Pous Leo IV
| Pous Leo IV | |
|---|---|
| |
| Pontifikaat begin | 10 April 847 |
| Pontifikaat eindig | 17 Julie 855 |
| Voorganger | Sergius II |
| Opvolger | Benedictus III |
| Gebore | ±790 Rome, Italië |
| Sterf | 17 Julie 855 Rome, Italië |
| Ander pouse genaamd Leo | |
Leo IV was die 103de pous van die Rooms-Katolieke Kerk.
Biografie
[wysig | wysig bron]Pous Leo IV is in Rome gebore die seun van Radoaldus. Op 10 April 847 volg hy Pous Sergius II op en regeer tot sy dood op 17 Julie 855. Hy word opgevolg deur Pous Benedictus III. Die naam ‘Leo’ beteken 'Leeu'.
Pontifikaat
[wysig | wysig bron]Pous Leo IV is eenparig verkies tot opvolger van Pous Sergius II sonder die goedkeuring van die keiser Lotarius I. Ten tye van sy verkiesing was hy kardinaal van "Santi Quatri Coronati". Die pous se bewind is gekenmerk deur probleme met die Sarasene. Hy het die Sint Pieterskerk en die Sint Pauluskerk, wat deur hulle verniel is, herstel. Toe die Sarasene Gaeta beleër het, het die pous in 848 en 849 die mure herstel en versterk. Toe die Moslems Portus aangeval het, het hy die stede Napels, Gaeta en Amalfi aangemoedig om 'n verbond teen hulle te vorm. Cesarius, seun van hertog Sergius I van Napels het die bevel oor die vloot gekry. Die seeslag by Ostia wat daarop gevolg het, was een van die bekendste in die Middeleeue en Rafael het 'n fresco daarvan gemaak in sy kamers in die Vatikaan.
Nog 'n episode in Leo IV se lewe wat in fresco's vasgelê is, is die "Incendio di Borgo", 'n brand is die Angel-Saksiese wyk van Rome, wat volgens die legende deur die pous gestop is deur net die kruisteken te maak.
Om die Sarasene finaal te fnuik het Leo 'n nuwe muur laat bou op die regter oewer van die Tiber, dit is in 852 voltooi. Die gebied wat deur die muur omring is, is nou nog bekend as die "Civitas Leonina" (die stad van Leo).
Leo IV het drie sinodes gehou, waarvan een in 850 deur Lodewyk II bygewoon is. Die stryd met Hincmar van Reims wat gedurende sy bewind begin het, het eers tydens die bewind van Pous Nicolaas I belangrik geword.
Pous Leo IV het twee vorste gekroon. In 850 kroon hy Lodewyk II die seun van Lotarius I tot keiser van die Heilige Romeinse Ryk en in 853 kroon hy Alfred die seun van Ethelwulf tot koning van die Wes-Sakse.
Die legende dat Leo IV deur Pousin Johanna opgevolg is, is waarskynlik onwaar.
Verering
[wysig | wysig bron]Pous Leo IV word as heilige vereer in die Rooms-Katolieke Kerk. Sy feesdag is op 17 Julie.
Bibliografie
[wysig | wysig bron]- Davis, R. (2001) Book of the Pontiffs (English Translation of the Liber Pontificalis) Liverpool University Press. ISBN 0-85323-545-7
- Duff, Eamon. Saints and Sinners: A History of the Popes, Yale University Press, 2001. bl. 62–63. ISBN 0300091656
- Maxwell-Stuart, P. G. Chronicle of the Popes: The Reign-by-Reign Record of the Papacy from St. Peter to the Present, Thames & Hudson, 2002. ISBN 0500017980.
Eksterne skakels
[wysig | wysig bron] |
Wikimedia Commons bevat media in verband met Leo IV. |
- CE Inskrywing in die Catholic Encyclopedia (Engels)
- BBKL Inskrywing (met Literatuurverwysings) in die Biographisch-Bibliographisches Kirchenlexikon (Duits)
- PTA Inskrywing in "Popes through the Ages" deur J. Brusher S.J. (Engels)
Nota
[wysig | wysig bron]Saamgestel en vertaal uit die Nederlandse, Engelse, Duitse en Franse wikipedia.
Opvolging
[wysig | wysig bron]| Voorafgegaan deur Sergius II |
Pous (Pontifex Maximus) 847 – 855 |
Opgevolg deur Benedictus III |
Normdata  |
|
|---|