Katika taarifa yake ya karibuni kabisa ofisi ya Umoja wa Mataifa ya kuratibu misaada ya kibinadamu na masuala ya dharura OCHA, imesisitiza kwamba mashambulizi dhidi ya miundombinu ya kiraia hayajakoma, "hasa ​​huko Gaza Kaskazini, ambapo Shirika la Afya la Umoja wa Mataifa Duniani WHO, linaripoti hali mbaya katika Hospitali ya Kamal Adwan na ambapo 61 kati ya mashambulizi 95 yamefanyika kwenye majengo ya shule tangu tarehe 6 Oktoba 2024”.

Ofisi hiyo imesema mafuriko tayari yamesababisha uharibifu wa makazi ya muda katika Ukanda wa Gaza, lakini timu za kibinadamu zimeweza tu kutoa msaada kwa watu 285,000 kwa kufanya ukarabati kati ya Septemba na mwishoni mwa Novemba, kwa sababu uwasilishaji wa vifaa kwenye eneo hilo bado ni mdogo.

"Takriban watu wengine 945,000 sasa wanahitaji msaada wa dharura wa msimu wa baridi ili kuwalinda dhidi ya mvua na hali ya hewa ya baridi," OCHA imesema, ikibainisha kuwa "Vifaa vinasubiri nje ya Gaza, kuna vifaa 58,000 vya kuziba na zaidi ya maturubai 36,000 ambayo tayari yamenunuliwa kugharamia mahitaji ya takriban watu 400,000, lakini  hivyo vitahitaji miezi miwili kuletwa kwa kiwango cha sasa cha malori 10 yanayoingia Gaza kwa wiki”.

Kituo cha malori

OCHA imeonya kwamba “Misafara ya misaada inaendelea kukabiliwa na ukosefu mkubwa wa usalama ndani ya Gaza. Tarehe 11 Desemba, msafara wa malori 70 uliokuwa ukiingia kupitia kivuko cha Kerem Shalom ulishambuliwa kwa nguvu na waporaji, na kusababisha hasara ya karibu chakula na misaada yote. Siku hiyo hiyo, msafara wa WFP ukiondoka kwenye kivuko cha Kissufim pia ulikabiliwa na mashambulizi, na malori manne kati ya matano kuporwa.”

Shirika hilo limeongeza kuwa wahudumu wa kibinadamu wamesisitiza kuwa mashambulizi hayo yanaweza kuepukwa, wakiashiria makubaliano Jumanne iliyopita na mamlaka ya Israel ambayo yaliruhusu msafara wa Umoja wa Mataifa kutumia njia ya Philadelphi inayotenganisha kusini mwa Gaza na Misri kufikia karibu watu 200,000 wanaokabiliwa na uhaba mkubwa wa chakula.

OCHA imeripoti kuwa kati ya tarehe 1 na 16 Disemba, kati ya shughuli 339 za misaada zilizopangwa katika Ukanda wa Gaza zinazohitaji uratibu na mamlaka ya Israel, asilimia 30 au opetresheni 102 ziliidhinishwa, asilimia 42 au operesheni 141 zilikataliwa, asilimia 18 au operesheni 62 zilizuiwa, na asilimia 10 au operesheni 34 zilifutwa, kutokana na changamoto za vifaa na usalama.

Kuongezeka kwa magonjwa

Huku hali ya joto ikiendelea kushuka, shirika la afya la Umoja wa Mataifa WHO limeripoti kuongezeka kwa maambukizi yakiwemo magonjwa ya kupumua, kuhara na homa ya manjano.

Mwaka huu wa 2024, zaidi ya maambukizi milioni 1.2 ya magonjwa ya kupumua yamerekodiwa, pamoja na kesi 570,000 za kuhara.

Magonjwa haya yanatarajiwa kuwa mbaya zaidi, haswa kwa watoto. Limeonya shirika hilo.

Wahudumu wa kibinadamu wa Umoja wa Mataifa pia wameonya kwamba watu wengi waliokimbia makazi yao wamejenga makazi kwenye vifusi vya nyumba zilizoharibiwa huko Khan Younis, Ma'an na Bani Suhaila.

Miundo hii ni tete na iko katika hatari ya kuporomoka katika mvua zinazokuja limesisitiza shirika hilo na kusema inaongeza hatari kwa maisha ya watu.

Kuzingirwa kwa kaskazini mwa Gaza

Wakati huo huo, misaada ya kibinadamu kaskazini mwa Gaza inaendelea kuzuiwa na jeshi la Israel, ambalo limekuwa likifanya mashambulizi ya ardhini tangu tarehe 6 Oktoba, huku mapigano yakiripotiwa na makundi yenye silaha ya Palestina.

“Licha ya majaribio mengi, ujumbe wa misaada wa Umoja wa Mataifa katika maeneo yaliyozingirwa kama vile Beit Lahiya, Beit Hanoun na Jabalia umekataliwa kwa zaidi ya wiki 10", limesema shirika la OCHA.

Shirik hilo limeongeza kuwa hatua za haraka zinahitajika ili kulinda watu wengi walio hatarini wakati wa majira ya baridi, wahudumu wa kibinadamu wanasisitiza, hasa kwa wanawake na watoto wanaohitaji vifaa vya msingi kama vile nguo za joto, nepi na fmaziwa ya unga ya watoto.

Ushuru unaoongezeka

Katika wiki iliyopita, Wapalestina 273 waliuawa na 853 walijeruhiwa, kulingana na mamlaka ya Palestina huko Gaza.

Na tangu vita vilipozuka tarehe 7 Oktoba mwaka 2023 baada ya mashambulizi ya kigaidi yaliyoongozwa na Hamas nchini Israel, Wapalestina wasiopungua 45,059 wameuawa na wengine 107,041 wakijeruhiwa.

Ikinukuu jeshi la Israel, OCHA imebainisha kuwa kati ya tarehe 7 Oktoba 2023 na 17 Desemba 2024, zaidi ya Waisraeli 1,586 na raia wa kigeni wameuawa, wengi wao tarehe 7 Oktoba 2023. Idadi hii inajumuisha wanajeshi 386 waliouawa Gaza au mpakani mwa Israel na 2,488 kujeruhiwa tangu kuanza kwa operesheni ya ardhini.

Inakadiriwa kuwa Waisraeli 100 na raia wa kigeni wamesalia mateka huko Gaza, wakiwemo wale waliotangazwa kufariki dunia na ambao miili yao haijaachiliwa.