Siku ya Kimataifa ya Wahamiaji tujikumbushe changamoto wanazokumbana nazo – António Guterres
Wahamiaji wakitembea katika jangwa la Djibouti. (Maktaba)
Siku ya Kimataifa ya Wahamiaji tujikumbushe changamoto wanazokumbana nazo – António Guterres
Haki za binadamu
Katibu Mkuu wa Umoja wa Mataifa Antonio Guterres kupitia ujumbe wake mahususi kwa ajili ya Siku ya Kimataifa ya Wahamiaji ametoa wito kwa ulimwengu kuitumia siku hii kujikumbusha kwamba pamoja na kwamba tunasherehekea michango ambayo mamilioni ya wahamiaji hutoa kwa jamii, uchumi na nchi kote ulimwenguni lakini leo pia ni siku ya kujikumbusha changamoto ambazo wahamiaji wanaweza kukumbana nazo kuanzia kwenye chuki na ubaguzi, hadi unyanyasaji wa moja kwa moja na kubaguliwa, hadi ukatili usiofikirika wa biashara haramu ya binadamu.
Guterres ameeleza kwamba changamoto wanazokumbana nazo wahamiaji zinazidishwa na kuongezeka kwa wimbi la taarifa za uongo na upotoshaji na kauli za chuki mambo ambayo yanaleta migawanyiko na kupotosha michango muhimu ambayo wahamiaji wanaitoa kila siku.
Katerina Gracheva (kushoto), ni mshauri wa masuala ya ushirikiano wa wahamiaji anayefanya kazi nchini Ujerumani.
“Kama jumuiya ya kimataifa, lazima tuunganishe ubinadamu wetu wa pamoja, na tufanye kazi ili kubadilisha mwelekeo huu hatari.” Amesema Guterres.
Aidha kiongozi huyu wa Umoja wa Mataifa amekumbushia kwamba Mkataba wa Kimataifa wa Uhamiaji Salama, Uliopangwa na wa Kawaida, uliopitishwa miaka sita iliyopita, unatoa suluhu madhubuti ya kuwalinda wahamiaji katika kila hatua ya safari zao na kuendelea kupanua njia zinazozingatia haki za uhamiaji.
“Na kupitia Mkataba wa Zama Zijazo uliopitishwa hivi karibuni,” Guterres amesema, “nchi za ulimwengu zilijitolea tena kuimarisha ushirikiano wa kimataifa kwa ajili ya uhamiaji salama, utaratibu na wa kawaida.”
Bwana Guterres amehitimisha ujumbe wake akisema, “leo na kila siku, hebu tusimame kutetea haki za wahamiaji wote na tufanye kazi ili kuunda mifumo ya uhamiaji iliyo salama, ya kibinadamu na jumuishi.”
Mhamiaji wa Angola Kanhanga alichapisha kitabu "Be Amazing" nchini Brazili.
Nalo Shirika la Umoja wa Mataifa la uhamiaji (IOM), leo limetangaza ombi la dola bilioni 8.2 za kimarekani kukuza uhamaji wa kawaida ulio salama na utaratibu.
Mkurugenzi Mkuu wa IOM Amy Pope, kupitia ujumbe wake kwa ajili ya leo, Siku ya Kimataifa ya Wahamiaji akiguzungumzia ombi hilo la ufadhili anasema, "ufadhili huu muhimu utasaidia programu za IOM katika zaidi ya nchi 170, kwa lengo la kufikia zaidi ya watu milioni 101."
Anaongeza kueleza kwamba Kazi ya IOM itaendelea kuzingatia malengo yao matatu muhimu ya kimkakati akiyataja kuwa ni: Kuokoa maisha na kulinda watu wanaohama. Suluhu za ufurushwaji. Na kusaidia njia za uhamaji salama, wa kawaida na ulio na utaratibu.