Baraza la Usalama lakutana kwa dharura kujadili kuporomoka kwa mfumo wa afya Gaza
Baraza la Usalama likijadili haliya Mashariki ya Kati likiwemo suala la Palestina
Baraza la Usalama lakutana kwa dharura kujadili kuporomoka kwa mfumo wa afya Gaza
Afya
Baraza la Usalama la Umoja wa Mataifa leo liimekutana kwa dharura mjini New York Marekani kwenye makao makuu ya Umoja wa Mataifa kujadili kuporomoka kwa huduma za afya Gaza.
Mkutano huo umeitishwa na Algeria, sauti inayoongoza kwa ulimwengu wa Kiarabu kwenye Baraza ambayo limechukua nafasi hiyo kama rais wa BBaraza kwa mwezi huu wa Januari.
Afisa mkuu kutoka Shirika la Afya Duniani WHO ametoa maelezo kwa wajumbe wa Baraza sanjari na Kamishna Mkuu wa Haki za Kibinadamu Volker Turk.
Volker Türk Kamishina Mkuuwa haki za binadamu wa Umoja wa Mataifa akizungumza kuhusu Palestina
Ulinzi wa hospitali wakati wa vita ni lazima: Türk
Kamishna Mkuu wa Umoja wa Mataifa wa Haki za Kibinadamu, Volker Türk, ameliambia Baraza hilo kwa njia ya video kwamba "janga la haki za binadamu linaendelea kuzuka huko Gaza mbele ya macho ya ulimwengu."
Ofisi yake, OHCHR, hivi majuzi ilichapisha ripoti iliainisha muundo wa mashambulizi dhidi ya hospitali, pamoja na mauaji ya wagonjwa, wahudumu wa afya na raia wengine.
Amesema mashambulizi hayo yanaanza na mashambulizi ya anga ya Israel, yakifuatiwa na uvamizi wa ardhini, kuzuiliwa kwa baadhi ya wagonjwa na wafanyakazi, kuondolewa kwa nguvu na kuondolewa kwa wanajeshi na hivyo kuacha hospitali hiyo kushindwa kufanya kazi.
Ameongeza kuwa Wakati huo huo, Hamas na makundi mengine yenye silaha yanaendelea kufanya mashambulizi ya hapa na pale na ya kiholela dhidi ya Israel, na inaripotiwa kuwaweka rehani raia na miundombinu ya kiraia kwa mashambulizi ikiwa ni pamoja na vituo vya afya kwa kufanya kazi miongoni mwao, jambo ambalo halikubaliki kabisa.
Amesisitiza kuwa "Ulinzi wa hospitali wakati wa vita ni muhimu na lazima uheshimiwe na pande zote, wakati wote".
Wagonjwa waliojeruhiwa wakiwa wamelala chini katika hospitali ya Kanal Adwan Gaza Kaskazini
Athari mbaya
Bw. Türk amesema uharibifu wa hospitali kote Gaza unakwenda zaidi ya kuwanyima Wapalestina haki yao ya kupata huduma za afya zinazofaa. Viftuo hivyo pia hutoa mahala salama kwa watu ambao hawana mahali pengine pa kukimbilia.
Ameongeza kuwa uharibifu wa hospitali ya Kamal Adwan Ijumaa iliyopita hospitali ambayo ni ya mwisho kufanya kazi katika eneo la Gaza Kaskazini unaonyesha mwenendo wa kumbukumbu ya mashambulizi.
"Baadhi ya wafanyakazi na wagonjwa walilazimika kutoka hospitalini huku wengine, akiwemo Mkurugenzi Mkuu, wakiwekwa kizuizini, kukiwa na taarifa nyingi za kuteswa na kunyanyaswa."
Ameripoti kwamba kote Gaza, operesheni za kijeshi za Israeli katika hospitali karibu zote zimekuwa na athari mbaya wakati wa mahitaji makubwa ya huduma ya afya.
"Wamekuwa wakiumiza sana baadhi ya raia wa Palestina. Watoto sita wameripotiwa kufa kutokana na baridi kali au hypothermia katika siku chache zilizopita pekee”.
Dkt. Rik Peeperkorn, Mkuu wa ofisi ya WHO huko Gaza na Ukingo wa Magharibi akihojiwa na Idhaa ya Umoja wa Mataifa huko Geneva, Uswisi
Hospitali zimegeuka uwanja wa vita Gaza: WHO
Dkt. Rik Peeperkorn, mwakilishi wa Shirika la Afya la Umoja wa Mataifa Duniani WHO kwa eneo la Ukingo wa Magharibi na Gaza ametoa angalizo juu ya janga baya la kiafya huko Gaza, ambapo asilimia saba ya watu wameuawa au kujeruhiwa tangu Oktoba 2023.
"Mwaka 2025 unaanza kwa hali ya huzuni na wasiwasi mkubwa huku mapigano yakiendelea kushika kasi," amesema, akisisitiza kwamba zaidi ya asilimia 25 ya zaidi ya raia 105,000 waliojeruhiwa wanakabiliwa na hali ya kubadilisha maisha.
Dkt. Peeperkorn ameonya kwamba uhamishaji muhimu kwa ajili ya matibabu unafanyika polepole sana, na zaidi ya watu 12,000 bado wanasubiri matibabu nje ya nchi.
"Kwa kiwango cha sasa, itachukua miaka mitano hadi 10 kuwahamisha wagonjwa hawa wote walio mahututi," amebainisha.
Hospitali ya Kamal Adwan ilikabiliwa na operesheni kali za kijeshi za Israel tarehe 25 Oktoba, na ni miongoni mwa hospitali za mwisho zinazofanya kazi kaskazini mwa Gaza.
WHO imethibitisha mashambulizi 654 kwenye vituo vya afya, na kusababisha mamia ya vifo na majeruhi.
Amebainisha kuwa "Lakini dhidi ya matatizo yote, wafanyakazi wa huduma za afya, WHO na washirika wamefanya huduma ziendelee kadri inavyowezekana".
Dkt. Peeperkorn ametoa wito wa kuongezwa kwa misaada, uhamishaji wa haraka, na ufuataji wa sheria za kimataifa za kibinadamu, na amehitimisha taarifa yake kwenye Baraza hilo la Usalama kwa ombi la kusitishwa haraka kwa mapigano.