arquitecto Bartolomé Fernández Lechuga (así Chamoso Lamas), e o patio ao prestixioso José de la Peña de Toro. Porén, debe dicirse que o autor da edificación é descoñecido.
Dotado dun vicerreitor e tres profesores, desapareceu como colexio menor en 1840.[1]
Descrición
[editar | editar a fonte]O resultado foi un edificio de liñas puras e apenas dous corpos de altura, no que se insertou o pórtico medieval, proveniente do devandito Hospicio, que até aquela altura acollía o colexio, que se acostuma datar entre 1490 e 1500. Este elemento arqueolóxico foi mal interpretado en anos pasados, ao tomarse por unha longa persistencia de hábitos construtivos dos mestres arquitectos galegos e proba do arraigo da arte románica en Galiza.
A portada representa, na esquerda e de dentro a fóra, as figuras de Santiago apóstolo, San Xoán e San Francisco. Á dereita e na mesma orde, San Pedro, San Paulo e San Mauro[3].
No tímpano, a figura da Inmaculada, flanqueada por Santa Margarida e Santa Catarina.
Na arquivolta, a Virxe co Neno, no centro, rodeada de figuras de santos e santas.
Galería de imaxes
[editar | editar a fonte]
Usos
[editar | editar a fonte]Durante boa parte do século XX, foi sede da Escola Normal de Maxisterio. Desde os anos 1980, e xunto co pazo de Fonseca, alberga o Reitorado da Universidade de Santiago.
Notas
[editar | editar a fonte]- ↑ 1,0 1,1 "Historia institucional/Reseña biográfica". Galiciana. Arquivo Dixital de Galicia. 119295. Consultado o 9 de xuño de 2022.
- ↑ Montero, Juan Manuel Monterroso (1996). "Universidade e cidade: apuntamentos sobre desenvolvemento urbano da Universidade de Santiago de Compostela". Eduga: revista galega do ensino (11): 195. ISSN 1133-911X.
- ↑ Ficha na web de Turgalicia
Véxase tamén
[editar | editar a fonte] |
Commons ten máis contidos multimedia sobre: Colexio de San Xerome |
